كتبت أميرة السمان
عبرت الفنانة لقاء الخميسي عن حبها الشديد لوالدها، مؤكدة أنها مازالت تتحدث معه رغم وفاته قائلة: “بكلم والدي وبيرد عليا، انا بكلمه في الكتابة عندي كشاكيل بكتب فيها، انا بعرف اكتب ومفروض كنت ابقى مؤلفة، وبيبعتلي رسايل في علامات حواليا لأني بركز جدًا في التفاصيل”.
وقالت الخميسي: “مبقتش صديقة ريهام حجاج، عشان المقارنة حاجة بتفسد الصداقة، اني اقارن نفسي بيكي مش حلو، ووارد نرجع اصحاب تاني، لان اللي بيحب ميعرفش يكره”.
وعلقت الفنانة لقاء الخميسي على نزولها قبر الفنان أحمد زكي قائلة: “نزلت قبر أحمد زكي عشان بحبه، وكنت حامل في ابني، ونزلت السلالم كلها وطلعوني، وزوجي كان ماسك النعش معاهم، وبحبه عشان بصدقه ومن أهم الناس”.
وقالت: “كنا صغيرين انا وزميلي لؤي عمران، وقابلنا أحمد زكي في الاسانسير، قالي انتي ممثلة من غير ما يشوف لي حاجة ولا كنت عملت حاجة، وقالي هتبقي موهوبة جدًا، وقال لزميلي برضو، وقلت له انا بحبك ممكن أخد حضن، راح حاضني، وبعد وفاته مقدرش اتفرج له على حاجة، وعمري ما نزلت غير لابويا”
وعلقت الفنانة على خسارتها فرصة أمام الساحر محمود عبد العزيز قائلة: “كان هيبقى فيلم مهم وعلامة في حياتي مع محمود عبد العزيز لكن زميلة اخدته مني بعد ترشيحه ليا”.
وقالت لقاء الخميسي: “كان فيه مشاهد جريئة كنت هرفضها وهيبقى ليها حلول، وفي حاجات اتعملت مش لازم تتعمل بالطريقة دي، ومش بالضرورة المشاهد تتعمل بالمنطق ده، كنا هنقعد ونتكلم، وزعلت جدًا، لكن ربنا عوضني في راس الغول”، جاء ذلك خلال استضافتها ببرنامج “أسرار” مع الإعلامية أميرة بدر المذاع على قناة النهار.
