اشراقة يوم جديد وبداية جديدة دايما .. كل سنة ومصر كلها بخير وسعادة بمناسبة حاجات كتير .. بمناسبة اليوم الوطني لريادة الاعمال .. بمناسبة 30 يونيو .. اهلا بيكم والنهاردة حانشوف مع بعض لمحة من لمحات ريادة الاعمال في الفترة اللي فاتت .. حقيقي أنشطة كتيرة وكنت سعيد جدا بتواجد فريق الموقع بيغطي الفعاليات دي .. يالا بينا
اليوم الوطني لريادة الاعمال .. فكرة اليوم الوطني لريادة الاعمال الحقيقة جت فبراير 2020 وكنت ساعتها في اجتماع مع دكتورة غادة خليل مدير برنامج رواد 2030 وكانت بتقولي عايزيين نعمل حاجة لريادة الاعمال .. ساعتها اقترحت عليها اننا نعمل يوم وطني لريادة الاعمال .. عجبتها الفكرة وابتدينا ناخدها في حيز التنفيذ .. كمان كنا لسه عاملين رواد ميتر .. وده مؤشر ريادة الاعمال في مصر وكنا عملنا ورشة عمل تم دعوة جميع الحاضنات اللي كانت موجودة وقتها وحضرت الورشة دي دكتورة هالة السعيد .. حقيقة كانت بداية قوية لسنة 2020 بس الكورونا دخلت بعنف .. والحقيقة كانت في صالحنا جدا علشان قدرنا نستغل الظروف وعملنا كمية أنشطة لريادة الاعمال كتيرة جدا الحمدلله .. المهم اتفقنا على فكرة اليوم الوطني لريادة الاعمال وفضل قدانا تحديد اليوم .. واللي فيكم يعرفني حايعرف اني باحب اربط الاحداث والتواريخ بعض .. فا كان عندنا مثلا اليوم العالمي للابتكار .. اليوم العالمي للشباب .. وهكذا .. بس الحقيقة صديقنا العزيز احمد عثمان وكان ساعتها هو رئيس المجلس الدولي للمشروعات الصغيرة والمتوسطة قال للدكتورة غادة ما تختاروا اليوم العالمي للمشروعات الصغيرة والمتوسطة اللي يوافق يوم 27 يونيو من كل سنة انه يكون هوه اليوم الوطني لريادة الاعمال .. فكرة لطيفة وفعلا عملنا كده .. وحقيقة اول سنة كانت 2020 ومش بس كان مجرد يوم بالعكس .. الحماس كان غير طبيعي من الجميع وعلى رأسهم دكتورة هالة السعيد وزيرة التخطيط اللي دعمت الفكرة جدا واصبح أسبوع مش بس مجرد يوم ساعتها سنة 2020 .. وطبعا كل الفعاليات كانت اون لاين ولاقت استحسان كبير الحمد لله .. حقيقي احب اشكر دكتورة غادة خليل لانها دايما بتقول السبب في اليوم الوطني لريادة الاعمال وفكرته كانت من نزار .. تحياتي دايما لحضرتك لانك دايما بتشتغلي بمبدأ .. ولا تنسوا الفضل بينكم
اليوم الوطني لريادة الاعمال … السنة دي حقيقة كان في كمية أنشطة كتيرة جدا على هامش اليوم الوطني لريادة الاعمال واليوم العالمي للمشروعات الصغيرة والمتوسطة .. في احتفال وزارة التخطيط السنة دي .. كانت الاجندة فيها تمثيل لكل الأطراف اللي بتشتغل في مجال لريادة الاعمال .. من اول كلمات لجلسات لعروض لشركات لتوزيع شهادات تخرج برنامج مديري الحاضنات .. اجمل حاجة في ريادة الاعمال انه لعبة جماعية .. ولازم نقول شكرا لكل واحد نزل الملعب ولعب او شاط شوطه حتى لو كانت صغيرة ..
اليوم الوطني لريادة الاعمال … كنت في اليوم ده مدير للجلستين الرئيسيتين اللي في اليوم .. الجلسة الافتتاحية واللي كانت بتدور حول الاستثمار وكان فيها تمثيل لكل الفئات الداعمة .. حكومة .. حاضنات .. رواد اعمال .. بنوك .. جهات تمويلية .. وكانت جلسة غنية جدا بالمعلومات عن الاستثمار .. ممكن تشوفوا الجلسة من خلال صفحة رواد2030 على الفيس بوك .. ومن الأمثلة اللي الواحد بيعتز بيها في مصر مشروع “راحة بالي” .. فاكرينه؟؟ كنت استضفت صاحبته الأستاذة نادية جمال الدين في ويبنار مع نزار من سنة بالظبط .. وان ازاي هي عرفت تجذب المستثمرين وهما اللي راحولها مش العكس .. الجلسة التانية كانت الجلسة العامة الرئيسية وفيها كان الكلام عن دور الجهات المختلفة في دعم ريادة الاعمال وكان في تمثيل من الحكومة والرواد النيل والبرنامج الإنمائي للأمم المتحدة .. جلسة برضه استعرضنا فيها حجم النشاطات والاعمال اللي كانت على الواقع وطبعا مش عايز اقولكم كم الأسئلة اللي جت للسادة المتحدثين قد ايه ..
اليوم الوطني لريادة الاعمال … من المفاجآت اللي كانت في اليوم هوه حضور الإعلامية لميس الحديدي والقاء كلمة كضيف شرف المؤتمر .. وكلنا عارفين لميس واهتمامها بريادة الاعمال وكان ليها اكتر من برنامج لو تفتكروا عن ريادة الاعمال
اليوم الوطني لريادة الاعمال .. كان في تخريج شركات ناشئة من حاضنة اعمال مشرق .. دي الحاضنة المتخصصة في السياحة وتابعة للأكاديمية العربية للنقل البحري .. وشوفنا وسمعنا تجارب الشباب والشركات والتحديات اللي قابلتهم في ظل الكورونا وازاي قدروا يتغلبوا عليها .. حقيقة قصص كلها ملهمه جدا جدا جدا .. دايما بنقول ايه .. التعلم من قصص الفشل اهم بكتير من التعلم من قصص النجاح .. علشان دايما بقول ايه .. بقول ان النجاح ليه 100 اب .. انما الفشل بس واحد اللي بيشيله .. واحد بس اللي بيحاسب عليه !!
اليوم الوطني لريادة الاعمال .. طبعا من الأنشطة الجميلة اللي حصلت الفترة اللي فاتت هوه اعداد برنامج متخصص لتأهيل مديري الحاضنات .. وحقيقي دي خطوة مهمة جدا لمديري الحاضنات ولأي حد حابب يدخل المجال ده .. زمان كانت حاجات كتير بتتاخد بالبركة .. او بفكرة نجرب مش يمكن اطلع اعرف .. انما دلوقتي بقى في علم ودراسات .. والحقيقة البرنامج ده طلع برضه من رواد2030 واتنفذ عن طريق الجامعة الامريكية .. وحضره حوالي 40 فرد او اكتر .. برنامج متكامل وشوفنا تخرج الدارسين فيه برضه في الحفل
اليوم الوطني لريادة الاعمال .. اليوم ده يوم عزيز على قلبي وخصوصا التكريمات اللي اشكر كل من كرمني .. وزارة التخطيط برنامج رواد 2030 .. حاضنة السياحة “مشرق”.. وعلى هامش الاحداث تكريم من المجلس التصديري للتعبئة والتغليف والإنتاج الفني .. شكرا لحضراتكم جميعا
اليوم الوطني لريادة الاعمال .. لسه لسه في أنشطة كتيرة .. كان في كمان ان مصر استضافت المنتدى الافريقي السنوي الأول للمشروعات الصغيرة والمتوسطة .. واللي كان بعنوان :التمكين الاقتصادي للمشروعات الصغيرة والمتوسطة والمرأة والشباب لإدراك القدرات التصنيعية الافريقية وتكامل أسواقها” واللي ابتدى يوم 27 يونيو واخر يوم فيه هوه النهارده .. وحقيقي برنامج المنتدى غني جدا بالمحتوى العلمي التطبيقي اللي بيمس ريادة الاعمال والمشروعات الصغيرة .. والجميل اننا نلاقي تكريم للمشروعات المصرية زي “راحة بالي” اللي لسه كنت باحكيلكم عليها من شوية
اليوم الوطني لريادة الاعمال .. كان في كمان برنامج “تنمية وتطوير” اللي كنا اتكلمنا عنه قبل كده في رمضان وتخريج كذا دفعة من كذا حاضنة فيه .. كان برضه في تخريج مجموعة شباب متميزيين في ريادة الاعمال الرزاعية .. حاجة بجد مفرحه جدا .. احنا مش قوليليين ..
اليوم الوطني لريادة الاعمال .. برضة شركة مايكروسوفت بالشراكة وزارة الاتصالات ومركز الابداع التكنولوجي وريادة الاعمال والمشهور باسم “تيك” كانوا بيحتفلوا بتخريج 10 شركات ضمن برنامج عن الشركات الناشئة ودورها المجتمعي .. وهنا لازم كل رائد اعمال وكل شركة ناشئة تبص على دورها المجتمعي بالإضافة لدورها التجاري والربحي طبعا مافيش كلام
اليوم الوطني لريادة الاعمال .. ريادة الاعمال مش بس اننا تفتح شركة او نعمل مشروع .. لانها رحلة .. طويلة .. بس ممتعة .. عايزة صبر وطولة بال على الاخر .. مش من مبدأ شقلب واقلب خالص .. ولا هي سبوبه نطلع منها بكام قرش محترم .. خالص .. دي رسالة .. أسلوب حياة .. الريادة في التفكير .. الريادة في التعامل
اليوم الوطني لريادة الاعمال .. وسط كل الاحداث دي الاقي حد بيبعت كلمة شكر ولاقي حد يتصل يقول شكرا على حاجه كان ليها قيمة او مختلفة .. اكيد دي المكافأة الكبيرة .. احب اشكر كل فريق عمل رواد2030 وفي كل الجهات اللي اشتغلت بجد وبصدق .. أصدقائي الأعزاء اللي قدروا يطلعوا الاحتفال باليوم الوطني لريادة الاعمال وباليوم العالمي للمشروعات الصغيرة والمتوسطة بالشكل ده .. جنود الظل .. واجب علينا نشكرهم ونحيهم .. ولا تنسوا الفضل بينكم .. الريادة في بقاء الأثر
اقرأ ايضا للكاتب
