أيام جميلة ولحظات ممتعة بنعيشها الأيام دي .. كل سنة واهل مصر كلها بخير وصحة وسعادة .. ساعات قليلة وكل اهل مصر يفطروا .. نصنا فطر من كام يوم والنص تاني خلاص كلها كام ساعة .. حقيقي شهر ابريل السنة دي ليه طابع غريب اوي .. كله مناسبات واحتفالات دينية وروحانية واسرية من مزيج وسحر وطابع خاص .. طابع اهل مصر
فطار الاسرة المصرية .. اللي فيكم كان متابع اليومين اللي فاتوا وبالتحديد يوم الثلاثاء اللي فات كان فطار الاسرة المصرية ودي مناسبة حرص سيادة الرئيس انه يرسخها في اذهانا من كذا سنة .. في كل لقاءات سيادته مستوى الصراحة بيكون عالي جدا من غير أي تزويق او تجميل ودايما بيحارب نظرية “كله تمام يا فندم” .. انما الجديد السنة دي هو كلمة سيادته وفيها رسايل كتيرة جدا جدا جدا .. لازم الناس تتحرك على طول مباشرة وبقوة لان في إرادة داعمة .. تعالوا نشوف الحاجات اللي تخصنا في مجال الابتكار وريادة الاعمال والتكنولوجيا
فطار الاسرة المصرية .. كلمة سيادته اشتملت على اكتر من عشر محاور او توجيهات او نقدر نقول إشارة البداية لحاجات مهمة .. تعالوا نشوف ايه اللي ممكن نعمله فيها .. يالا بينا .ز بس خليني فيا الأول أوجه الشكر والتقدير لفريق عمل الموقع لانهم تقريبا كانوا اول من عمل تغطيه للمحاور ونشرها فور انتهاء كلمة سيادته .. شكرا لفريق العمل المتميز
فطار الاسرة المصرية .. تكليف الحكومة بعقد مؤتمر صحفي عالمي لإعلان خطة الدولة المصرية للتعامل مع الأزمة الاقتصادية العالمية .. مؤتمر صحفي اوكي .. انما عالمي دي ليها وزن كبير وخصوصا اننا مش قوليليين .. ما ننساش ان مصر رئيس الكوميسا دلوقتي .. طبعا لو بنتكلم عن ريادة الاعمال والابتكار ومدى تأثرهم وتأثيرهم في ظل التحديات فا يا ريت لو يتم القاء الضوء على مناخ أداء الاعمال وازاي تكون محفزة لرواد الاعمال .. مش سهلة بس مش مستحيلة .. طبعا مافيش شك ان في دور كبير جدا على فكرة التصدير .. ويمكن من كام يوم وزارة الصناعة طلعت انفوجرافيك بيحكي عن تطور الصادرات المصرية خلال 2022 وكمان نمو صادرات 11 قطاع تصديري ونسبة النمو ده .. طبعا وزارة التخطيط والتنمية الاقتصادية ليها دور فعال في دعم الاقتصاد والتصدير وتحفيزه في جميع المجالات .. ماهو مافيش حل تاني
فطار الاسرة المصرية .. تكليف الحكومة وكافة الأجهزة المعنية بتعزيز كافة أوجه الدعم المقدم لمزارعي القمح في مصر وذلك بزيادة المحفزات المقدمة للمزارعين سواء كانت مادية أو خدمية، بما يحقق زيادة في الاكتفاء الذاتي من القمح .. ملف الزراعة مهم مهم جدا .. ويمكن شوفنا على مدار الفترة اللي فاتت مشروعات قومية زي فكرة تبطين الترع لاعادة بناء الهوية البصرية للفلاح المصري .. وكمان كارت الفلاح وكمان برامج الاحتضان المختلفة في مجال الزراعة .ز ولو تفتكروا في تنمية وتطوير الأسبوع اللي فات لسه متكلميين عن ده .. القصد هنا هوه قدرتنا على امتلاك التكنولوجيا والمعرفة .. نوليدج از باور ..
فطار الاسرة المصرية .. المرحلة القادمة ستشهد دعماً مضاعفاً للقطاع الخاص للاضطلاع بدوره في تنمية الاقتصاد وأنني سأضع كافة الإمكانيات الممكنة لتوفير البيئة اللازمة لتحقيق ذلك .. يمكن اتكلمنا قبل كده عن ال Public Private Partnership (PPP) .. اللي هي الشراكة بين القطاع العام والخاص .. طب يا ترى أصحاب المشروعات الناشئة ومتناهية الصغر والصغيرة حايكون ليهم دور في المعادلة .. بالمناسبة الدول المتقدمة نسبة مساهمة المشروعات الصغيرة والمتوسطة في بناء الاقتصاد تزيد عن 60% او أحيانا 70% .. فا دي قوة لا يجب الاستهانة بها .. مرة تانية .. التصدير حتمي وكمان في انفوجرافيك بتاع وزارة الصناعة بيتكلم عن الأسواق المستقبلة للصادرات المصرية .. فرصة ورا التانية يالا بينا
فطار الاسرة المصرية .. إطلاق مبادرة لدعم وتوطين الصناعات الوطنية للاعتماد على المنتج المحلي، وذلك من خلال تعزيز دور القطاع الخاص في توسيع القاعدة الصناعية للصناعات الكبرى والمتوسطة .. دي بقى انا شايفها من اهم المحاور ان ماكنتش الأهم على الاطلاق في كلمة سيادته واللي بتتعلق بالابتكار وريادة الاعمال والتكنولوجيا .. انا أتذكر سنة 2016 لما روحت للبنك المركزي وقابلت الأستاذة لبنى هلال نائب محافظ البنك المركزي وان ازاي اقدر ادعم مبادرة ال 200 مليار بتاعت البنك المركزي وعرضت عليها فكرة مبادرة رواد النيل .. كان كلامها هوه ان من أولويات البنك المركزي: الصناعة .. الزراعة .. إحلال الواردات .. الشباب .. الصعيد .. ومن هنا لما عملت رواد النيل كان في جزء مهم جدا هوه ازاي نقدر نعمل إحلال للواردات .. ومن احد المكونات بتاعت رواد النيل كان بيت التصميم .. اللي حايساعد في المحور ده .. عارفين؟ احنا كان قدامنا فرص ذهبية علشان موضوع إحلال الواردات وده انا قولته من ساعتها .. كان عندنا فرصة التعويم اللي حصل زمان .. كان عندنا فرصة الكورونا .. ودلوقتي عندنا فرصة اكبر واكبر .. مش عايزيينها تضيع دي كمان .. يا ريت وزارة الصناعة واتحاد الصناعات تاخد خطوة جادية في الملف ده … كان زمان في الخريطة الاستثمارية الصناعية بتاعت وزارة الصناعة .. مش عايز أتكلم عن ارقام الاستيراد لمستلزمات الإنتاج بملايين الدولارات ان ماكنش مليارات .. والحقيقة في حاجات كتير ممكن تتعمل بالمكونات المحلية .. محتاجه شغل وشغل من نار .. كمان هيئة المواصفات القياسية المصرية ليها دور حيوي جدا دلوقتي كمان .. الملف ده يجب ادارته باحترافية شديدة جدا .. علشان دي اول خطوات للتصدير
فطار الاسرة المصرية .. تكليف إدارة المؤتمر الوطني للشباب بالتنسيق مع كافة التيارات السياسية الحزبية والشبابية لإدارة حوار سياسي حول أولويات العمل الوطني خلال المرحلة الراهنة ورفع نتائج هذا الحوار إلى سيادته شخصياً، مع وعده بحضور المراحل النهائية منها .. السؤال بقى .. هل كلنا عارفين ايه هي أولويات العمل الوطني في الفترة دي؟ من وجهة نظري ان حياة كريمة والجمهورية الجديدة هي الأولوية لان ده متقال في رؤية مصر 2030 .. كمان إعادة رسم الصورة الذهنية لكل حاجة وكنا قبل كده اتكلمنا على فكرة سوشياليستا والبراندنج فاكرين
فطار الاسرة المصرية .. تكليف الحكومة بطرح رؤية متكاملة للنهوض بالبورصة المصرية .. مش بس كده انما كمان .. تكليف الحكومة بالبدء في طرح حصص من شركات مملوكة للدولة في البورصة المصرية .. وكمان تكليف الحكومة بطرح شركات مملوكة للقوات المسلحة في البورصة قبل نهاية العام الحالي .. كلنا تابعنا اللي حصل مع سويفل واطلاقهم من البورصة واتكلمنا قبل كده عن البورصة ودي خطوة مهمة في رحلة حياة المشروعات الناشئة والصغيرة والمتوسطة .. البورصة والاتجاه للعالمية .. طبعا علشان الشركات تنزل البورصة محتاجه اعداد كويس وهيكلة والاعتماد على التكنولوجيا في المقام الأول .. خطوة رائعة وطبعا دور هيئة الرقابة المالية مهم في الاعداد الجيد .. ما ننساش .. في مؤتمر صحفي عالمي حايتعمل مش هزار .. ولا ايه!!
فطار الاسرة المصرية .. الرئيس السيسي يوجه باستكمال سداد المديونية الخاصة لعدد من الغارمين والغارمات .. هنا بقى مهم اوي نشوف ريادة الاعمال المجتمعية والابتكار المجتمعي .. ازاي نقدر بعد سداد الديون دي اننا نوجه الغارمين والغارمات انه يفكروا بشكل مختلف علشان مايرجعوش تاني للموضوع ده .. ياترى فين الشباب والأفكار الجميلة اللي تخدم المحور ده .. طبعا دي بالمناسبة ممكن يكون ليها حل باستخدام التكنولوجيا المالية وفكرة الشمول الرقمي والمالي .. يالا يا ابطال
فطار الاسرة المصرية .. خلاص كلها ساعات ونقول لكل مصر كل عيد واحنا طيبيين اسرة واحدة وشمل واحد علشان دايما يبقى الأثر
اقرأ ايضا للكاتب
