كتبت – ياسمين أبو العز
أنتقد أحمد بلال علام، المعلق الرياضي المصري، منذ قليل، الأسلوب التي تتبعه الأندية المصرية، خاصة الثلاثي “الأهلي والزمالك وبيراميدز” في شراء اللاعبين، موضحاً أن الأندية تقوم بشراء اللاعبين بأرقام فلكية بمجرد تألقهم دون النظر لأحتياجتهم، ودون دراسة طريقة وأسلوب اللاعب ومدي توافقها مع أسلوب الفريق.
وكتب علام عبر موقع التواصل الاجتماعي “تويتر” متحدثاً عن هذه الأزمة:” الأندية المصرية محتاجين كشافين، كل نادي محتاج مدير رياضي كفء وفاهم يحمي النادي من هوس تلاعب السماسرة، الأندية المصرية بقت بتدفع مرتبات للاعبين أجانب بأسعار كبيرة، لازم تفعيل الدور ده بشكل كبير”.
وتابع:” لازم التعاقد مع كشافين يبحثوا للأندية بشكل كويس وعين خبيرة تستفيد من المحترف عند بيعه، مش هاقول أفريقيا كنز والجو ده، لكن في أندية كثيرة بتأسس و تبيع في سن صغيرة، محتاجين كم نادي من دول”.
وأضاف علام:” ده بخلاف إن الأندية مش بتشتري إحتياجاتها، مجرد ما الاعب بيظهر و يتسوق إعلامياً، بيندفع فيه أرقام فلكية، وبينتهي على دكة البدلاء ومش بينجح”.
وواصل مؤكداً:” مهم جداً تفعيل الدور ده قريباً، فالنادي قبل ما يتعاقد مع اللاعب لازم يتابعه كويس و يشوف هل أسلوبه ينفع مع طريقة اللعب ولا لا ؟!، وهل المدرب إلي طلبه مكمل ولا لا ؟!!”.
وأختتم المعلق الرياضي الشهير:” المشكلة الجذرية في الفكر قبل كفاءة اللاعب، وياما لعيبة إتظلموا بسبب عدم وضوح رؤية مشروع النادي”.
