اشراقة امل وبداية جديدة ويوم جديد .. هيصنا وشجعنا وقلوبنا راحت الكاميرون .. بس يوم جديد .. امل جديد .. اهلا بيكم أصدقائي الأعزاء .. عشنا مع بعض لحظات من الاثارة والتشويق والامل في ماتش السنغال .. كلنا ايد واحدة .. هدف واحد وروح واحدة ..
تجربة ماتش النهائي الحقيقة تجربة غريبة جدا .. سيبكم من التنظيم في الكاميرون واللي اتعمل فينا .. اتخيل ان في ناس كتير علقت على ده .. طبعا اخواتنا في الكاميرون كانوا عايزيين يعملوا اسرع حاجه علشان ما يعطلوش الوفود .. فا راحوا عملوا صالتين لموضوع الحجر الصحي .. والحمدلله كان موفق جدا .. وجه لحظة الجوازات .. بسرعة اخدوا مننا الباسبورات وادوا كل واحد ورقة فيها رقم .. الرقم ده محطوط زيه في الباسبور .. بحيث واحنا راجين نستلم الباسبورات بالرقم .. فكرة حلوه وسريعة ومنجزة جدا بصراحة .. بس الإنجاز كان في النص الأول من الحدوته .. النص التاني بتاع الاستلام قصة ..
المهم .. كله طلع بسرعة جدا .. ركب الاتوبيسات بسرعة .. في ناس كانت عمالة تدور على اتوبيساتها .. في اتوبيسات ماجتش للأسف .. فا في لمح البصر كان في اتوبيس عام اتوفر واخد الناس .. الظريف ايه .. شكل الاتوبيس العام الحقيقي جميل .. شبه اتوبيسات أوروبا كده ومرسوم عليها إعلانات او رسومات فنية ذوقها حلو .. طب ليه مايكنش عندنا اتوبيسات من النوع ده؟ حقيقي هوه في .. بس تبع شركة خاصة مش اتوبيسات الحكومة .. حاجة كمان مهمه لازم الحقيقة الواحد يقولها ان كان في فريق مصري متكون من شخصين تلاته بيساعدوا أي حد وكل حد .. حقيقي مالحقتش اتعرف عليهم بس كانوا بجد فريق انقاذ .. لو حد يعرف مين دول برجاء توجيه الشكر والتحية ليهم .. دي مصر يا جماعة مش هزار
الاتوبيسات انطلقت … مشينا في الطريق للاستاد نفس الطريق اللي فات بس مرة واحده كده الاتوبيسات غيرت اتجاهها وسابت الطريق الرئيسي ودخلت في طرق ضيقة جدا .. لما سألنا ليه كده .. قالوا الطريق الرئيسي مقفول علشان رئيس الكاميرون رايح الاستاد .. طبعا احنا كنا واصلين بدري .. بس الحركة دي خليتنا يادوبك نوصل قبل الماتش بي 5 دقايق برضه مع اننا واصلين بدري ساعة ونص عن المرة اللي فاتت … انتم متخيليين!!!
طبعا من اجمل اللحظات واحنا في الاستاد .. كنا قاعدين في حته بعيده فا يادوبك النظر على القد .. اجمل حاجة بقى اني شوفت شباب ال PLP الجميل .. ما شاء الله القعدة في وسطه جميلة .. كله حماس ونترقب وشغف بالفوز .. ربنا يحميكم .. طبعا بقى جينا لفقرة .. خد اتسلى وانت بتتفرج … ووووااااوووو … بجد اجمل فقرة … طبعا باشكر كل حد عزم عليا بحاجة … حاتشوفوها في الصور على صفحة المكنز على الفيس بوك
حضراتكم عارفين بقى باقي سير الماتش .. وركبنا الاتوبيسات وعلى المطار .. كله مجهد وتعبان .. بس برضه نفس الشاب اللي شوفته في المطار بيساعد هوه نفس الشاب اللي واحنا نازليين من الاتوبيس قالنا يالا بسرعة حايقفلوا الاستاد .. هوه نفس الشاب اللي جاب لينا اتوبيس زيادة ياخد باقي الناس اللي مالاقتش اتوبيساتها .. تحياتي لهذا الشاب النشيط اللي ماعرفوش .. حرفيا كنت انا في اخر اتوبيس يمشي من منطقة الاستاد ..
فقرة الباسبورات في المطار كانت مخيبة لامالي .. علشان كنت متخيل انهم حايكونوا عاملين تقسيمة للارقام من كذا الى كذا في الحته دي وهكذا بحيث كل واحد يشوف الرقم بتاعه فين ويروح يستلم الباسبور .. انما للأسف كان زي اللي فات .. حاطين الباسبورات على بعض في باسكتس كتيرة وانت افرز بقى يا جميل!!! الحمدلله .. البوردنج كارد كان مكتوب عليه ان الإقلاع الساعه 3 صباح .. الحمدلله انطلقنا بعديها بي 6 ساعات !!! المهم وصلنا الحمدلله .. اجمل حاجة خفة دم المصريين .. الشباب قعدوا يساعدوا الراجل اللي على الكاونتر علشان يشد حيله شويه … اتفرجوا على الصور
على المستوى الشخصي .. اتعرفت على سعد .. ورامي .. وفرج من مرسى مطروح وشباب جميل من شمال سينا .. الله على الجمال والروح الحلوه اللي تفرح الواحد .. طبعا ده غير أصدقائي من ال PLP .. احنا مش قوليليين
يا شباب .. يوم الخميس والجمعة الجايين .. 17 & 18 فبراير .. في قمة مصر لريادة الاعمال .. حاتتعمل في جامعة بدر .. يالا اشتركوا فيها .. وانا عامل فيها كذا نشاط … يالا
افريقيا والتنافسية .. طيب فين بقى ريادة الاعمال والتكنولوجيا والتنافسية والابتكار .. حقيقي افريقيا مليانه فرص .. مجال خصب جدا لكل التخصصات .. فرج صديقي من مطروح .. ما شاء الله دماغه كلها بيزنيس .. كل ما نمشي في حته واحنا في الاتوبيس وعينه تيجي على حاجه يطلع منها فكرة رهيبة .. برافو الشباب
افريقيا والتنافسية .. مش حاتكلم عن الزراعة في الكاميرون .. الموز .. الاناناس .. طبعا الاحجام فظيعة جدا .. الاناناسة الواحده حجمها تقريبا ضعف حجم الاناناس العادي اللي في السوبر ماركت .. وتمن الاناناسه الواحده ما يعادل 13 جنيه .. هنا الكيلو بي 55 جنيه!!! بجد لو حد يحب يدخل في المشروع ده يقولي ..
افريقيا والتنافسية .. التنافسية هي زي ما بنقول انها لعبة الأمم .. وجه واحد اسمه مايكل بورتر .. أستاذ التنافسية في جامعة هارفرد في أمريكا وعمل نموذج للتنافسية .. وقال ان في مجموعة من القوى بتأثر على التنافسية بتاع أي بيزنس .. القوى دي كانت … 1) المنافسين .. 2) الموردين .. 3) العملاء .. لحد كده وده طبيعي أي حد ممكن يتصوره .. انما اللي كان جديد هوه 4) البدائل .. والبديل مش منافس .. البديل ده حد بيعمل جزء من اللي حضراتكم كرواد اعمال بتعملوه او انتم كأصحاب شركات بتعملوه بس هوه بيعمله باحترافية ومميزات عنك .. فا بالتالي بيشد الناس ليه .. ناخد مثال .. من البديل بتاع البنك؟؟؟ ايوه برافو … الصرافة .. بس الصرافة بتعمل ايه احسن من البنك؟ حاجات كتيرة تقدروا انتم تقولوها .. انما هل الصرافة تقدر تديك قرض؟ لاء .. هل الصرافة تقدر تفتحلك حساب توفيري عندها؟ لاء .. هل الصرافة تقدر تطلعلك دفتر شيكات؟ برضه لاء .. فاعلشان كده الصرافة هي بديل مش منافس … طبعا عينا كرواد الاعمال او أصحاب مشاريع على الحته دي لانها ممكن بسهوله جدا تتسحب السجادة من تحت رجلكم وانتم مش حاسيين … القوى نمرة 5) النيو انتري .. يعني اللي داخلين البيزنس جديد .. طب دول برضه مش منافسين .. لانهم لسه معندهمش عملاء او مبيعات .. لسه بيقولوا يا هادي .. وفي الاغلب علشان الناس دي تعرف تدخل في سوق فيه ناس من قبل كده يبقى لازم يكون عندهم ميزة تنافسية .. وياريت ماتكنش السعر .. اننا ارخص!!! في الاغلب بتكون ميزة تنافسية تكنولوجية بتقدر تفرقنا عن باقي اللعيبة في السوق
افريقيا والتنافسية .. مش بس القوى الخمسة دول .. لاء مايكل بورتر ضاف عليهم قوى رقم سته .. اللي هي 6) قوى باقي ذوي المصلحة .. يعني الشركاء .. المساهمين .. الجهات الإدارية .. الحكومة .. النقابات والاتحادات .. وغيرها .. كل دي جهات ممكن تأثر بالسلب او بالإيجاب على المشروع … علشان كده لازم نكون مصحصحيين ..
مرة تانية .. ما تنسوش يا شباب .. يوم الخميس والجمعة الجايين .. 17 & 18 فبراير .. في قمة مصر لريادة الاعمال .. حاتتعمل في جامعة بدر .. يالا اشتركوا فيها .. وانا عامل فيها كذا نشاط … يالا مستنيكم
مرة تانية … يوم جميل وحياة .. والنهاردة بقول كل سنة وانتم طيبين بمناسبه أعياد ميلاد أي حد يوم 11 فبراير وبالأخص الأستاذ دومدوم .. وبمناسبة قرب الفالنتاين … عيد الحب .. يارب أيامنا كلها حب
