يوم جميل وانطلاقة جديدة ورسالة جديدة .. النهارده يوم مختلف .. حانرصد فيه مع بعض رسايل حب الوطن بصورة عامة وفي محور الابتكار وريادة الاعمال بصورة خاصة .. وحقيقي خليني أقول ان فريق الموقع بيعمل ده باحترافية شديدة وبحيادية تامة من خلال حواراته وموضوعاته اللي بيناقشها .. أولا ازيكم وعاملين ايه .. مستعدين للصيف؟ الناس ابتدت تعمل خطط للايام اللي جاية؟ بس ساعات الواحد بيجيله حالة من السكون .. حالة من الهدوء .. تعالوا نشوف ايه الحكاية .. حكاية ريادة الاعمال وحب الوطن علشان دايما يبقى الأثر لحياة كريمة استعدادا للجمهورية الجديدة .. يالا بينا
ريادة الاعمال وحب الوطن .. يا ترى في علاقة بينهم؟ يا ترى شكل العلاقة دي ايه؟ يا ترى يعني ايه وطن؟ او ايه هوه الوطن من وجهة نظركم .. هل الوطن ده ممكن يكون شخص؟ ممكن؟ فاكرين اغنية مدحت صالح لكل عاشق وطن في فيلم أبو علي؟؟ طب فاكرين الاغنية بتاعت مدحت صالح والعبقري المبدع عمر خيرت في فيلم مافيا .. زي ما هي حبها .. بحلوها ومرها .. بص لحبيبتك حسها .. وزي ما هي حبها … فاكرينها؟؟ مين بترن في دماغه الاغنية دلوقتي او بيدندن بها؟ ماتيجوا نسمعها ونحسها سوا .. برافووو .. حاولوا تشوفوا المقطع اللي فيها حسين فهمي بيتكلم مع احمد السقا قبل الاغنية .. كلام في منتهى الجمال .. طب عايزيين تحسوا بحب الوطن بجد؟؟ اسمعوا موسيقى العبقري ياسر عبد الرحمن في فيلم أيام السادات .. هاتها على اليوتيوب وحطوا سماعات في ودنكم وشعلوها وغمضوا عينكم .. اسمعوها سيبوا نفسكم واسرحوا مع الموسيقى كده وقوليلي رأيكم ايه .. يالا بينا
ريادة الاعمال وحب الوطن .. كتير اوي بيجوا شباب يقولوا .. احنا عندنا فكرة جامدة .. فكرة فحيته لمصر .. فكرة حاتاخد مصر في حته تانية .. سؤال صحيح .. يعني ايه فحيته؟ يعني ايه حته تانية؟ اللي هي فين يعني؟؟ ولا اللي طلع في المقدر دلوقتي كلمة سيكا .. يعني ايه سيكا صحيح؟؟ بجد والله حد عارف؟؟ دي وحدات قياس ايه بلامؤخذة؟ طيب ايه الفكرة دي يا فندم؟ لا ماقدرش اقولها!! ليه بس؟ علشان ممكن تتسرق!! طب ايه المطلوب مني؟ عايز فلوس!! ليه؟ علشان انفذ الفكرة!! اللي هي ايه؟ لاء مش حاقدر أقول!!!!! ينفع كده بالذمة يا جماعة؟؟ ولا نموذج تاني يجي يقول فكرة .. أقوله طيب تتنفذ ازاي؟ يقولي معرفش انت قولي!! انت قولي!!؟؟ انا؟؟ حضرتك اللي اقترحت الفكرة فا حضرتك اللي عارف تتعمل ازاي!! يرد يقول ايه تفتكروا!؟! بيرد يقول: وانا مالي بالتنفيذ .. انا قولت الفكرة وباديها لمصر علشان مصر تنفذها!!! ايوه اللي هوه ازاي يعني يا كابتن؟؟ يرد يقول معرفش .. في الحالات اللي زي دي بيكون ردي عنيف شويه .. عادة بقول .. ربنا يخليك مجهود طيب منك انك فكرت بس الله يسعدك سيب مصر في حالها .. فا يستغرب اوي .. ايوة سيب مصر في حالها .. مصر ورمت من كتر الأفكار .. مصر عايزاك انت تكسب وتكسب فلوس كتير كمان ايه رأيك؟ مصر عايزاك انت تبقى احسن .. عارف ليه يا أبو الكباتن؟ علشان لما انت علشان تكسب مش حاتعرف تكسب لوحدك .. لازم معاك فريق .. وفريق كويس .. ولازم بتكون بتعمل حاجة الناس عايزاها بجد .. وبالتالي الناس هي اللي حاتقف جنبك وتساندك .. لما تشغل ناس معاك حانبقى احسن .. فا طبعا الاقي علاقة تعجب على استفهام على استنكار اترسمت على وش اللي جاي يتكلم .. الخلاصة ان فكرة في ذهن حضرتك تمنها يساوي صفر .. فكرة كتبتها على ورقة بقى تمنها تمن الورقة والقلم اللي اتكتبت بيه .. فكرة عملتها نموذج مصغر .. بايلوت يعني .. فرجنا يا سيدي .. فكرة عملتلها نموذج مصغر ومعاه نموذج عمل حانبتدي نسمع ونركز .. فكرة عملتتلها نموذج مصغر ونموذج عمل واثبت ان في ناس واقفه مستنياها تطلع .. ساعتها كل الفلوس اللي انت عايزها حاتتحط قدامك على الترابيزة من غير نقاش .. ادي الحدوتة!!
ريادة الاعمال وحب الوطن .. حقيقة جه وقتها فعلا .. دور الابتكار وريادة الاعمال في حب الوطن دور كبير .. ساعات الواحد بيجيله حالة من المنتال بلوك .. ايوه ده غير البلوك بتاع الفيس بوك والواتس اب والانستجرام .. تلاقوا الواحد مخه طافي .. مش شغالي .. عادي على فكرة الناس الطبيعية كده .. ساعات ناس كتير بتكون عايزة تدور على شغل تاني .. مثلا تلاقي دكتور سنان او حد صيدلي او علوم زهق وعايز يدور على شغلانه تانية .. الحقيقة هوه بيدور على الحاجه اللي فيها الشغف بتاعه .. مش لاقي نفسه في اللي بيعمله .. وهنا يجي دور ازاي نلاقي الحاجة اللي بنحبها .. سؤال صعب .. لازم أصلا في الأول تبقى عارفك نفسك الأول وبعدين ندور بنحب ايه ومابنحبش ايه .. من وجهة نظري جرب .. جرب .. جرب .. والجميل ان مافيش حاجة اسمها خسارة .. لان العقلية الإيجابية هي اللي بتقدر تحول كل حاجة حوليها لشيء إيجابي مهما كان يبان انه سلبي .. في مثال بقوله دايما على العقلية الإيجابية .. توماس ايديسون .. لما توصل للمصباح الكهربي .. قال جملة لطيفة جدا بس الأول قعد هوه والفريق بتاعه يجربوا محاولات قد ايه؟ قعدوا يجربوا 1300 مره .. وهنا قال جملته الشهيرة .. انا مافشلتش 1300 مرة .. انا لاقيت 1300 طريقة ماينفش يتعمل بيها المصباح الكهربي ولكن الطريقة رقم 1301 هي اللي نفعت … يا صبر أيوب!!! مين يستحمل يقعد يجرب حاجه 1300 مرة علشان يوصل للنتيجة الصح .. حانستحمل لما يكون عندا الفكر الريادي والعقلية الريادية .. مش اننا ناخد الحاجة من فوق الوش ..
ريادة الاعمال وحب الوطن .. على مدار الاسبوعيين اللي فاتوا كنت باشوف ايه اللي بيدور حولينا .. لاقيت حاجات كتير حلوة .. حاجة منهم كلمة سيادة الرئيس محدش حايقدر يمس نقطة ميه من النيل بس انا مابتكلمش كتير .. فعلا .. اللي بيشتغل مابيتكلمش .. الفترة اللي فاتت كان في كذا نقطة انطلاق بس اللي يقرأ ويفكر ويذاكر .. عارفين .. حاجه على الماشي .. لسه باشوف بوست لحد اعرفه في مجال الموارد البشرية والبوست بيتكلم عن موضوع غريب مالوش صلة بيه أصلا .. استغربت منه اوي .. تحس كده انه البوست معمول علشان نمشي مع الرايجه زي ما بيقولوا .. فا كنت باتكلم مع صديق ليا على البوست ده .. لاقيته بيقولي تصور فلان ده أصلا مكلمني علشان عايز يشتغل!!! هوه في ايه يا جماعه!!! طب وحياتكم ما ننساش نشترك في القناة ونفعل زر الجرس وفضلا وليس امرا !!! حاجة صعبة الصراحة وربنا يدي كل واحد على قد نيته فعلا … اصل في ناس بتقعد تفتي وخصوصا في التكنولوجيا وهما مالهومش فيها أصلا .. أي كلام في أي كلام
ريادة الاعمال وحب الوطن .. الأيام اللي فاتت كان في جايزة ريادة الاعمال .. وكان في حفل توزيع الجوايز في الهرم وحضره شخصيات عامة ووزرا .. حاجه شكلها مبهج .. إعادة بناء الصورة الذهنية .. عايزيين حاجات شكلها حلو .. بس برضه ما ننساش اننا نعمم الصورة الحلوة دي على اقل نقطة موجودة .. اصل ريادة الاعمال مش بس الشياكة والستايل .. ريادة الاعمال تعب وسهر وشغف وجد واجتهاد
ريادة الاعمال وحب الوطن .. الأيام اللي جاية حايكون في أنشطة كتيرة لريادة الاعمال واليوم الوطني لريادة الاعمال .. وده بيفكرني لما كنا بنطلق مسابقة NU100 سنة 2013 .. وساعتها رحت مشغل اغنية .. علشان لازم نكون مع بعض .. كانت بتعبر فعلا على اللي احنا عايزيين نعمله .. والحمد لله عملناه
ريادة الاعمال وحب الوطن .. ما ننساش .. حب الوطن محتاج شغل من نار .. مش كلام وخلاص .. كل ما يعطلوك اشتغل اكتر .. علشان هي احلى اسم في الوجود .. اسم مليان في القلوب .. وكلنا عايزيين نقولها بصوت حسين الجاسمي.. بنحبك وحشتينا .. علشان يبقى الأثر من اجل حياة كريمة استعدادا للجمهورية الجديدة
