كتب_ أحمد عبد العليم
نشر الفنان محمود الليثي، اليوم الأربعاء، بوست له، على حسابه الشخصي بموقع التواصل الاجتماعي” فيس بوك”.
وكتب الليثي: «في نفس الوقت دا من يجي 19 سنة، كنت قاعد في أوضتي بعيط عشان جبت 92% ودا كان بالنسبالي قمة الفشل».
وأضاف محمود الليثي: «كنت بعتب على نفسي وبحمل فشلي (من وجهه نظري) على شماعات كتير.. وكنت شايف الدنيا سودا لأني مش هحقق حلمي أني أكون دكتور.. واضطريت أسفًا أني أحول علمي رياضة عشان مكنش قدامي غير هندسة اللي تناسب مجموعي وكنت مش حاببها ولا طايقها».
وتابع محمود الليثي: «وفي هندسة بعدت عن أهلي ورحت محافظة تانية واتعلمت حاجات كتير مكنتش هتعلمها في طب، وعرفت ناس تانية وثقافات تانية، وشخصيتي بدأت تتكون واحدة واحدة.. والأهم من كل دا في هندسة عرفت يعني إيه مسرح وحبيته وحبيت التمثيل وبدأ حلمي يتغير من دكتور لمهندس لممثل».
واختتم محمود الليثي منشوره، قائلًا: «خلاصة الكلام.. مش لازم تجيب مجموع كبير عشان تكون إنسان ناجح في حياتك ومش لازم تطلع من الأوائل، ممكن تكون مش شاطر في الدراسة بس شاطر في حاجة تانية.. أهم حاجه إنك تعرف أنت شاطر في إيه وتنميه لأنه ممكن يكون هو دا سبب سعادتك بعد كدا.. ملحوظة محدش يتريق أني شايف 92% مش مجموع كبير لأن دي كانت قناعاتي وقتها».
