22-2-22.. يالا نحمي المستقبل .. طبعا كلنا شايفيين التاريخ المميز .. أهلا بيكوا اعزائي .. وشكرا لكل واحد سأل المقال فين .. حقيقة انا فضلت إنه يكون مقال مخصوص النهاردة مش يوم الجمعة اللي فات علشان كذا سبب .. أولا ده المقال رقم أربعين .. فا تحية وتقدير ليكم ولكل فريق «الموقع» اللي بيدوني كل الدعم .. ثانيا علشان في احداث كتير وكلها جميلة إن شاء الله علشان عايزيين نشوفها .. بقولكم ايه .. 22-2-22.. يالا نحمي المستقبل .. يالا بينا
22-2-22.. يالا نحمي المستقبل .. لو ابتدينا النهاردة … أولا كل سنة وكل حد عيد ميلاده النهاردة .. انا شخصيا لاقيت ناس كتير قرايب ومعارف وأصدقاء عيد ميلادهم النهاردة .. كل سنة وانتم كلكم طيبين ودايما فرحانين.
22-2-22.. يالا نحمي المستقبل .. اللي فيكم صحي بدري النهاردة وشاف احتفال تعامد الشمس على تمثال رمسيس الثاني في أبو سمبل … أتصور إن دي اول مرة تتنقل مباشر … حقيقي مش فاكر اني شفتها قبل كده … كل واحد شايف إنه سليل الفراعنة أو رمسيس التاني بقوله كل سنة وانتم طيبين .. جالنا 6000 زائر يتفرجوا على الحدث ده … مصر بتتغير يا شباب … ما يالا بينا نحمي المستقبل.
22-2-22.. يالا نحمي المستقبل .. النهاردة كان معاد الوبينار مع نزار .. بس لاقيت العالم كله بيتكلم ويحتفل .. فخلونا نحتفل مع العالم .. على فكرة .. امبارح كان اليوم العالمي للغة الأم .. حقيقي السنة اللي فاتت كانت مظاهر الاحتفال باليوم ده أكتر من السنة دي بكتير … امبارح كمان ساعات الغروب اللي كان فيكم في الشارع شاف السحاب وضوء الشمس عامل لوحة فنية روعة .. امبارح شوفت ناس كتير اوي بتتصور في الخلفية دي او بتصور منظر السحاب … الله على المنظر والجمال .. الله على بناء ثقافة الجمال .. الله على بناء الهوية البصرية .. الله على بناء الهوية المصرية .. 22-2-22.. يالا نحمي المستقبل ..
22-2-22.. يالا نحمي المستقبل .. الويك اند كان قمة مصر لريادة الأعمال اللي اتعملت في مدينة بدر .. استضافتها جامعة بدر .. حقيقي كنت متخيل ان الحضور هايكون قليل بس الحمدلله كان مناسب جدا والجلسات وورش العمل كانت مفيدة جدا ..ويمكن اللي فيكم كان متابع .. كنت موجود على مدار اليومين .. اتكلمت وكنت مدير الجلسة الافتتاحية للقمة في اليوم الأول واتكلمت على علاقة التغيرات المناخية بريادة الأعمال وكان معايا ضيوف أفاضل من مصر وبره مصر وكانت جلسة مفيدة للناس .. واليوم التاني كنت مدير جلسة عن دور الشركات وتفعيلها في مناخ ريادة الأعمال .. الجلسة كانت مختلفة .. عملنا حاجه مطرقعة .. دمجنا جلستين في بعض .. كانت فكرة ظريفة .. اللي حابب يتفرج على تفاصيل الجلسات ممكن يشوفها على موقع قمة مصر لريادة الأعمال وعلى الفيس بوك ..
22-2-22.. يالا نحمي المستقبل .. خير اللهم اجعله خير وانا مروح من الجامعة وصلت لأقرب مترو … وركبت مترو الخط التالت التحفة .. المهم وانا في المترو لاقيت الناس بتقول .. الله شايفين السواقه الناعمه الهادية .. مافهمتش يعني ايه … لاقيتهم بيقولوا .. اهو لو كان راجل كان زمانه كربسنا على بعض … برضه اخوكم مش فاهم .. المهم وصلنا محطة العتبة .. الفضول اخدني عايز اعرف في إيه ونزلت أبص على كابينة القيادة .. لاقيت المفاجأة .. قائد القطار بنت … الله الله الله الله .. دلوقتي فهمت .. ما شاء الله عليها .. منتهى الاحترافية في الأداء … ايه الجمال ده .. طبعا كنت عايز أتكلم معاها بس ماعرفتش .. المهم لاقيت امبارح منزلين صورة البنوته قائد القطار … شوفوها في البوست على الفيس بوك … ما يالا نحمي المستقبل .. مصر بتتغير .. مصر أجمل بينا وعلشانا.
22-2-22.. يالا نحمي المستقبل .. الجميل كان في ملتقى لذوي الهمم في الاوبرا .. حاجة ايه الجمال ده … فن وموسيقى ورسم .. ايه الجمال والحلاوة دي .. تحياتي لكل اب وكل ام وكل طفل وطفله مليانين حماس .. أصلا كان عندي يومها حافلة تخرج دفعة جديدة من الماجستير .. فضّلت إني اروح وألبي الدعوة عن إني أحضر حفل التخرج .. وفعلا بجد دنيا تانية .. يالا نحمي المستقبل
22-2-22.. يالا نحمي المستقبل .. كمان كنت في لقاء مع الإعلامية الشابة الواعدة .. اية عبد الرحمن .. وكنا بنتكلم عن التحول الرقمي .. بس المرة دي اللقاء كان مختلف .. اتكلمنا على تأثير التحول الرقمي على التغيرات المناخية .. وإن ازاي نستفيد من التكنولوجيا في التغيرات المناخية .. طبعا كان في أسبوع التنمية المستدامة العربي وكان مليان جلسات ولقاءات وحاجة تفرح.
22-2-22.. يالا نحمي المستقبل .. طبعا الفالنتين .. مين احتفل بيه؟؟ يالا شاركوني احتفلتوا بيه ازاي ومع مين .. انا احتفلت بيه مع الطلبة بتوعي في محاضرة عن التحول الرقمي … يا ترى يا هل ترى في فالتين رقمي؟
22-2-22.. يالا نحمي المستقبل .. العالم كله بيتكلم عن اليوم الفريد ده .. خبراء الطاقة بيتكلموا عن تأثير الأرقام وعلاقتها بالابراج وأي هري … المهم هو ايه يا شباب … ازاي نسيب أثر … ايوا .. ويبقى الأثر خليكوا فاكرين.
22-2-22.. دلوقتي الساعة 22:22.. يالا نحمي المستقبل .. كل يوم وحضراتكم طيبين وبخير وسعادة.. ويبقى الأثر
اقرأ ايضا للكاتب
