الغربية – خاص للموقع
ينفرد “الموقع” بنشر نص تحقيقات النيابة العامة التي باشرها المستشار محمد الشرنوبي رئيس نيابة كفر الزيات، ونور الدين العصار وكيل النيابة فى قضية بسنت خالد ضحية الابتزاز الإليكتروني بقرية كفر يعقوب مركز كفر الزيات، بمحافظة الغربية، والتي أقدمت على الانتحار بتناول حبة حفظ الغلال السامة، بعد تعرضها لابتزاز الاليكتروني من 5متهمين بنشر صور منسوبة لها فى حالة عدم الاستجابة لمطالبهم.
وأجلت محكمة جنايات طنطا الدائرة الأولى برئاسة المستشار سامي بريك وأمانة سر المحمدى الباجوري، النطق بالحكم على المتهمين لجلسة الدور الرابع من شهر مايو، بعد سماع المرفعات وتلبية طلبات الدفاع.
تداول الصور في القرية
وفتحت النيابة العامة التحقيقات فى القضية فى يوم 25ديسمبر 2021والذي قرر فيه خالد نبيه شلبي والد المجني عليا بأنه فوجئ بان نجلته تعانى من آلام شديدة ونمى إلى علمه بقيامها بتناول قرص الغلة تم نقلها إلى مستشفى طنطا الجامعى، وعند سؤاله عن سبب قيام نجلته بتناول حبة حفظ الغلال السامة علم بقيام كلا من إبراهيم عطية السعودي، عبد الحميد حمدى عب الحميد بالتشهير بسمعة نجلته ونشر صور لها على الفيسبوك وهذه الصور متداولة بين الأهالي بالقرية، وهما من قاموا بنشرها وتداولها بالقرية.
أوهموها بالحب
وكشفت تحريات المباحث الجنائية، أن المتوفاه مرت بحالة نفسية سيئة نتيجة تداول صور ومقطع فيديو منسوبين إليها بين شباب القرية محل سكنها وعلم اهليتها بذلك، كما أضافت التحريات قيام المتهم إبراهيم محمد السعودي باستغلال صغر سن المجني عليها وايهامها بحبه لها واعتزامه على الارتباط بها واستدراجها للتعدى عليها.
كما أضافت التحريات عن قيام المتهم سالف الذكر بارسال الصور ومقطع الفيديو المنسوبين إلى المجني عليها إلى المتهم عبد الحميد حمدي شاهين وقيامهما بنشرها على نطاق واسع بين شباب القرية محل سكنهما وقيام كلا من المتهمان ابراهيم محمد السعودي ومحمود رضا الصعيدي بابتزاز المجنى عليها وتهديدها بإرسال الصور والفيديو المنسوبين إليها إلى شقيقتها فى حال عدم رضوخها لمطالبهما.
كما أضافت التحريات إلى قيام المتهم محمود عوض سرور بإيهام المجني عليها بحبه لها واستدراجها والتعدى عليها.
تحقيقات النيابة
س: ما معلوماتك بشأن الواقعة محل التحقيق؟
ج: اللي حصل ان امبارح علمت ان في صور منتشرة لبسنت بنتى فى القرية وانا سألتها عن موضوع الصور ده قالتلي متعرفش حاجه وخافت تقولي وبعدها انا نزلت اصلي الجمعة ولما رجعت البيت بعدها بحوالي نص ساعة ولقيت اختها شاهيناز بتقولي ان بسنت خدت حباية غلة فأنا شلت بسنت بنتى على طول علشان انقلها المستشفى واحنا فى الطريق قولتلها عملتي كده ليه قالتلي ان ابراهيم عطية السعودي وشخص تانى اسمه عبد الحميد شاهين صوروها عن طريق النت عن طريق كاميرا التليفونات ونشروا صورها والصور تداولت فى القرية كلها وبعدها اغمى عليها ووصلتها مستشفى طنطا الجامعى.
س: ومالحالة التي ابصرتها عليها؟
ج: كانت مش دارية باللي حواليها نسبيا لحد ما شلتها وودتها المستشفى دخلت فى غيبوبة لما وصلت المستشفى
س: وهل اخبرك أحد بكيفية حدوث اصابتها؟
ج: بنتي شاهيناز هي اللي اخبرتني باللي حصل وان بسنت اختها اخدت حباية غلة
س: هل نجلتك المصابة تعانى من ثمة أمراض نفسية أو عضوية؟
ج: لا إطلاقا
س: ما قولك فيما قررته من قيام المشكو فى حقهما بالتقاط الصور الخاصة بنجلتك المصابة فى حين أنك لم تكن على علم من عما إذا كانت نجلتك قامت بمقابلة المشكو فى حقهما من عدمه؟
ج: انا معرفش لأن كنت بنقل بنتى المستشفى وكنت مشغول فى الموضوع ده ولسه مفهمتش كل حاجة منها
س: وهل تتهم احد بثمة اتهامات؟
ج: ايوة انا بتهم الشخصية اللي اسمهم ابراهيم عطية السعودي وعبد الحميد حمدي شاهين انهم صورو بنتى
س: وهل تتم كلا من ابراهيم عطية السعودي وعبد الحميد حمدي شاهين بثمة اتهامات؟
ج: ايوا انا بتهم الشخصين دول بالتشهير بسمعة بنتى المتوفاه إلى رحمة مولاها.
س: وما هي كيفية ارتكابهما تلك الواقعة تحديدا؟
ج: هما هكروا تليفون بسنت بنتى وخدوا صور بس ليها من تليفونها وبعدها نزلوا صور وفيديو لبسنت بنتى بعد لما ركبوا وشها على صور مخله ونزلوها على النت وقاموا بابتزازها وهددوها بأنها إن لم ترضخ لهم هينشروا الصور دي على النت فهي لما رفضت نشروا صورها وفيديو ليها على النت.
س: وكيف نمى إلى علمك تلك الواقعة تحديدا من قيام المشكو فى حقهما بتهكير التليفون الخاص بنجلتك المتوفاه إلى رحمة مولاها وقيامهما بابتزازها؟
ج: بنتى بسنت هي اللي قالتلي قبل وفاتها وانا بنقلها المستشفى
س: ولما لم تدلى بتلك الأقوال بالتحقيقات سابقا؟
ج: مكنتش فاكر
س: وهل اخبرتك نجلتك المتوفاة عن كيفية ومناسبة والألية التي تم بواسطتها ذلك الأبتزاز والتهديد لها من قبل المشكو فى حقهما؟
ج: هي مقالتش ليا التهديد والابتزاز تم بينهم ازاي
س: وهل كانت نجلتك المتوفاه تقوم بمقابلة المشكو فى حقهما؟
ج: معرفش
واستمعت النيابة العامة لأقوال شاهيناز خالد شلبي شقيقة “بسنت
س: ما معلوماتك بشأن الواقعة محل التحقيق؟
ج: اللي حصل ان يوم الجمعة 24/12/2021 حوالي الساعة 11صباحا كنت فى بيتي انا وماما بس وفالوقت ده لقيت بابا بيكلمني على التليفون بيقولي انتى انهى رقم مشغله عليه الواتساب فقولتله رقمي اللي عليه الواتساب وقفل وبعتلي صور ومقطع فيديو اللي قدمناهم على الفلاشة وبعتهملي من تليفون ابن عمتي ومقاليش أي كلام تانى بعتهم بس وانا شوفت الصورة والفيديو اللي بعتهم وورتهم لوالدتهم وبعدها والدي جه من برة قال لوالدتي عبارة “علشان تسبيهم براحتك ودي تربيتك علشان لما اتكلم مع واحدة بتزعقي معايا” وبعدها بابا دخل قعد فى الأوضة وبعدها بشوية على حوالي الساعة 12أو 12ونص تقريبا لقينا بسنت اختي جات البيت وورتها الفيديو والصورة وبسنت قالتلي أن اللي عمل الصورة والفيديو دول ابراهيم عطية السعودي وعبد الحميد شاهين هما اللي ركبوا الصور دي عشان كانوا عايزين يكلموها ويمشو معاها وهي رفضت وبعدها مامات قالت نادى لأبوكي علشان يسمع وبعدها بابا جه وقعد يزعق ويقول نفس الكلام اللي قاله فى الأول وبدها طلع من البيت وبسنت دخلت تصلي وانا مشيت برضو وبعدها بحوالي عشرة دقايق سمعت صوت ماما بتقول يابسنت يابسنت بصوت عالي وكانت بتستغيث وانا روحت لهم على الصور فلقيت بسنت مرمية على الأرض وبترجع وشميت ريحة قرص الغلة من بسنت وبعدها كلمت والدي على طول وقولتله الحقني البت بتموت وتعالي بسرعة وقفلت التليفون وبعدها والدي جه ونقلها للمستشفى وطول الطريق بسنت مقالتش غير كلمة واحدة انها خدت نص حباية ومقالتش أي كلام تانى خالص ووصلنا المستشفى محدش اتكلم معاها وعلى ماوصلنا كانت بسنت حكت لخالتي اللي حصل ان كان فيه شخصين اسمهم ابراهيم عطية البسعودي وعبد الحميد شاهين عايزين يكلموها ويمشوا معاها وهي موافقتش وانا وخالتي قالتلي على الكلام ده وبسنت توفت بعد كده.
س: وهل تعرضت شقيقتك لثمة وقائع ابتزاز؟
ج: ايوة
س: وما هي مظاهر ذلك الابتزاز تحديدا؟
ج: اللي حصل ان الشخصين اللي اسمهم ابراهيم عطية السعودي وعبد الحميد شاهين عملوا فيديو وصورتين وركبوهم على وش بسنت اختى بعد لما اخترقوا تليفون بسنت اختي
س: وهل محتويات غرفة النوم الموجودة بالصور بمنزلك؟
ج: ايوة محتويات الغرفة موجودة فى اوضة النوم بمنزلنا
س: وهل توجد ثمة مراسلات أو محادثات الكترونية ثابتة بينك وبين المتوفاة شقيقتك تحوى اقرارها بالواقعة او مواجهتك لها بها أو مضمونها ما سردتيه بأقوالك؟
ج: لا مفيش مراسلات أو محادثات الكترونية بيني وبين اختى بسنت بالموضوع ده اطلاقا
س: وهل ثمة محادثات ثابتة بين شقيقتك وأيا من أصدقائها أو المتهمين تحوى ذلك الموضوع؟
ج: لا انا معرفش اطلاقا
س: ومن هم اقرب صديقات شقيقتك بسنت خالد او اقربائها إليها والذين يحتمل أن تكون قد تحدثت معهم فى ذلك الأمر عبر أيا من التطبيقات؟
ج: معرفش إطلاقا
واستمعت النيابة العامة لأقوال صباح عامر جاد عامر حسب الله 46سنة “خالة المجني عليها”
س: ما معلوماتك بشأن الواقعة محل التحقيق؟
ج: اللي حصل ان يوم الجمعة 24/12/2021 بعد صلاة الجمعة حوالي الساعة 1أو 1ونص جالي تليفون من اختى حكمت عامر ومعروفة باسم هناء بتقولي الحقيني وبتصوت ومقالتش حاجة تانية فالتليفون وانا ساعتها روحت على طول عند اختى بكفر يعقوب علشان اشوف فيه ايه وكانت حكمت لوحدها وكان بسنت وشاهيناز ووالدهم خالد نبيه راحوا المستشفى فى طنطا واختي قالتلي روحي شوفي بسنت بنتي فى المستشفى وانا روحت مستشفى طنطا وأول لما وصلت شوفت خالد والد بسنت ومعاه شاهيناز اختها وبيقولوا ان بسنت جوه فى العناية المركزة وانا ساعتها داخلت لبسنت العناية ولقيتها فايقة شوية وانا سالتها أخدتي الحباية ليه مردتش تقولي السبب وبعد كدا على الساعة 3صباحا كنت لسه معاها فى المستشفى وكنا لوحدنا فسألتها تانى خدتي الحباية ليه وجبتيها امتى ومنين قالتلي انها جابت حباية الغلقة من اسبوع من كفر الزيات مع واحدة صاحبتها ومردتش تقو اسم صاحبتها دي اطلاقا وبعدين قالتلي انها جابت حباية الغلقة علشان في شخص من البلد اسمه ابراهيم السعودي بيغلس عليها وبيشتم فيها وبيقولها ” انا هجيب مناخيرك الأرض” وان الكلام ده حصل وقت الاجازة الصيفية اللي فاتت فى الصيف وساعتها صحابها ضربوا الشخص ده وكان الموضوع انتهى لكن قالتلي ان من حوالي 15يوم كانت بتحضر درس فى دلبشان ولقيت المدرس بيقولها انتى يابسنت بقيتي ترند رقم واحد وقالتلي ان امبارح الصبح والدها خالد نبيه جايب صور عارية ووراها لوالدتها وقالتلي انها مش هي البنت اللي فى الصور دي وانها صور متركبة وقالت لما باباها مشي بعد لما جاب الصور دي هي اخدت حباية الغلة
س: وهل قامت المتوفاة بإطلاعك على تلك الصور محل الواقعة؟
ج: لا وانا مشوفتش الصور اطلاقا لحد دلوقتي
س: ومن أين تحصلت المتوفاه على قرص الغلة تحديدا؟
ج: قالتلي من كفر الزيات ومقالتش اكتر من كده
س: وهل تعرضت المتوفاه لثمة وقائع ابتزاز؟
ج: معرفش أي شيء تانى غير اللي قولته.
س: وهل اخبرتك المتوفاه عن كيفية قيام المشكو فى حقهما بارتكابهما تلك الواقعة تحديدا؟
ج: هي بسنت مقالتليش هما عملوا الصور دي ازاي وانا معرفش ومقالتش اكتر من اللي انا قولته.
س: وهل سبق وحدث مثل تلك الواقعة أو ثمة وقائع مشابهه مع المتوفاه؟
ج: لا دى أول مرة تحصل ومحصلش ولا مرة قبل كدا
واستمعت النيابة العامة لأقوال شروق محمد عبد الله احمد صديقة المجني عليها
س: ماهي كيفية مشاهدتك لتلك الصورة المخلة تحديدا؟
ج: شوفت الصورة دي على تليفون صاحبتي اسمها شريهان ياسر صبري شريف وهي زميلتنا فى المدرسة وبتحضر معايا درس رياضيات وشرعي ولغة عربية وبعد لما شوفت الصورة دي مشيت
س: وهل تحصلتي على تلك الصورة؟
ج: شريهان هي اللي بعتتها مرة بالغلط على تطبيق الواتساب على جروب اسمه بست فريند وفى نفس الوقت من حوالي شهر او اكتر حاجة بسيطة بس كانت منزلاها بالغلط على الجروب ومسحتها بعدها وانا على الجروب ده واللي فى الجروب انا وبنت اسمها سلسبيل عبد المحسن وشريهان ياسر صبري بس والجروب ده انا طلعت منه من زمان واتمسح
س: هل توجد ثمة مراسلات ثابتة بينك وبين المتوفاه بسنت خالد؟
ج: انا فيه بيني وبينها محادثات على الواتساب ومضمون المحادثات دي ان بسنت بعتت لي رسالة بتقولي فيها متنسنبيش انتى اختى وانا سالتها في ايه قالتلي انا هاخد حباية غله عشان موضوع الصور وانا سألتها صور ايه فبسنت قالتلي موضوع السعودي بس وبعدها اتكلمنا فى الدراسة عموما بس كدا.
س: وما الذي تقصده بسنت خالد من عبارة موضوع السعودي؟
ج: هي تقصد الصور المنسوبة ليها وهي كانت قايلالي انها ندمانة وبتحاول تعدل من نفسها وبعد كده اتكلمنا فى الدراسة عموما
وجاء فى أقوال والدة المجني عليها بسنت خالد
س: ما الذي حمل المتوفاه إلى رحمة مولاها على ما اتت؟
ج: هي خافت من كلام الناس ونظرة الناس ليها وشافت الصور قدام عنيها لأنها مكنتش شافتها
س: وما هي طبيعة علاقة المتوفاة بكي وبوالدها وبشقيقتيها؟
ج: العلاقة بينا كويسة بس وبناتى قريبين مني عن ابوهم
س: ما طبيعة علاقة المتوفاة بوالدها؟
ج: هو ابوها فى الفترة الاخيرة نفسيته تعبانة وعلى خلاف معانا كلنا
س: كيف وقفتي على وجود صور لكريمتك؟
ج: احنا اول مرة نعلم بيها لما ابوها دخل وطلب تليفون شاهيناز عشان ابن اخته بعتله صور بسنت عليه
س: وهل تخص تلك اللقطات كريمتك المتوفاه؟
ج: هي ملهاش غير الرأس بس وباقي الجسم مش بتاعها والباقي من غير وش ومش جسمها
س: وهل من ثمة حوار دار بينكي وبين المتوفاه منذ لحظة تناولها حبة الغلال وحتى تلقيتي خبر وفاتها؟
ج: ايوة
س: وما مضمون ذلك الحوار؟
ج: انا قعدت اخدها بالحضن وقعدت اسألها مالك مردتش عليا ومتكلمتش خالص ولما راحت المستشفى كانت فاقت شوية وكلمتني وطمنتني عليها وقالتلي ياماما خدي علاجك انا كويسة وبعد كدا عرفت بوفاتها
س: وما تعليلك لما حواه مضمون الرسالة من أن المتوفاه قد بغضت الدنيا ولم تشأ أن تبرأ نفسها إلا لكي؟
ج: هي بنتي فكرت ان انا مش مصدقاها رغم انى لما شفت الصور والجسم الكبير دا وعارفة انها مش صور ولا جسم بنتى
س: وكيف نما إلى علمكم ضلوع المتهم عبد الحميد حمدي شاهين فى واقعة تداول الصور؟
ج: انا عرفت من كلام الناس بعد الوفاة والناس كانت بتتكلم وبتقول ان الواد ده شغال فى استديو وبتاع فبركة صور وصاحب ابراهيم
النيابة تواجه المتهم ابراهيم السعودي بأقوال أسرة المجني عليها
س: ما تفصيلات اعترافك؟
ج: اللي حصل ان انا من رمضان اللي فات كنت عامل تليجرام ودخلت على الأشخاص القريبون جبت رقم بسنت ودخلت كلمتها على الواتس وكنت عارفها علشان هي من البلد ومعجب بيها وبعتلها رسالة على الواتس ومسحتها لقيتها دخل تقولي ان اسلام قولتلها لا قالتلي امال انتي مين قلتلها هيما وقالتلي انت فى ثالثة ثانوي قولتلها ايوة وبقينا نتكلم وحبيتها وكانت بتبعتلي صورها وانا ببعت لها صوري وبعدين استمرينا على كدا فترة وكنت حبيتها فعلا لان كنت فاكرها محترمة وبدأت أطلب منها صور لجسمها وبعتلي صور لنفسها وانا كنت بشوف الصور وامسحها ومحتفظ بيها وبعدين عرفت انها مش محترمة وبتكلم ناس كتير فى حب زي ما بتكلمنى بالظبط وطلبت منها صور ليها وكنت بقابلها وفى مرة كنت بتخانق معاها وبشتمها على الواتس ومعرفش اختها سمعتها ازاي ودخلت شتمتني على الخط بتاع بسنت فانا شتمتها وبعد كده اتصاحبت انا وشاهيناز وبدأت أكلمها على الواتس وشاهيناز كانت عارفة انى على علاقة ببسنت وفضلت مستمرة معايا فى العلاقة وكان كل كلامنا على الواتس بس او مكالمات تليفون ونهزر ونضحك وكانت بتبعتلي صور صاحبتها اللي معاها فى الكلية وبتقولي لو عاوز تمشي مع حد منهم اشفلك سكته وانا خليت علاقتي بشاهيناز كويسة لحد متخطبت لأن كنت حاسس ان هيحصل مشكلة عشان بتكلم الناس كلها وكنت عاوز اعرف شاهيناز ان بسنت على علاقة بناس كتير بس من غير منضر وفضلت مستمر معاهم لغاية لما مرة كنت فى الشغل وقبل منزل قولتلها ابعتيلي فيديوهات ليكي وصور وكالعادة بعتتلي فيديو وصورتين ودي كانت أخر حاجة بعتتهالي وتقريبا الكلام ده كان فى شهر 8 اللي فات وانا عبد الحميد شاهين اصحاب وكنت سايب عنده التليفون لقيته سحب الصور ومقاليش وعرفت بعدها من واحد صاحبنا ثالث قالي على فيديوهات بسنت نفس الفيديوهات اللي معايا فعرفت ان عبد الحميد اللي اخدهم فواجهته قالي هي اللي بعتهاهملي وبتكلم كذا واحد من البلد وفكك مها وقولتله انا هطلع نفسي من الحوار ده وعملتلها بلوك ومسحت كل الصور والفيديوهات بس سبت الشات عشان ينجيني لو حصل مشكلة بس مكنتش عارف انها هتموت نفسها ولقيت الصور والفيديوهات انتشرت على النت وناس كتير ابتدت تكلمها وتهددها بالصور وهي كانت خايفة من أهلها انها تغير الخط وانا قطعت علاقتي بيها وفضلت اكلم اختها وبعد الحميد كان نشر الصور للدنيا كلها وكنت انا فى الشغل ورجعت يوم الخميس اللي قبل الوفاة ورتبوا قاعدة وكان معاها الجمعة اللي بعد الوفاة مبين خالي وابوها واهل عبد الحميد عشان يحلو الموضوع ودي ويلموا الفيديوهات من البلد ويدفعوا فلوس بس بسنت اخدت حباية غلة ساعة القاعدة وهو قاعد مع خالي واهل عبد الحميد وهو طلع يجري ولما خالي عرف الموضوع وان ابوها عمل محضر وقال اسمي انا وعبد الحميد قالي روح شغلك والموضوع كبر وانا رحت قعدت فى القاهرة عشان ابعد عن اهلي واتمسكت فى ابو المطامير وجيت على هنا
س: من هو القائم على تهديد المجني عليها بتلك اللقاءات تحديدا بتداول الصور؟
ج: أنا بس
س: وماسبب استعانتك بأقرانك حال مواعدت المجني عليها؟
ج: فيه منهم اللي كان بيكلمها ومنهم اللي كنت باخده معايا منهم اسماعيل وكان رايح عشان يقابلها
س: وما قولك فيما ثبت من تباين في بداية العبارات في المحادثات على تطبيق الواتساب الثابت بينكما من لغة منصبطة فى بداية حديثك مع المجني عليها للتدني تدريجيا لتصير عبارات إهانة وسب باستمرار وتهديد؟
ج: انا فى الأول كنت فاكرها محترمة ولما عرفت انها مش كدا فهنتها وهددتها ان هقول لاختها وبشتمها
س: ما قولك فيما شهد به خالد نبيه سليمان شلبي بالتحقيقات من قيامك والمتهم عبد الحميد شاهين بتركيب وجه كريمته بسنت خالد على صور مخله ونسبتما زورا مقطع فيديو لها؟
ج: هي دي صورها وهي اللي بعتتهملي ومش متركبة
س: ما قولك فيما شهد به سالف الذكر من انك اتيت فعلك ذلك لابتزاز كريمته المجني عليها لاقامة علاقة معها؟
ج: انا منشرتش حاجة ودي صورها وانا معملتش معاها حاجة او مع غيرها.
س: انت متهم واخر بتهديد المجني عليها الطفلة بسنت خالد بإفشاء أمر من أمور حياتها الشخصية بغير رضاها وهي الصور الفوتوغرافية والمقطع المصور والذين نسبتهما إليهما والتي استحصلت عليهم خلسة وذلك بنشرها على مواقع التواصل الاجتماعي على النحو المبين بالتحقيقات؟
ج: الصور بتاعتها وهي اللي بعتاهملي بمزاجها وانا مهددتهاش غير انى هبعتهم لاختها بس ومبعتهمش لحد تانى وعبد الحميد اللي خدهم من ورايا على تليفونه
س: كما أنك متهم واخر بالاعتداء على حرمة الحياة الخاصة للمجني عليها بأن استحصلت على صور فوتوغرافية خاصة ومقطع مصور لها فى مكان خاص مستغلا صغر سنها وذلك بنقلها باستخدام وسائل تقنية المعلومات والذي من شأنه انتهاك خصوصيتها دون رضاها وذلك على النحو المبين بالتحقيقات؟
ج: هلي اللي كانت بعتهملي وكانت بعتالي غيرهم بس انا مسحتهم
س: كما انك متهم واخر بإذاعة واستعمال مقطع الفيديو والصور الفوتوغرافية المنسوبين للمجني عليها على النحو المبين بالتحقيقات؟
ج: هي اللي كانت بعتهملي وعبد الحميد اللي نشرهم
وبسؤال فوزي سامي فوزي 44سنة مقدم شرطة مهندس بالإدارة العامة لتحقيق الأدلة الجنائية بالقاهرة ورئيس قسم التصوير الجنائي
س: هل قمت بفحص الحرزان الواردان؟
ج: أيوا
س: ما قولك فيما شهد به خالد نبيه شلبي والد المتوفاه بالتحقيقات من قيام المتهمان ابراهيم السعودي وعبد الحميد جاهين بتركيب وجه كريمته فى الصورة الأولى موضوع الفحص؟
ج: الصورة الأولى محل الفحص لا يوجد بها ثمة تعديلات
س: ما قولك فيما شهد فيه والد المجني عليها بالتحقيقات من ان تلك الصورة التقطها المتهمان الكترونيا عن طريق كاميرا تليفون بشبكة الانترنت؟
ج: كلام والد المجني عليه ليس له أي أساس عملي وبالفحص تبين أن الصورة الأولى محل الفحص لا يوجد بها ثمة تعديلات
س: ما قولك فيما شهدت به شقيقة المجني عليها من قيام المتهمان سالفي الذكر باختراق هاتف المجني عليها وسحب صور لها وتركيب صوة وجهها على صور مخلة ونشرها بالقرية؟
ج: هذا الكلام ليس له أساس علمي والصورة الأولي محل الفحص لا يوجد بها أي تعديلات وعن نشر الصورة وتداولها فجودة الصورة المنخفضة يدل على كثرة تداولها عن طريق التطبيقات الاليكترونية مثل الواتساب وغيره
س: هل الصورة الأولى موضوع الفحص تخص الفتاة الظاهرة بها؟
ج: أيوا
س: ما دليل ذلك؟
ج: عدم وجود أي تلاعب بالصورة سواء بالحذف أو بالإضافة يشير إلى أن الصورة الأولى موضوع الفحص تخص الفتاة الظاهرة بها
س: وهل استبان ك من فحص هاتف المجني عليها التقاط تلك الصورة بذات الهاتف؟
ج: ما استبان من الفحص وانخفاض جودة الصورتان يتفق مع جودة الكاميرا المحلقة بالهاتف الخاص بالمجني عليها؟
س:وهل الصورة الأولى موضوع الفحص تنم عن أن الفتاة الظاهرة بها هي من التقطتها؟
ج: الصورة لموضوع الفحص لفتاة عارية تقف أمام مرأة شاهرة هاتفها المحمول موضوع الفحص على ذات الوضع الظاهر بالصورة ولا يمكن الجزم عما إذا كان هي من التقطتها من عدمه
س: وهل تم اجتزاء وجه المجني عليها وتركيبه على جسد عار فى تلك الصورة؟
ج: لا فمن خلال الفحص الفني للصورة لم يتخللها أي تلاعب
س: وهل الصورة موضوع الفحص ملتقطة من هاتف المجني عليها؟
ج: إن الانخفاض فى جودة الصورة موضوع الفحص يشير إلى التقاطها بأحد الكاميرات منخفضة الجودة كمثل الكاميرا الملحقة بالهاتف محل الفص
س: ما دلالة ذلك؟
ج: الظاهر من فحص الهاتف الفحص والصورة موضوع الفحص اتفاقهما من حيث الانخفاض فى الجودة
س: وهل ثبت فنيا ارسال تلك الصورة من هاتف المجني عليها؟
ج: لم يتم العثور على أي من الصورتين أو الفيديو موضوع الفحص على هاتف المجني عليها
س: وهل يمكنك الجزم فنيا عما إذا كانت الصورة الثانية موضوع الفحص لذات جسد الفتاة بالصورة الأولى موضوع الفحص فى الجزء الظاهر منها؟
ج: لا يمكن الجزم فنيا عما إذا كان ذات الجسد من عدمه لعدم توافر السمات الواجب توافرها لعملية المقارنة والمضاهاه.
س: وما الذي انتهى إليه فحصك للصورة الثانية؟
ج: تبين من الفحص ظهور فتاه مع عدم ظهور وجهها كما تبين من خلال الفحص أن جودة تلك الصورة عاليه نسبيا وتختلف عن سابقتها من حيث التباين مما يشير إلى أنه تم التقاطها بأحد الكاميرات الرقمية عالية الجودة
س: هل امتد التلاعب إلى تلك الصورة الأخيرة من الناحية الفنية والتقنية؟
ج: لم يتم التلاعب بها
س: هل وصفك لتلك الصورة ينبئ عن التقاطها بكاميرا رقمية تعلو فى امكانياتها الكاميرا الرقمية التي التقطت بها الصورة الأولى؟
ج: الاختلاف فى جودة الصورتان يشير إلى التقاطهما بكاميرتان مختلفتان
س: هل شاب مقطع الفيديو موضوع الفحص أي تلاعب بالإضافة أو بالحذف؟
ج: نعم تبين لنا بالفحص وجود تلاعب يتمثل فى إضافة الساعة والتاريخ باللغة الافرنجية أسفل يسار الشاشة كما تبين عدم سريانهما بشكل طبيعي منذ بداية عرض المقطع حتى نهايته مما لا يخل بصحة مضمون ما يظهر بمقطع الفيديو من وقائع
ودونت النيابة العامة ملاحظاتها وجاءت كالتالي
– أقر المتهم الأول بتحقيقات النيابة بصحة ارتكابه واقعة استغلال حالة ضعف المجني عليها الناجمة عن تداول الصور المنسوبة إليها وتهديدها وأنه فى سبيل ذلك قام والمتهم الثالث والرابع بالتعدي عليها بالقوة.
– أقر المتهم الثاني بتحقيقات النيابة العامة بصحة ارتكابه واقعة تهديد المجني عليها بايعاز من المتهم الأول وتوعدا لها بنشر صور منسوبة لها والتي حصل عليها المتهم الأول منها وتهديدها بين اصدقائها وذويها مالم تستجب لطلبه بإرسال كروت شحن، واتفق مع والمتهمين الثالث والرابع والخامس على استغلال حالة ضعف المجني عليها الناجمة عن الصور المتداولة لها وتهديدها.
-اقر المتهم الرابع أن المتهم الأول تحصل على الصور والمقطع المصور للمجني عليها واستخدامه بالاتفاق معه على التعدى عليها فهددها المتهم الأول بذلك واستجابت لتهديده واصطحبها مع المتهمان الأول والثالث إلى أحد المناطق النائية بالأراضي الزراعية والتعدي عليها.
-كما أقر المتهم الخامس بأن المتهم الأول تحصل على الصور والمقطع المصور للمجني عليها واستخدامه بالاتفاق معه والمتهم الثالث باستغلال المحتوى وحالة ضعف المجني عليها وتهديدها لاجبارها على مقابلته والمتهمين بمنطقة جسر البحر بقصد التعدى عليها.
إحالة القضية إلي الجنايات
المحامي العام الأول لنيابة غرب طنطا الكلية قد أحال القضية التي حملت رقم 2036 لسنة 2022 جنايات كفر الزيات، المتهم فيها كلا من “ا.م“، 17 سنة محبوس طالب، و“م ض“ محبوس 21 سنة عامل، و“ا ي” 20 سنة، و”ع م” 19 سنة محبوس عامل، و“ ع م “ 16 سنة محبوس طالب بالصف الثاني الثانوى، لأنهم في غضون عام 2021 بدائرة مركز كفر الزيات ارتكبوا عدة جرائم اعتدوا على حرمة الحياة الخاصة للمجني عليها الطفلة سالفة الذكر، بأن نقلوا دون رضاها عن طريق برامج التواصل الاجتماعي على أجهزة المحمول الخاصة بهم، صورا فوتوغرافية ومقاطع فيديو تنتهك خصوصيتها على النحو المبين بالتحقيقات، واستعملوا ونشروا صورا فوتوغرافية ومقاطع فيديو موضع الاتهام بغير رضاء المجني عليها.
واعتدوا على المبادئ والقيم الأسرية في المجتمع المصري، وانتهكوا حرمة الحياة الخاصة للمجني عليها الطفلة سالفة الذكر، بأن نشروا الصور ومقاطع الفيديو عن طريق شبكة المعلومات الدولية والتي تنتهك خصوصية المجني عليها دون رضاها، وتعمدوا مضايقة المجني عليها الطفلة باستعمال أجهزة الاتصالات وإساءة استعمال تلك الوسائل.
وبذلك يكون المتهمون ارتكبوا الجناية والجنح المعاقب عليهما بمواد قانون العقوبات والاتجار بالبشر وتنظيم الاتصالات وتقنية المعلومات، وتمت إحالة القضية إلى محكمة الجنايات المختصة بدائرة محكمة استئناف طنطا.
