أراء ومقالاتالموقع

نزار سامي يكتب لـ «الموقع» المكنز … “هابي تو يو”

هابي تو يو .. هابي تو يو .. زي النهاردة من سنة فاتت (21 يناير 2021) كانت أول لقاءات المكنز الأون لاين … ياااااااه … الوقت مش بيعدي بسرعة .. الوقت بيطير .. يا رب كل أوقاتكم تكون سعادة وهنا وفرح .. كل سنة وحضراتكم طيبين .. أنتم جميعا أسرة المكنز خليتوا ليه معنى حقيقي .. من غير دعمكم ومساندتكم عمره ما كان هايشوف النور .. النهاردة المكنز كمل سنة ..

هابي تو يو .. ويوم جميل على حضراتكم على الرغم من إن امبارح بالليل كان تلج بس النهاردة الشمس جميلة وكلها طاقة وحيوية ونشاط ودفا .. أيوة كلنا لازم نكون ماليانين طاقة ونشاط ونطلع بره الكومفورت زوون اللي اتكلمنا عنها قبل كده .. منطقة الراحة والخمول .. يالا بينا نطلع ونتحرك ونكتشف الجديد والجديد

هابي تو يو .. حقيقة أنا باشكركم كلكم .. كل واحد خد من وقته إنه يقرأ الموضوعات دي أو يتناقش فيها أو يقترح عليا أفكار أو حتى لدرجة يشارك في اختيار الموضوع اللي حانتكلم فيه أو حتى اسم المقال .. انا مدين ليكم بالفضل ده .. ممكن واحنا في وسط الكلام تتقال جملة أو تعليق يتبني عليها المقال كله .. حقيقة من الحاجات الجميلة الي اتعلمتها منكم هي ازاي أكون اجايل “Agile” .. دي كلمة معناها بالعربي “الرشاقة” ويعني إن الإنسان يكون “مرن” و “سريع” الاتنين مع بعض .. ودي حاجه بقولها في المحاضرات بس حقيقي جربتها في المكنز بإيدي .. في ظل الانطلاق للجمهورية الجديدة لازم وحتما نكون كل واحد فينا مرن وسريع يعني اجايل .. يالا بينا يا أبطال

هابي تو يو .. الحمد لله كانت سنة جميلة .. بكل ما فيها .. أحداث ومفارقات ومواقف وشخصيات وحاجات ليها العجب .. بس الواحد لما بيسترجع الشريط بيلاقي فعلا حاجات جميلة حتى لو كانت باينه إنها عكس كده .. يا ريت كل واحد يعمل كده ويلبس نضارة العقلية الإيجابية ويقيم الرحلة .. أصل الكنز في الرحلة زي ما أصدقائي في البرنامج الرئاسي بيقولوا .. الكنز في الرحلة .. ما تيجوا كل واحد يقول رحلته في 2021 في سطور؟؟ مين يحب يشارك هنا أو على الفيس بوك؟

هابي تو يو .. أنا السواق .. أنا السواق .. إيه الحكاية؟ مستغربين؟؟ يمكن!!! الحكاية ومافيها .. كان عندي لقاء في اكسترا نيوز مع الإعلامية دينا سالم علشان نتكلم على موضوعات تخص ريادة الأعمال .. يمكن لو روحتوا على صفحة المكنز على الفيس بوك .. الخبر اللي تحت المقال ده حاتشوفوا اللقاء .. المهم .. العادي لاقيت التليفون بيضرب الساعه 5 واللقاء الساعة 7 مساء .. واحده (غالبا من فريق الاعداد زي كل مرة) بتكلمني بتقولي: حضرتك عندك اللقاء النهاردة .. قولتلها أيوه مظبوط بس محدش اتصل بيا يقولي العربية حاتيجي إمتى أو السواق يتصل يقولي حايجي امتى .. ردت وقالت .. أنا السواق .. قولتلها أيوه أنا منتظر حد يكلمني .. قالتلي أنا السواق!!! تخيلوا!! اول مرة في حياتي ألاقي السواق اللي حايخدني لمدينة الإنتاج الإعلامي بنت مش ولد .. المهم .. ركبت العربية وطبعا هي أكيد مرت بالموقف ده كتير .. السؤال الطبيعي اللي يتبادر في الذهن إيه؟؟ أيوة سألته .. لاقيتها فخورة جدا انها البنت الوحيدة في مدينة الإنتاج الإعلامي اللي بتشتغل كده .. الأغرب .. إنها خريجة خدمة اجتماعية .. واشتغلت في مجالات كتيرة .. انما شغفها الحقيقي انها عايزة تكمل ماجستير ودكتوراه في “التوحد” .. البنت دي اسمها دينا فارس .. مش عايز أتكلم عن الاحترافية الشديدة في العمل والمهارة في السواقة إنما كمان دينا عندها بنوته اسمها “لورين” .. المهم خلص اللقاء وقبل ما انزل بقولها ألف شكر .. قالتلي شكرا لحضرتك إن شاء الله حاكون الدكتورة دينا فارس!!! تحياتي ليكي يا دينا وربنا يوفقك دايما

هابي تو يو .. على الجانب الاخر .. بعد قصة دينا .. جيت أركب اوبر .. والكابتن اسمه صابر كان قريب مني .. وكان عامل وجهه للشيخ زايد .. وانا رايح المهندسين .. راح البعيد اتصل بيا يقولي حضرتك رايح فين .. قولتله رايح الحته الفلانية في المهندسين .. قالي بس أنا عامل وجهه على الشيخ زايد فا ازاي اوبر يطلعني ليك!!! المهم شرحتله .. رد عليا وقالي تمام تمام حالا حاكون عندك .. بعدها لاقيته لغى الطلب وحولني على كابتن تاني .. الظريف ايه .. انه العربية الجديدة جت بعد فترة ولما ركبتها ومشيت لاقيت لسه صابر واقف محلك سر!!!! يااااااااااااااااه على المخ !!!!

هابي تو يو .. فعلا .. على رأي والدي الله يرحمه كان دايما بيقول: قسمتك في عقلك .. وعلى رأي استاذي العزيز عمرو سليمان – أستاذ علوم الاعصاب المعرفية “Your Company is Your Brain” .. وكمان حاجة حلوة اتعلمتها من دكتور عمرو حاجة اسمها “Mental Flexibility” يعني “المرونة العقلية” فعلا الدماغ هي الأساس … الراجل الكابتن ده حايفضل طول عمره كابتن وعمره ما حايتحرك .. مستني حاجة تيجي على مزاجه .. يالا ربنا يوفقك .. صابر يا عم صابر .. ودينا حاتبقى الدكتورة دينا .. ده الفرق بين عقلية الندرة وعقلية الوفرة … تحبوا تكونوا مين فيهم .. رواد الأعمال لازم دماغهم يتشتغل على طول .. ودايما في جديد ودايما عندهم “منتال فليكسيبيليتي”

هابي تو يو .. إن شاء الله مع 2022 هاتكون لقاءات الوبينار مع نزار كل يوم 22 من كل شهر .. الساعة 8 بالليل .. بكرة إن شاء الله هايكون أول لقاء .. مع الدكتورة غادة خليل مدير برنامج رواد 2030 التابع لوزارة التخطيط والتنمية الاقتصادية .. والأستاذ الدكتور نبيل شلبي مؤسس دار المستثمر العربي .. الراجل اللي عمل خريطة ريادة الاعمال المصرية .. هاستناكوا جميعا علشان هانقول شوية معلومات كويسة ..

هابي تو يو .. هابي تو يو .. علينا جميعا .. شكرا لكل فرد وقف جنبي وساندني في رحلة المكنز .. من غيركم لم أكن .. تحياتي ومستنيكم بكرة

مقالات ذات صلة

زر الذهاب إلى الأعلى