اهلا بيكم أصدقائي وكل سنة وأنتم ومصر كلها طيبة وبخير وسعادة ، عندنا كلام كتير وموضوعات كتير كلها بتدور حولين فكرة الابتكار وريادة الاعمال زي ما احنا متعودين .. أولا بس خلينا نعيد على كل اهل مصر بمناسبة الأيام الجميلة اللي بنعيشها واننا نسيج واحد عمره ما ينفصل .. أيام ونفحات واعياد يا رب يكتر افرحنا وعلى قد نيتنا ادينا ..
الابتكار تنمية وتطوير وحصاد .. الحقيقة على مدار الأسبوع ونص اللي فاتو كان في كمية أنشطة لريادة الاعمال والابتكار بس في صورة جديدة .. صورة فطار وسحور .. بس مش ده المهم .. المهم هوه ايه اللي حصل .. اللي حصل هوه الحصاد
الابتكار تنمية وتطوير وحصاد .. زي ما احنا بنتكلم دايما ان اهم حاجه في عملية الابتكار او ريادة الاعمال هي القيمة المضافة .. وشرح كلمة القيمة المضافة كان مش سهل قبل الكورونا ولكن اثناء وبعد الكورونا ابتدينا ندرك يعني ايه قيمة مضافة .. يعني من الاخر كده المنفعة اللي حاتعود علينا .. من ابسط حاجه لان الابتكار بيدور حولين اننا نعمل تغيير أيا كان شكله او صوره .. علشان كده مهم نتكلم عن سلسلة القيمة (Value Chain) ونفتكرها مرة تانيه .. سلسلة القيمة فيها ثلاث مكونات رئيسية .. بتبتدي بي: تكوين القيمة (Value Creation) ثم ادراك القيمة (Value Perception) وفي الاخر حصاد القيمة (Value Harvesting) .. فمثلا تعالوا نتخيل مع بعض .. حد مثلا في الطريق وعنده مشكلة في عربيته مثلا لا قدر الله في الكاوتش بتاعها في طريق صعب .. فا لو معاه اداه تقدر تساعده ساعتها .. الاداه دي حاتكون بمثابة الإنقاذ للشخص ده .. علشان كده دايما بانصح الشباب انه ازاي تخلوا التطبيقات او الحاجات الرائعة اللي بتعملوها تكون أساسية في حياة الناس مش رفاهية .. مثلا شوفنا تطبيقات كتير لشباب عن فكرة الونش اللي على الدائري .. تمام جدا رائع .. بس هوه كام مره الواحد عربيته وقفت منه على الدائري؟ وبالتالي حافتح واستخدم التطبيق ده كل قد ايه؟
الابتكار تنمية وتطوير وحصاد .. على مدار العشر الأيام اللي فاتت وحقيقي باشكر كل اللي بعتلي بيسأل هوه فين المقال ليه ما نزلش .. حقيقي كنت مستني كذا حاجة .. منها ان يوم 21 ابريل هوه اليوم العالمي للابتكار .. وان يوم 22 ابريل 22 ده اليوم المميز للمكنز زي ما حضراتكم عارفين وكمان هوه يوم الدولي للأرض .. انما الأهم ان اليومين دول كانوا أيام الحصاد .. حصاد ايه وبتاع ايه؟ حصاد سنوات فاتت من الجد والاجتهاد والتعب والسهر في هدوء شديد .. شفنا حصاد القمح في توشكى .. ما شاء الله ربنا يزيد ويبارك
الابتكار تنمية وتطوير وحصاد .. عايز اكلكم عن برنامج تنمية وتطوير .. ايوه في حاجه اسمها كده .. برنامج طموح فيه شركاء نجاح كتير .. برنامج الشراكة الدنماركية العربية .. بنك التنمية الافريقي .. واللي بتنفذه اكاديمية البحث العلمي والتكنولوجيا من خلال شركاء نجاح محليين .. البرنامج ده بيدعم منظومة ريادة الاعمال في مصر وتمكين الشباب والمرأة وخصوصا في الصعيد في قطاعات الاعمال التجارية الزراعية .. اعمال البيئة النظيفة والخضراء وكمان الصناعات الإبداعية والحرف اليدوية والفنون المسرحية ..
الابتكار تنمية وتطوير وحصاد .. البرنامج بيحتوي على عشر برامج احتضان وتسريع اعمال ومخطط امه يكون 480 شركة ناشئة … تمام .. بس المهم بقى هو الشركات دي فين؟ في الصعيد والوادي الجديد في الأساسي وباقي المحافظات طبعا .. يمكن هنا جه دور الحصاد .. كان تقريبا كل يومين لتلاته بنجني المحصول .. محصول الشركات الناشئة .. حاجه تفرح بجد .. لما تشوفوا الصور حاتعرفوا انه المشروع رائع .. شركات ناشئة في أماكن ماكناش متخيلين ان حايكون فيها الفكر ده .. حقيقي الناس اللي اشتغلت على المشروع بيتكلموا عن الوادي الجديد … عن سيوة .. والواحات .. انا الحقيقة ما حصليش الشرف اني اروح هناك بس طبعا الصعيد لفيته كله .. بس الوادي الجديد حاجه تانية .. كل واحد اقابلة يقولي ماكنتش عايز ارجع القاهرة!!! وااااااااااااو .. ما تيجوا نطلع طلعة نبص بصه ..
الابتكار تنمية وتطوير وحصاد .. حاتشوفوا في الصور اللي على الفيس بوك مقتطفات من الشركات والمنتجات والشباب اللي زي الورد ما شاء الله .. المهم نكمل .. كلنا شايفيين الظروف اللي العالم كله بيعدي بيها ولكن زي ما دايما سيادة الرئيس بيقول: كل ما يضايقوك اشتغل اكتر .. مالهاش حل تاني … كل ما بتطلع مشاكل لازم نفكر بأسلوب غير نمطي وغير تقليدي .. في حاجات حانقدر تغلب عليها .. في حاجات خارج نطاق تصرفنا بس القصد لازم نشتغل .. لازم نبتكر
الابتكار تنمية وتطوير وحصاد .. مش حاتكلم عن الجوايز المالية .. لان في شركات اخدت مبالغ تتراوح من 20 الى 50 الف يورو .. على فكرة بس .. عمر الفلوس ما كانت بتكفي .. اللي بينفع بجد ويخللي الشركات دي تكمل هي الناس اللي فيها .. القيمة اللي بيدوها .. العلم اللي بيخدوه .. يا ترى بقى الشركات دي حاتقدر تضيف ايه لنفسها واللي حوليها وللبلد؟ هل حاتقدر تكون بتعمل حاجة اسمها (Learning Organization) يعني بتتعلم وتعلم ولا ايه؟
الابتكار تنمية وتطوير وحصاد .. يمكن انا شاركت في البرنامج ده اول لما طلع اثناء فترة الكورونا .. مرحلة صعبة جدا في حياة الكون كله .. شاركت مع زملائي في اكاديمية البحث العلمي في اختيار فريق العمل .. الحقيقي احب اشكر كل واحد شارك وساهم في العمل الرائع ده .. دكتور محمود صقر رئيس أكاديمية البحث العلمي .. دكتور عمرو فاروق مساعد رئيس الاكاديمية .. دكتورة شيماء هلال .. دكتورة هالة الاحمدي .. انجي منيب الدينامو اللي ورا الشغل .. كمان كل المقييمين والموجهيين والاستشاريين اللي اشتغلوا في البرنامج .. دكتورة شيرين علام .. داليا السعيد .. وغيرهم وغيرهم من الناس اللي هما في الأساس سبب أي نجاح لانهم اشتغلوا في ظروف صعبة جدا جدا جدا
الابتكار تنمية وتطوير وحصاد .. المهم دلوقتي .. ايه الخطوة اللي جاية .. الشركات دي حاتكمل ازاي .. فين قياس الأثر؟ فين تأثير ده على المؤشرات الدولية؟ وخلونا مرة نتكلم عن مؤشرات الأداء ومؤشرات النتائج … اصل في ساعات خلط بيحصل بين الاتنين .. كمان خلونا نفتكر رؤية مصر 2030 .. اقتصاد تنافسي عالمي متنوع قائم على الابتكار والمعرفة لجودة حياة المصريين
الابتكار تنمية وتطوير وحصاد .. طولت عليكم انا عارف بس حقيقي كان في حالة من الحصاد مصر بتجنيها فا كان لازم الواحد يشوف ويفكر علشان دايما يبقى الأثر .. وكل عام ونسيج مصر بخير .. صوما مقبولا وافطارا شهيا لكل اهل مصر
