كتبت أميرة السمان
علقت الفنانة لقاء الخميسي على مهاجمتها للحجاب قائلة: “انا ست قريت القران وذاكرته وعارفه معانيه، و شايفة من وجهة نظري انه مفيش حاجة اسمها نقاب او خمار، ومعنى، وليضربن بخمرهن على جيوبهن، الجيوب هي المنطقة المقفولة اللي هي الصدر، وده اللي انا مذكراه وفهماه، وأنا من حقي أقول رأيي، لأن ربنا مصادرش رأيي، وشايفة إني أقول رأيي مش لازم طلع غلطانة، وربنا مفرضش النقاب، والحجاب كمان، لكن احترم المحجبات هي حرة، وهما اختاروا كدة”.
وقالت الخميسي: “الإنسان يكون حر لحد ثقافته واختياراته وأفكاره، وموجة المثلية الجنسية أو تغيير الهوية لما تكبر مش حرية، الا اذا فيه عيب طبي هو اتخلق بيه، لكن عمال على بطال لا، وهما يتحملوا مسئولية ده، ولو ابني جه قالي هساكن واحدة مش مقبول وهرفض، وشايفة إني أربي صح واعلم القرآن”.
وعلقت الفنانة لقاء الخميسي على أزمتها مع الفنان خالد سليم قائلة: “مسلسل ابواب اشك كان حقي احط اسمي قبل خالد سليم، ومضيت من غير ما اعرف ان خالد سليم هو اللي رشحني، وخالد سليم نجم كبير لكن بشوفه مطرب ومغني جامد، لكن انا اصلي ممثلة، والفرق بينه وبين تامر حسني أنه اتعمله افلام كتير لسنين، والخناقة غريبة لأنه على مين يمين ومين شمال، وخالد عشرة ومتجوز صاحبتي”.
وقالت: “بقالي سنتين مريحة بفصل، ومش معناه اني مبحبش شغلي، شغلي في راجل وست ستات 11 سيزون مش كسل، لكن اخدت رأي اقرب الناس ليا وقالولي كملي، لكني كنت ضد اني اعمل اكتر من 3 سيزون، وشايفة اني اخد وش القفص وانطلق”.
وأضافت لقاء قائلة: “كبريائي ذكاء عشان مخسرش حاجات في شغلي واضايق، ومخسرتش كتير، وبحب اشوف نفسي مهمة لاني فعلا مهمة، مبطلبش كتير في الأعمال، ومبحبش حد يعتبرني مش موجودة”، جاء ذلك خلال استضافتها ببرنامج “أسرار” مع الإعلامية أميرة بدر المذاع على قناة النهار.
