كتب- أحمد عبد العليم
حرصت المذيعة هبة الأباصيري على دعم الفنانة شيرين عبد الوهاب بعد تعرضها لموجة من السخرية عقب انتهاء حفلتها، وذلك من خلال منشور عبر حسابها الشخصي على موقع التواصل الاجتماعي فيسبوك.
وكتبت الأباصيري: مالها شيرين امبارح يا ولاد !!؟؟، كانت لابسه لبس مش عاجبكم !! براحتها وبعدين لا هو شاذ عن الأخلاق ولا التقاليد !! يبقى براحتها كمان مرة.
وتابعت: بيقولوا هزرت وطلعت لسانها عالمسرح !! براحتها برضه، ومحدش متضرر، ادي فنانة على مسرح وهزرت بعفويتها المعتادة من يوم ما طلعت وعرفناها وحبيناها، ما هياش مثلا بتهزر في حرم الجامعة ولا دار عبادة أو أي مكان له قدسيته ولا يجوز فيه الهزار مثلا !! دي حفلة ترفيهية وهي لم تخرج عن حدود اللياقة والأدب كإنسانة.
واضافت: اتكعبلت وقعت عالمسرح!؟ الله !!! ما يا ما نجوم وفنانين وقعوا على خشبة المسرح في العالم كله !! بشر و اتكعبل!!! إيه العجيب في كده !!.
واستطردت: المرة دي بقى الست مغلطتش ولا دخّلت الناس في حياتها الخاصة وبيتها، ولا نطقت، وهتفضل شيرين نجمة كبيرة لها جمهورها ومحبوبة وعندها كاريزما وقبول غصب عن الكارهين ومهما عدت بمصاعب، إلا أن يشاء الله أمراً، كان مفعولاً.
واختتمت: مش عاجبك شيرين ، متتابعهاش، مش عاجبك كلامي، كأنك مشوفتوش، ارحموا من في الأرض يرحمكم من في السماء.
