اهلا بيكم اصدقائي وكل سنة وانتم ومصر كلها طيبة وبخير وسعادة .. السعادة اختيار .. فا لازم تاخد القرار .. النهاردة العاشر من رمضان .. يوم النصر .. يوم الريادة .. يوم العزة والكرامة .. اليوم اللي الاختيار فيه كان قرار مالوش رجوع .. الكلام اخدنا .. حقيقي عايز اقولكم كلام كتير اوي .. عاملين ايه في الصيام .. طب عاملين ايه في الحر؟ على فكرة المسلمين والمسيحيين صايمين ..
الاختيار قرار .. اكيد العنوان ده ممكن يرتبط في ذهننا بأبطال الاختيار .. بس خلونا زي ما اتعودنا اننا بنتناول الموضوع من وجهة نظر ريادة الاعمال والابتكار والتكنولوجيا .. هل العدسة حاتورينا حاجه مختلفة المره دي ولا ايه ..
الاختيار قرار .. دايما كده كنت بسأل في محاضراتي او لقاءاتي عن ايه اخر قرار انتم اخدتوه .. واسكت شوية في انتظار الاجابة .. الحقيقة بلالقي صمت رهيب .. تفكير عميق .. حقيقي مش عارف ده تفكير ولا الناس بتحاول تفتكر هوه في ايه .. مين طفا النور .. المهم باسمع كلام حلو اوي .. اللي يقولي اخر قرار اخدته هوه اني اشتري حاجة مثلا .. حلو جدا .. طب حضرتك اخدتي القرار ده امتى؟ اسمع بقى احلى اجابه من اول: يعني مش فاكرة .. لحد واحنا طالعين لحد ما نوصل الى: من 6 او 7 شهور فاتو .. ياااااااااااه بس!! من ساعتها ايه؟؟ مافيش؟؟ شلنا الفيشة؟
الاختيار قرار .. النهاردة حانتكلم عن صناعة واتخاذ القرار .. لو رجعنا للعلم وسألنا العلماء عن ده يا ترى حايقولوا ايه؟ لما سألت لاستاذ الدكتور عمرو سليمان استاذ الطب النفسي وعلوم الاعصاب المعرفية .. قالي حاجة ظريفة اوي .. ان عملية صنع واتخاذ القرار دي وظائف من وظائف المخ .. في جزء في المخ مسؤول عن صنع واتخاذ القرار .. وبالتالي قرار الواحد واختياراته جزء من عقله وشخصيته وتكوينه .. الله يرحمه ابويا كان دايما بيقول: قسمتك في عقلك ..
الاختيار قرار .. يعني ايه .. ليه .. امتى .. فين .. مين .. ازاي .. كل ده اسئلة لازم نحطها قدام عينينا واحنا بتاكلم عن الاختيار واتخاذ قرار .. طيب .. يعني ايه قرار .. وازاي احدد الاختيار .. تعالوا نشوف مع بعض ..
الاختيار قرار .. في الاصل بيكون كل حد فينا موجود في حاله معنية او موقف معين او وضع معين .. وفي حالة او موقف او وضع عايز اوصل ليه .. والوضع والحالة الجديدة مختلفة عن الوضع الحالي .. يعني في فرق .. الفرق ده بنسميه فجوة او Gap”” واحيانا كتير على ال “Gap” انها “Problem” .. وكلمة بروبليم هنا على تعني مشكلة ولكن مسأله عايزة تتحل .. يالا علشان الناس اللي بتحب تشغل مخها او بتحب الهندسة عايزينهم يحلوا المسألة دي .. فا مثلا .. احنا في نقطة “س” وعايزيين لنقطة “ص” وفي فجوة او فرق بين “س” و “ص” .. ممكن “ص” تكون اعلى من “س” .. او “ص” اقل من “س” .. او “ص” على نفس مستوى “س” بس في برضه فجوة .. فا عايزيين نوصل من “س” الى “ص” .. نعمل ايه؟ ها؟ نعمل ايه؟ اولا .. لازم نبقى عارفين “س” كويس ومذاكريين احنا فين كويس وكويس جدا كمان .. في ادوات كتير بتساعدنا علشان نعرف احنا فين من جوانا ومن برانا .. اللي حابب يعرف اكتر عن الادوات دي يبعتلي وانا اقوله ..
الاختيار قرار .. المهم .. عرفنا احنا فين كويس .. سهلة .. عارف ايه اللي في ايدك وتحت سيطرتك وامكانياتك .. وعارف اللي حوليك كويس يبقى نقدر دلوقتي نرسم كل المسارات اللي ممكن توصلنا من “س” الى “ص” .. وهنا تيجي حتة الاختيار ..
الاختيار قرار .. بنقول ان القرار هو عملية الاختيار ما بين البدائل .. وطالما في بدايل .. والبدايل دي مقترحة .. يعني مش مؤكده .. فيها نسبة من عدم اليقين .. ساعتها بتظهر حاجة تانية اسمها ال “Risk” … وقولنا قبل كده انه ايه؟ الريسك يحب الخفية وان الريسك على االله .. بالمناسبة .. قدرة كل واحد فينا انه ياخد الريسك ويتحمل تبعاته دي برضه طلعت وظيفة من وظائف المخ .. العلم ده بحر مالوش اخر
الاختيار قرار .. طيب انهي طريق حانمشي فيه؟ لازم يكون في معايير معينة اللي بيها نقدر نشوف البدايل اللي عندنا بتحققها باكتر نسبة ممكنه .. عمر ما حد حايعرف ياخد كل حاجة .. يعني عمر ما حد حايكون بيشتغل في شركة وبياخد 100 الف جنيه مرتب في الشهر وساكن في الدور التالت والشركة في الدور التاني ومواعيد الشغل من الساعة 10 الصبح للساعة 11 صباحا .. افتكروا كويس البؤ ده: نو فري لانش .. يعني مافيش حاجة ببلاش .. وعلى رأي فناننا العظيم سمير غانم الله يرحمه .. اظبط البنطلون الجاكته تضرب يا لينا ..
الاختيار قرار .. لما نيجي نحط المعايير .. لا تبقى كتييييرة اوي .. ولا تبقى قليلة اوي .. يعني لو حانختار وظيفة مثلا .. مايبقاش بس عنصر المرتب هوه الوحيد اللي بيه بتاخد القرار .. لو بتشوفوا عرايس وعرسان .. تلاقي الناس تقولك الكيميا يا ماما .. هوه مش الكيميا بس .. كيميا وفيزيا واحياء كمان .. كله كوم والاكل كوم .. اللي يقولك اصلي انا متعود اكل السوشي .. او اكل بيض سبانش على الفطار .. وتيجي الحاجه تقولك .. سبانش ده يطلع ايه؟ اديله في الملخبط!!
الاختيار قرار .. طيب البدايل هي كمان لا تبقى كتييييره اوي .. ولا قليلة اوي .. على فكرة .. افتكروا دي … لما تعوز تحيرة خيرة .. يالا بالشفا .. ربنا معاه .. علشان تلاقي البدايل لازم نكون عامليين الواجب اللي علينا كويس ومذاكرين كويس علشان لما نعمل التقييم يبقى تقييم موحد .. لما نيجي نقارن نقارن ابل تو ابل .. يعني نقارن حادات شبه بعض او قريبه من بعض .. مش كده ولا ايه
الاختيار قرار .. المهم بقى … لما توصل لاحسن بديل .. لازم تحط التوقيت الزمني والتاريخ على الحل اللي اختارته .. علشان ايه لازم كده؟ ايون .. علشان القرار لما اتعمل كانت دي البدايل المتاحة ودي عناصر التقييم ودي منهجية المقارنة .. تمام كده؟
الاختيار قرار .. يالا تيجي تنفذ الحل ده .. فا تلاقي الواقع مختلف عن اللي كنت متخيلة .. ده بيحصل لما مانكنش مذاكريين اول بي اول .. طيب نعمل ايه؟ يا نرجع نذاكر سريعا سريعا علشان عنصر الوقت مهم .. يا نشوف البديل التاني طالما الاول مانفعش لسبب او لاخر
الاختيار قرار .. طب امال فين حته .. استفتي قلبك لو افتوك دي؟ موجوده .. شوف القرار اللي وصلتله من شويه .. مريحك نفسيا ولا في شويه قلق؟ اهوه هنا تيجي حته القلب .. حلو كده
الاختيار قرار .. العلم بيقولنا ايه بقى؟ بيقولنا ان في حاجة اسمها اخطاء التفكير .. او ال Thinking Errors .. وكمان عندنا حاجة اسمها الاطاء والانحياز .. او ال Biases and Errors .. دوروا عليهم ونتكلم عنهم الرات اللي جاية
الاختيار قرار .. ما تنسوش .. الاختيار قرار .. علشان يبقى الاثر .. صوما مقبولا وافطارا شهيا .. ونلتقى على خير مع الاختيار قرار ..
