العمل كرامة.. بترفع راس صاحبها.. وبتخليه عزيز.. حتى في عيون ولاده.. والعمل بعد السعي له طعم مختلف.. طعم المكسب بعد التعب.. انا حنان حسين بطلة حلقة النهاردة من سفير التضامن..
أنا من محافظة الفيوم قرية ديسيا.. قرية ستاتها جدعان وبيجروا على لقمة عيشهم..
أنا زي أي ست بهتم ببيتي وواقفة جمب جوزي ونمشي حياتنا ايد على ايد.. بس كانت العين بصيرة والايد قصيرة.. لحد ما وصل لنا الخبر الحلو اللي غير حياتنا.. عرفت من جيراني إن فيه قرض بيقدموا بنك ناصر الاجتماعي التابع لوزارة التضامن الاجتماعي اسمه قرض مستورة.. وإنه بيقدم لحد ٢٠ ألف جنيه أقدر أعمل بيهم مشروع وأقف على رجلي.. والمشروع فكرته موجودة.. انا قريتي هي الأولى على مستوى مصر في صناعة السجاد.. ما تتردتش لحظة.. قدمت على القرض وبدأت في صناعة السجاد..
من زمان بحب شغل السجاد.. الشغل في السجاد محتاج فن.. وبحس وانا شغالة إني رسامة.. فنانة..
حالتي المادية اختلفت تماما لما مشروعى نجح.. وحالتي النفسية كمان.. ما بقتش شايلة الهم زى زمان.. بصرف على ولادي وبيتي واقف على رجله.. ومبسوطة جدا بفضل ربنا عليا إن الناس معجبة بشغلي.. وبحلم إني اتوسع في صناعتي والناس تعرفني..
https://fb.watch/55JF8Sz_FT/
