يا اهلا يا اهلا بيكم اعزائي .. مقال جديد ولقاء جديد .. ابتدت نسمات الربيع تهل علينا اهو .. الجو ابتدى يتحسن الحمدلله .. ولاون الشتا جميل بيخللي الناس عندها نشاط وعايزة تتحرك .. والحركة ايه؟ بركة … والبركة في البكور زي ما بيقولوا .. بالمناسبة .. علماء النفس والصحة النفسية بيقولوا ان الانسان بينتج بجد يعني قمة الإنتاجية بتاعته بتكون في فترة اربع شهور .. من شهر مارس لشهر يونيو .. فمثلا الابتكارات الجديدة بتكون جاهزة للأسواق في الفترة دي .. أيا كان التفسير .. احنا عايزيين نكون منتجين في كل وقت والحمدلله ان المناخ في مصر يساعد على كده
بمناسبة المناخ .. الفترة اللي جايه حانلاقي معظم الجهات بتتكلم عن المناخ علشان المؤتمر العالمي للمناخ اللي في نوفمبر الجاي ان شاء الله في شرم الشيخ وان شاء الله يكون لينا فيه بصمة عالمية .. يا ريت كل واحد يشوف ازاي يقدر يساعد ولو بحاجة بسيطة .. فاكرين لما اتكلمنا عن الابتكار التدريجي او اللي بالانجليزي بيقولوا عليه “انكريمينتال اينوفبشن” .. يعني الابتكار حته حته مش لازم اعمل صاروخ علشان أقول اني باعمل ابتكار … وخلونا نأكد مع بعض ان الابتكار هوه ايه؟ الابتكار هو التطبيق الناجح للافكار .. تطبيق يعني تتنفذ الفكرة الوهمية اللي عندكم .. طب والناجح يعني ايه؟ يعني تطبيق الفكرة دي يكون في حد عايز يشتريها او ممكن انه يدفع فيها فلوس او ان الفكرة المطبقة دي يكون عليها طلب او ان يكون ليها تأثر مالي على صاحبها … غير كده حاتعتبر الأفكار الوهمية دي مجرد هلاوس سمعية وبصرية
مين فيكم تابع الأنشطة المختلفة اللي سيادة الرئيس عملها الفترة اللي فاتت؟ يمكن كان في حاجتين مهمين .. واحدة منهم افتتاحات اللي كانت في 6 أكتوبر .. بس الأهم كان الايفنت بتاع تنمية الاسرة المصرية .. حقيقة ده ايفنت كان نسبة الصراحة فيه بتوجع بجد .. كعادة سيادته انه بيتكلم من القلب الكلام اللي يوصل لكل الناس وخلوا بالكم ان ممكن يكون في وسط الكلام رسايل بتتقال لناس معينة واللي على راسه بطحة بقى!!!
تابعنا فقرة الكلام تكنولوجيا المعلومات والاتصالات وان برنامج منحة من الدولة اتعمل واتقدم ليه 300 الف واللي كان مناسب هوه 111 بس!!! طبعا دي فجوة كبيرة جدا ويمكن الزملاء الأعزاء اللي في قطاع الاتصالات وتكنولوجيا المعلومات عليهم دور كبير علشان يجاوبوا على التسأؤل ده!!! هوه ازاي كده!! الطلبة في الجامعات بتاخد ايه!! ولا حصل استنزاف للعقول “بريين درين” والعقول سافرت وسابت البلد!! دي وقفه خطيرة وجرس انظار .. برامج ومنح كتيرة في مجال الاتصالات وتكنولوجيا المعلومات متاحة ولكن المحصلة ايه؟؟ فين التأثير؟؟ حقيقة أتصور اننا كلنا مسؤولين عن ده .. سيادته دايما بيتكلم عن امتلاك التكنولوجيا واننا لازم يكون عندنا الرأس المال البشري .. انما بالمنظر ده صعب اوي .. احنا 100 مليون يا جماعة!!! بصراحة كلنا مسؤولين!!!
المهم في الايفنت بتاع تنمية الاسرة المصرية طلعت منه شوية مخرجات يمكن 25% من المخرجات دي هي بتخص ملف ريادة الاعمال … وكون ان سيادته بيقول كده او انها تطلع في صورة مخرجات بيقى الكل لازم يشتغل عليها .. مش كدة ولا ايه؟؟
تعالوا نشوف ايه المخرجات بتاعت مؤتمر المشروع القومي لتنمية الاسرة المصرية .. تعالوا يالا ..
1. سيتم تطبيق المشروع بـ 9 محافظات بالمرحلة الأولى فى أول أكتوبر المقبل، وجاء اختيار المحافظات المُستهدفة: أسيوط، وسوهاج، وقنا، والمنيا، والأقصر، وأسوان، والجيزة، والشرقية، والدقهلية
2. اختيار المحافظات بناء على أربعة مؤشرات: الأكثر فقرا، والأعلى في معدلات الإنجاب الكلي، والأعلى من حيث الحاجة غير المُلباة، والأعلى في نسبة المواليد، مع الأخذ في الاعتبار محافظات المرحلة الأولى من “مبادرة حياة كريمة” التي تضم 51 مركزا
3. يهدف الى تمكين المرأة المصرية اقتصاديا عن طريق أنشطة مختلفة منها مليون مشروع صغير ومتناهي الصغر
4. تدريب 2 مليون سيدة على مستوى الجمهورية على ريادة الأعمال.
5. يستهدف بالعام الأول تمويل 350 ألف مشروع متناهي الصغر
6. تجهيز 200 مشغل خياطة للسيدات بوحدات صحة وتنمية الأسرة
7. تقديم الخدمات الـمالية وغير الـمالية وكذا تدريب 2 مليون سيدة على إدارة الـمشروعات.
8. تشغيل 20 مركزا ضمن خطة العام الأول ضمن اطار إنشاء وحدات صحة وتنمية الأسرة.
دي يمكن كانت المخرجات اللي بتخص ريادة الاعمال .. وعلشان ده يتنفذ فا خصصت الحكومة 2.9 مليار جنيه للسنة الاولى الأول للمشروع تنمية الأسرة المصرية .. طيب ايه؟؟ مش يالا بينا ولا ايه!!!
طبعا لو بنتكلم عن الابتكار وريادة الاعمال والتكنولوجيا .. لازم نقف كده شوية عند لقطة الحرب بين روسيا وأوكرانيا .. والفترة اللي سبقتها بكام يوم .. في كده شويه هجمات وقرصنة اليكترونية حصلت في كام حته وفي كام بلد في العالم .. وبعدين في بعضنا تابع لقطة ان الين ماسك راح مطلع صاروخ وفي اقل من 10 ساعات قدرت أوكرانيا تستعمل الانترنت بعد ما اتقطعت الانترنت عليها !!! الموضوع كبير وامتلاك التكنولوجيا حايعيد رسم السيناريوهات في أدوات الحرب والسلام في الفترة اللي جاية .. واحب أقول بس ان خطاب مصر في الأمم المتحدة سنة 2016 اللي قاله سيادة الرئيس كان بيتكلم فيه عن التكنولوجيا من اجل السلام!!! احنا سابقين .. بس يا ريت الناس تصدق وتمشي على نفس الرتم ..
وبما اننا دخلنا في التكنولوجيا .. كنت مشارك في مؤتمر عن الميتافيرس .. الميتافيرس ببساطة .. مصطلح اتقال لاول مرة سنة 1992 .. وبعد كده استخدم في منصة Second Life .. حد فاكرها؟ كان موقع بتدخلوا عليه وتختاروا شخصية جديدة ليكم وتعملوا عالم افتراضي ليكم وتعيشوا فيه … طلع من زمان اوي .. انا عرفته تقريبا سنة 2005 لو انا فاكر صح … وكنت ساعتها باشتغل في الشبكة القومية للمعلومات وكنت باشوف ازاي ننقل المتاحف والحضارة المصرية للسكند لايف .. خصوصا ان ساعتها كنت باعمل لقاءات بالفيديو كونفرنس مع بعض الجانعات الامريكية زي جامعة UCLA وغيرها من اللي عندهم برامج للمصريات واعادة ترميم الاثار والمومياوات المصرية وكده .. ساعتها عرفت السكندلايف ودخلت عليه فعلا ولعبت بيه شويه .. المهم لاقيت عليه متحف روما وغيرها من المتاحف ,, فا قولت طب واحنا فين … المهم .. ظهر استخدام الميتافيرس تاني بعد ما مارك زوكربيرج قال انه حايدخل العالم ده !!! وده حال التكنولوجيا … التكنولوجيا موجوده من زمان بس بيجي حد يروح مسلط الاضواء عليها ويشد الانتباه ناحتها .. ساعتها استثمارات كتيرة تتحرك في الاتجاه ده .. طبعا هنا بيجي دور امتلاك التكنولوجيا .. طبيعي اللي بيسلط الاضواء على التكنولوجيا دي بيكون عدا بمراحل وعايز يعمل شوية فلوس من الاخر منها !!!
ايوه ايه بقى الميتافيرس … هي كلمتين .. ميتا .. يعني “ما واء” او “تفوق” .. وكلمة فيرس ودي جايه من كلمة “يونيفيرس” يعني “عالم” .. بالبلدي كدة من ما وراء العالم … ايون … يعني معدي الفلنكات بالبلدي كده … من الاخر يعني ازاي ان حضراتكم تكونوا عايشين في عالم افتراضي بصورة كاملة وبتتفاعلوا فيه وكانه واقع … الموضوع ابتدى بالالعاب الالكترونية وزاد لحد حياتنا اليومية .. الكل بيحاول وبيجري .. بالمناسبة .. كان في فيلم اسمه فري جاي “Free Guy” اتعرض في السينما هنا من كام شهر .. لو حد اتفرج عليه اهو ده بيقرب شويه الصورة لذهن المشاهد على فكرة الميتافيرس .. المهم انا فاكر لما موضوع السكندلايف ده طلع .. ناس قعدت تتكلم وتقول ان في ناس اتجننت وانتحرت و و و علشان معرفوش يفصلوا بين الخيال والواقع وجالهم امراض عقلية !!
المهم … بعد ما عرفنا قصة الميتافيرس .. معهد الحوكمة والتنمية المستدامة كان عامل “منتدى الحوكمة الرشيدة في العالم الافتراضي “ميتافيرس” وكان ليا شرف المشاركة في ادارة الجلسة الختامية اللي بتلخص الموضوع وايه اللي مطلوب وكده … من الاخر كان في ست اسئلة اتجاوب عليها من السادة المتحدثين .. الاسيلة هي: ايه .. ليه .. فين .. امتى .. مين .. ازاي .. حقيقي كانت جلسة غنية جدا واللي حابب يعرف عنها ممكن نتكلم عنها هنا في المكنز او نعملها وبينار ..
الخلاصه هي القدرة على امتلاك التكنولوجيا وتسخيرها لخدمة الانسان .. ما ننساش ان زي ما في وش ايجابي للتكنولوجيا في وش سلبي .. ويبقى الأثر .. تحياتي
اقرأ ايضا للكاتب
