نصب وتزوير ومشروعات وهمية.. عملاء «عامر جروب» في “بورتو السخنة” و” بورتو ساوث بيتش” و”جولف بورتو مارينا” يستغيثون

مواطنون: الخدمات سيئة وحصلوا أموال في مشروعات لم تنفذ.. وابتزاز للاستيلاء على أموال الحجز

حالة من الغضب والاستياء تسود عددا من عملاء شركة عامر جروب نتيجة ما أكدوه من الخدمات السيئة المقدمة من شركة عامر جروب، ومشروعاتها المختلفة ومشاكل الحجز، خاصة وأن الشركة تعد من الشركات الكبرى في مصر العاملة في القطاع العقاري والسياحي.

وتركزت شكاوي عملاء عامر جروب من اختلاف المعروض على الرسومات عند الحجز وبين أرض الواقع، مؤكدين وقوعهم فريسة للنصب، حد قولهم.

وتقول صاحبة حساب باسم مي إبراهيم النجار، على فيسبوك، في شكوى من مشروعات عامر جروب: “كل عامر جروب نصابين، إحنا واخدين تايم شير شهر كامل فى السنة فى بورتو ساوث بيتش لمدة تلاتين سنة.

وأضافت السيدة: “أول حاجة الـplan بتاع القرية كله اتغير عن اللى كان فى الماكيت، وأصبحت قرية ماسخة مفيش فيها وسائل الترفيه اللى كانت مذكورة وموضحة فى الماكيت زى الـ zip line والشلال وبقي أمر واقع والمفروض نقبل بيه واللى مش عاجبه ميروحش”.

وتضيف صاحبة الحساب،:”المفروض ممكن نحجز تلاتين ليلة فى السنة أو تلاتين غرفة فى ليلة لو فيه فرح أو مناسبة مثلا أو 15 غرفة وهكذا”، متابعة: “المهم إن لينا تلاتين ليلة نحجزهم ذى ما نحب ووقت ما نحب ، العقد مش مذكور فيه أوقات معينة، وتوضح: “كل ما نيجي نحجز يقولو القرة كلها محجوزة وصعب تحجزو أكتر من شاليه لمدة كذا يوم”.

وتوضح: “مش عارفين نحجز أكتر من شاليه ومش عارفين نحجز فى المواسم أو الأعياد أو الويك إند أو المصايف أو حتى شم النسيم”.

ويقول حساب آخر باسم Mamet Farida، في شكوي عن مشروعات عامر جروب، بأن “عامر جروب بعد ما أوهمونا بالاستثمار مع شركة زعموا أنها محترمة باعونا رسمي وبيحاربونا علنا، أولا بالاستضافة اللي خلوها 48 ساعة قبل الموعد وبالمعاملة السيئة للجيست اللي بنجيبه طبعا كل ده لهدف وهو إنه عاوز يقضي علي أي تأجير”،

موضحة: “بره تلات أشخاص موجودين بالقرية ليهم كل الصلاحيات بداية من التزوير بفتح العضويات بصورة بطاقة المالك بدلا من الاستضافة وكده بيأجر آخر وقت براحته وبالسعر اللي يعجبه”.

وتقول صاحبة حساب باسم “أشجان سمير” في تحذيرها من شراء وحدات عامر جروب: “اشتريت من سنتين Porto vacation في sokhna south beach في مشروع mods”، مضيفة: “والمفروض كنت أستلم بعد شهرين ومنتظمة تماما في كل الأقساط لقيتهم بيكلموني وبيقولو لي الوحدة لسة مابدأوش فيها والمشروع كله لسه ماعملوش فيه حاجة ولو عايزة تحولي مشروع تاني وتستلمي فوري متاح بس هنخصم من الفلوس اللي دفعتيها 15% من قيمة وحدتك و الضريبة من الفلوس اللي دفعتيها، كما طلبوا أدفع مقدم للوحدة الجديدة مع إني دفعت لهم مبلغ كبير مش عايزين الفلوس اللي دفعتها لا تبقي مقدم ولا أي حاجة هيخصموها من آخر الأقساط بس ولما قلت انتوا أخليتوا بالشروط وماسلمتوناش في الموعد عايزين فلوسنا قالوا هنخصم منها 30% من قيمة الوحدة”.

ويوضح حساب باسم “فريد نهاد” على فيسبوك في شكوى أخرى: “عامر جروب نصب على كل ملاك جولف بورتو مارينا اللى شاريين وحدات صغيرة وكبيرة وعلى أدهم بالتقسيط وهدم لهم البحيرة وبنى على الجولف بعد ما حفره وجرفه وواخد تصاريح ببناء 3 أضعاف العمارات الموجوة وكله على حساب أرض الجولف اللى دفعنا فيها دم قلبنا واشترينا على أساس الفيو والخدمات ودفعنا فيها كثير عشان كده ولسه علينا أقساط”.

نرشح لك .. البورصة: تراجع رصيد شهادات إيداع البنك التجارى وعامر جروب ببورصة لندن