اهلا رمضان .. اهلا بحضراتكم وكل رمضان ومصر كلها بخير وصحة وسعادة حقيقي الشهر ده رمضان ومعاه ابريل هوه شهر مصر .. في ابريل السنة دي مصر كلها بتحتفل بمجموعة احتفالات مع بعض .. اليوم العالمي للابتكار .. اوعى بقى .. عيد تحرير سيناء الغالية .. شم النسيم .. عيد القيامة .. العشر الاواخر من رمضان ونختتم ببدايات الاستعداد لعيد الفطر .. ظاهرة جميلة مش موجودة غير في مصر … مصر ام الدنيا وقد الدنيا
كل رمضان وفريق عمل الموقع بخير وسعادة وبأهنيهم على العمل الجبار اللي بيعملوه .. حقيقي ستارت أب بمعنى الكلمة .. الأسبوع ده ولحد دقايق من كتابة المقال في احداث كتير حصلت في مجال الابتكار والتكنولوجيا وريادة الاعمال .. يالا نشوف شوية منها؟ يالا بينا ..
امبارح كان الحدث الأكبر والفريد من نوعه .. شباب سويفل .. مصطفى قنديل .. مؤسس سويفل .. الشركة المصرية الناشئة اللي عمرها يادوبك 5 سنين .. امبارح مصطفى كان في بورصة ناسداك الامريكية .. واحده من اهم البورصات العالمية .. مصطفى واقف وحش والناس كلها بتسمع وبتتفرج عليه .. حقيقي مش الناس .. العالم كله .. عالم التكنولوجيا والمال والاعمال .. شركة سويفل بكده اول شركه يونيكورن تيجي من العالم العربي ومن مصر في مجال التكنولوجيا وتدخل بورصة ناسداك .. طيب يعني ايه يونيكورن؟ يعني ببساطة رأس مالها يتخطى المليار دولار .. وطبعا كان من مصر فريق من الدكتورة هالة السعيد وزيرة التخطيط والتنمية الاقتصادية والسفيرة نبيلة مكرم كانوا بيتابعوا الحدث عبر الفيديوكونفرنس من مقر البورصة المصرية .. ايوه بقى .. الى الامام دائما ..
أحيانا كتير اوي يمكن بقالي اكتر من 15 سنه لما باحكي عن رواد الاعمال ومصادر التمويل او ال exit strategy .. استراتيجية التخارج، كنت باتكلم عن التداول في البورصة او اللي بنقول عليه IPO .. يعني Initial Public Offering .. اللي هوه ببساطة ان الشركة تتحول من مجرد فكرة الملكية الخاصة الي الملكية العامة وتتطرح في البورصة وتقدر الناس عامة تاخد اسهم فيها .. طبعا علشان تتطرح في البورصة ده مش امر سهل محتاجين يكون في ترتيبات وتجهيزات كتيرة اوي وتوفيق أوضاع والاهم من كده الحوكمة وكمان الأهم والاهم بالنسبة ليا انهم يقدموا قيمة بجد مش بس فقاعة صابون .. ربنا يوفق كل شبابنا يا رب للخطوة دي
كمان لو بصينا على الجولات التمويلية للستارت ابس اللي في الفترة اللي فاتت حانلاقي حاده بجد تفرح .. شركات كتير ابتدت تاخد استثمارات بالدولار وبالست ارقام .. ده ان دل على شيء فا يدل اننا ابتدينا نعرف الجيم بيتلعب ازاي .. مش بس كده .. انما بنتمرن صح وبنجيب اجوال .. لان مافيش مستثمر حايحط فلوسه في شركه ناشئة علشان دي فلوس صدقة او زكاة .. نعرف أصول اللعب ونلعب .. فاكريين كنت عملت وبينار وكانت ضيفه معايا نادية جمال اللي عملت راحة بالي .. ونادية حكت قصتها ان المستثمريين هما اللي جريوا وراها مش العكس!! شوفتوا بقى!! لما بنكون بنعمل حاجه حلوة ومتمرنين كويس وبنلعب بروح بنجيب جوول
امبارح الخميس كان في معرض السيارات الكهربية محلية الصنع بين الجامعات واللي اتعملت في شرم الشيخ .. حقيقي مجهود جميل جدا جدا جدا من وزارة التعليم العالي والبحث العلمي .. زي ما بقول دايما النجاح ليه 100 اب .. ممتاز ممتاز .. مش عايز أقول غير شكرا لكل واحد مهما كان دوره صغير انه كان مسؤول عن النجاح ده .. مبروك للفرق الفايزة .. الظريف انه الفايزين جامعات فنية في المقام الأول .. ودهمهم اوي في إعادة رسم الصورة الذهنية للجامعات والتخصصات المطلوبة للمستقبل .. طيب جميل جدا اننا نبتدي نتحرك في اتجاه امتلاك التكنولوجيا .. حاتيجي واحدة واحدة .. امتلاك التكنولوجيا هوه الحل … مافيش حل تاني غير اننا نشمر ويالا
في نفس اليوم نسمع عن متسلقة الجبال المصرية منال رستم اللي رفعت علم مصر على قمتين في جبال الهيمالايا .. القمتين دول على ارتفاع اكتر من 5500 متر فوق سطح البحر .. مصر ام الدنيا وقد الدنيا .. منال اشتغلت في هدوء .. هوس هوس .. من غير ما حد يعرف وراحت رفعت علم مصر .. منال في زيها كتير .. يالا نركز ونشتغل في هدوء ونخللي النجاح بتاعنا هوه اللي يعمل الدوشة .. بلاش نكون عملين زي البرميل الفاضي .. البرميل الفاضي هوه اللي بنخبط فيه يعمل دوشه .. على رأي صديقتي دكتورة نفين نخلة هي دايما تقول كده
قبلهم كان في مسابقات كتير بتسلم جوايز .. ستارت اب فاكتوري بني سويف .. وكمان مؤتمر قمة تكني كايرو .. وقبلهم هاكاثون مصر 2030 .. شباب يملى الدنيا طاقة ونشاط … ولسه ولسه .. اللي جاي كمان اجمل
سمعنا كمان عن الوديعة السعودية اللي قدرها 5 مليار جنيه اللي اتحطت في خزانة البنك المركزي .. يعني الدول بتستثمر في مصر .. وشوفنا الدكتورة هالة السعيد نيابة عن الحكومة المصرية انها بتوقع على الاتفاقية بين مصر والسعودية واللي بتتكلم عن استثمارات صندوق الاستثمارات العامة السعودي من خلال صندوق مصر السيادي علشان توطين التكنولوجيا .. يا ترى هل في نصيب لريادة الاعمال والابتكار في التخطيط مجال هذه الاتفاقيات؟
اهلا رمضان .. عايزيين نشوف أنشطة كتيرة لرواد الاعمال ولكل اللي بيدعموا ريادة الاعمال في مصر .. كلمة السر هي امتلاك التكنولوجيا .. كل سنة وحضراتكم بخير .. يالا استعدوا لدخول الشهر الكريم .. ضيف خفيف على القلب .. صوما مقبولا وافطارا شهيا … صحيح .. مش عايزيين نفطر مره مع بعض؟ حد عنده اقتراح؟؟ .. اهلا رمضان ويبقى الأثر ..
اقرأ ايضا للكاتب
