اصدقائي واعزائي الغاليين .. اهلا بيكم .. كل سنة والمكنز مع الموقع بخير .. تمينا سنة مع الموقع وولعنا شمعة .. والموقع تم سنة ونص .. شغل وجد واجتهاد .. مبروك شمعة جديدة وعلامة فارقة في بناء الجمهورية الجديدة .. الحقيقة الفترة اللي فاتت كان شمع كتير اتنور .. احنا نورناه .. او حد نورهولنا .. المهم بقى تعالوا نشوف الشموع اللي اتنورت .. يا ترى كام شمعة؟ اتنين؟ ثلاثة؟ اكتر؟ حانشوف
شمعة جديدة .. كان عندنا تحدي كبير لرواد الاعمال والمشروعات الناشئة تمثلة في الاجراءات والخطوات اللي بيخدوها علشان يفتحوا شركات .. على الرغم من التعديلات الكتير اللي حصلت في السنين اللي فاتت انما لسه برضه .. بنسمع كتير من الشباب ان المستثمريين بيقولولهم سجلوا شركاتكم بره مصر .. اسهل واسرع و و و وغيره .. والشباب تحسه بين ناريين .. المهم .. سيادة الرئيس نور شمعة في الموضوع ده لما طلب بان يكون في فكرة الشركات الافتراضية وتتفعل بجد .. حضراتكم يمكن تكونوا سمعتوا عن قانون ١٥٢ بتاع المشروعات الصغيرة والمتوسطة .. القانون ده فيه كميه مميزات وحوافز .. بس علشان تحصل عليها لازم يكون في شركة .. وعلشان يكون في شركة لازم يكون في مقر .. وهكذا .. حانلاقي نفسنا بنلف في حلقة مش بتنتهي .. لحد ما سيادة الرئيس وجه بفكرة الشركات الافتراضية .. حقيقي .. دي نقلة حضارية غير مسبوقة ومثال واقعي للحلول الغير نمطية والغير تقليدية .. وحقيقي انا شايفها رسالة خطيرة للكل .. كعادته سيادة الرئيس بيدي الضوء الاخضرعلشان في ناس كتير بتخاف تتحرك في اتجاه الحلول الغير نمطية .. اهو جت من فوق .. برضه شوفنا وسمعنا التوجيهات الخاصة بعمليات الاستيراد وغيرها في الفترة اللي فاتت .. برضه جت من فوق .. بجد كل دي رسايل للناس ولمتخذي القرار انهم يتحركوا في الاساليب الغير نمطية وغير تقليدية علشان نتغلب على التحديات .ز بدل ما تيجي من فوق … المهم .. مبروك وشمعة جديدة
شمعة جديدة .. اشبال مصر الرقمية .. كلنا عارفين مصر الرقمية .. اللي هي بوابة التطبيقات والخدمات الحكومية الرقمية .. وكمان سمعنا عن مبادرة بناة مصر الرقمية .. اللي هي بتأهل الشباب المصري للحصول على درجة الماجستير في ٦ تخصصات من تخصصات التكنولوجيا الحديثة زي الذكاء الاصطناعي وغيرها من افضل الجامعات العالمية وهما قاعدين هنا في مصر .. سيادة الرئيس انار شمعة في الاستثمار في النشء والاشبال اللي لسه طالعين .. علشان يكون في عندنا مورد لا ينضب من الجدارات والكفاءات .. بنبتدي من البذرة .. صح كده .. مش لازم نستنى لما يكبروا ويتخرجوا علشان ياخدوا دراسات متميزة .. فكرة رعاية الموهوبين موجودة في بلاد كتير .. بس الشطارة في تفعيلها ازاي .. كان في مثال شبه كده في ماليزيا .. البنك المركزي هناك بياخد الطلبة المتميزيين في سنة ١٠ اللي هي توازي اولى ثانوي .. ويبتدوا يشركوهم في الحياة المصرفية كل واحد على حسب قدراته وجداراته .. عندنا كمان هنا في مصر صندوق رعاية الموهوبين وده تابع لوزارة التعليم العالي .. برضه الرئيس كان انار الشمعة بتاعته من كذا سنة .. لسه يادوبك ابتدى يعمل شغل قبل رمضان اللي فات دهعلى طول في صورة جولات في المحافظات علشان يعرف الناس بيه .. ربنا يوفق الشباب
شمعة جديدة .. التيكاثون وستارز .. المؤتمر الدولي لمراكز البيانات واللي افتتحه وزير الاتصالات واللي قال في كلمته شويه ارقام وبيانات عن التطور اللي حصل في مصر في مجال الاتصالات وتكنولوجيا المعلومات وكان الكلام ان صناعة مراكز البيانات هي مكون رئيسي لبناء مصر الرقمية. مش بس كده .. انما كمان اتمام تنفيذ مشروع لاقامة مسار معلوماتي مواز لطريق المرشدين وبدء العمل في الكابلين البحريين 2AFRICA و SEA-ME-WE-6 لنقل الحركة البينية بين الشرق والغرب وكمان زيادة محطات الإنزال على ساحلى البحر المتوسط والبحر الأحمر من ٦ محطات إنزال الي ١٠ محطات لنقل البيانات بين الشرق والغرب واستحداث ١٠ مسارات جديدة بين ساحلى البحرين لضمان استمرارية الشبكة التى تنقل البيانات بين الشرق للغرب .. وكمان استثمار ٢ مليار دولار لرفع كفاءة الإنترنت لتصبح مصر هى الأسرع فى أفريقيا فى الانترنت الثابت .. وعلشان مصر الرقمية تشتغل كويس .. تم ربط ١٨ ألف مبنى حكومى بشبكة الألياف الضوئية من إجمالى ٣٣ ألف مبنى حكومى على مستوى الجمهورية لتقديم الخدمات الحكومية المقدمة للمواطنين على نسق رقمى، كمان يتم تنفيذ مشروع لمد شبكة الألياف الضوئية لقرى مبادرة حياة كريمة بهدف تقديم خدمات إنترنت فائق السرعة لأكثر من ٣.٥ مليون منزل فى أكثر من ٤٥٠٠ قرية ضمن المراحل الثلاثة للمبادرة .. طيب .. ايه ستارز دي؟
ده مؤتمر موازي للمؤتمر الاصلي وفيه بنتكلم عن التكنولجيا والابتكار بس على مستوى المشروعات الناشئة وريادة الاعمال .. وكان ليا الشرف ادارة الجلسة الافتتاحية وكنا بنتكلم عن دور ريادة الاعمال في التحول الرقمي وضيوفي الاعزاء دكتورة غادة خليل مدير برنامج رواد 2030 والدكتور عمرو فاروق مساعد رئيس اكاديمية البحث العلمي لشئون التنمية التكنولوجية والمهندس محمد الدلال وه نائب رئيس ال IEEE العالمي في محور ريادة الاعمال والمهندسة رانيا الروبي مدير امن المعلومات ببنك مصر .. وكمان كان في جلسة عن الابتكار التكنولوجي ودوره في التغلب على التحديات وكان في الجلسة دي استاذي الاستاذ الدكتور طارق خليل مؤسس الجمعية الدولية لادارة التكنولوجيا وهو بمثابة الاب الروحي لادارة التكنولوجيا في العالم والدكتور محمد خليف عضو مجلسة بحوث تكنولوجيا المعلومات والاتصالات باكاديمية البحث العلمي والدكتورة مروة سليمان خبيرة الذكاء الاصطناعي ومؤسس شركة ماينديفور والمهندس طارق طه مدير الفينتيك هب ..اللي هو مركز التكنولوجيا المالية بالبنك المركزي .. طب ايه فكرة التيكاثون دي؟
بالمناسبة انا اللي اقترحت الاسم ده الجهة المنظمة .. اول مرة نشوف شركات التكنولوجيا العالمية مهتمة بريادة الاعمال والشركات الناشئة هنا في مصر في مجال تخصصية دقيقة زي امن المعلومات والميتافيرس والذكاء الاصطناعي .. الحمدلله .. التيكاثون كان الحل .. شوفنا شباب مصر عندهم افكار ونماذج شغاله بالفعل مش فكرة في السحاب .. من اول طلبة جامعة لحد ناس بتشتغل بجد .. وكمان بيربطوا اللي بيعملوه باهداف التنمية المستدامة .. بجد برافو .. بقول لكل مشروع كسب مبروك دي مجرد البداية ولسة الطريق طويل .. وماتنسوش .. سويفل … وانستابج … الشركتين في ناسداك .. سويفل وعارفنها .. انستابج دي بتاعت حاجه متخصصة اوي في البرمجيات .. مجال عملهم بيندرج تحت اسم الدييب تيك (Deep Tech) ..
شمعة جديدة .. كده بقوا كام شمعة؟ ثلاثة؟ نزود كمان؟ نزود .. في كتير الحقيقة .. شهر مايو السنة دي مليان شموع كتير .. شمعة جديدة .. لوجيفيتور .. لو تفتكروا اتكلمنا عنها في يناير اللي فات .. اللي هي مسابقة في مجال اللوجيستيات الذكية مدعومة من شركة من اكبر شركات الشحن .. كان في شمعة جديدة هو الاحتفال بتخريج الشركات الناشئة في المجال الجديد والمهم ده وخصوصا بعد التحديات اللي بتقابلنا جميعا .. افكار متميزة .. من ناس فاهمة .. وبتشوف مجالات اقتصادية جديدة .. مبروك لكل القائمين على العمل الضخم ده .. والى الامام دائما
شمعة جديدة .. كل سنة والموقع وفريقه بخير .. كل سنة والمكنز مع الموقع بخير .. ماهو الموقع يعني المكان .. والمكنز هو المكان اللي فيه الكنز .. دوروا على الكنز .. الكنز ممكن يكون حاجات كتير اوي .. افكار .. مشاريع .. مبادرات .. ناس من حولينا .. بتنور شموع .. كل ده علشان يبقى الاثر
اقرأ ايضا للكاتب
