يوم جميل عليكم جميعا ان شاء الله … يا ترى ايه الاخبار؟ الأسبوع عدى بسرعة جدا؟ صح؟ يا ترى حققنا حاجات كويسة؟؟ ما تنسوش “ويبقى الأثر” .. يا ترى عملنا ايه علشان “ويبقى الأثر”؟
حقيقي الأسبوع ده كان فيه مناسبات كتيره اوي .. مناسبات دولية ومناظرها المحلية ده غير المؤتمرات والتدريبات وغيره وغيره ..
عندنا مثلا … اليوم العالمي للعمل الخيري .. يوم ٥ سبتمبر .. ويمكن شوفنا أوسمعنا احتفالية “أبواب الخير” … وتابعنا كلمة سيادة الرئيس عبدالفتاح السيسي ان اليوم ده يمثل الوجه الحقيقي للفطرة الإنسانية السليمة وان العمل الخير اتحول عبر الزمن الى ثقافة وسلوك راسخ في الشخصية المصرية .. وكمان دعوة سيادته لكل واحد فينا انه يشارك في نشر رسالة البذل والعطاء دون انتظار المقابل … يعني من اعمل اللي عليك تجاه كل حاجه حواليك ماتحملش هم الباقي .. اعمل الصح بطريقه صح ..
عندنا كمان اليوم العالمي لمحو الامية .. يوم ٨ سبتمبر .. ولنا هنا وقفه .. عن نفسي حاشيل كلمة محو الامية الى كلمة “تثقيف” .. حقيقي اليوم ده مهم جدا جدا جدا من حيث المعاني اللي فيه .. محو الامية او التثقيف مش بس معناها اللي مابيعرفش يقرأ او يكتب .. خلينا نقول مابيعرفش يقرأ او يكتب بأدوات العصر الحديث .. الموضوع ده مهم جدا علشان الكتب السماوية كلها بتدعو الناس للقراءة والتعلم .. أول كلمة نزلت في القرآن الكريم كانت .. إقرأ ..
تعالوا بشوف اشكال جديدة لتثقيف بتاعت سنة ٢٠٢١ … زي ما اتفقنا حانسمى محو الامية ايه؟ حانسميه تثقيف ..
من وجهة نظري الشخصية .. كلمة التثقيف حاتساعد جدا في أي عملية تحول او تغيير عايزين نعمله .. الخواجة ستيفين كوفي قال جملة ظريفة .. قال ايه؟ قال:
You Have to Understand to be Understood
يعنى لازم علينا اننا نفهم الأول علشان الناس تفهمنا .. والفهم دي وظيفة العقل البشري … يعني خلي الصندوق يشتغل
كلمة التثقيف حاتساعدنا اننا نتحول اننا نكون مبادرين اكتر … اكتر سيكا … معلش هوه يعني ايه سيكا دي اللي انتشرت بين الناس!!! الواحد الحقيقة بيسمع شوبة مصطلحات ليها العجب … في ناس بتحط التاتش بتاعها .. زي مثلا اشيره .. اضفلطه .. اسطبه .. اشريشه … اهكره … الخواجه وبستر لو طلع من تربته حايلطم!!!
عايزيين نكون مبادرين .. مبادئين .. ما نستناش نشتغل برد الفعل .. يالا نشوف شوية اشكال للتثقيف زي ما كنا لسه بنقول ..
لو اتكلمنا عن التثقيف الرقمي .. يا ترى حانقول ايه؟ عمالين نتكلم عن التحول الرقمي واشكاله وانواعه طب وايه وليه وكلام كتير .. بس لو هل الكلام ده واصل لكل واحد فينا؟ طب لو واصل فاهم معناه ايه؟ طب لو فاهم معناه فهل عارف دوره ايه؟ ايه اللي مفروض يتعمل او يتعمل ازاي وازاي أشارك بفاعلية وكفاءة؟ طب يعني ايه قائد رقمي .. يعني ايه مهارات رقمية .. يعني ايه مستقبل رقمي .. يعني ايه هوية رقمية!! كل واحد فينا محتاج يدور ويشوف ويذاكر كويس ويحلل ويستنتج .. ولا ايه ..
طب لو قولنا التثقيف المالي … يعني عارفين تظبطوا فلوسكم؟ اللي ليكم؟ اللي عليكم؟ عارفين يعني ايه ادخار؟ يا ترى الادخار ده أنواع؟ يا ترى الادخار ده ليه أدوات؟ عارفين يعني ايه استثمار؟ عارفين ايه عن البيع والشرا والتسعير .. عارفين شويه حاجات عن البنوك او الشركات او البورصة .. عارفين تعملوا تخطيط مالي .. يعني تحددوا اولوياتكم واحتياجاتكم ومنها تعرفوا معاكم كام وحايجيلكم كام امتى وازاي ومطلوب منكم كام وامتى؟
فما بالكم بقى الثقيف القانوني … ده بحر كبير … يعني ايه قانون .. يعني ايه لايحة تنفيذية … هل كل القوانين ليها لوايح تنفيذية .. يعني ايه روح القانون .. طب فما بالكم بالعقود .. استشارات .. مواريث .. توكيلات .. نزاعات .. قوانين اقتصادية .. قوانين إدارية .. قوانين مدنية .. يعني كلام مهم لازم نكون عرفينه
الكلام ده لكل واحد فينا … فرد او مجموعة او شركة ناشئة .. يالا بينا
تفتكروا … التثقيف ليه علاقة بالوعي … ليه علاقة بالهوية … ليه علاقة بالانتماء؟ ايه كمان يا ترى؟ يالا نفكر .. نفكر .. نفكر .. القاكم على خير وتحياتي
