السيسى : قناة السويس قادرة وباقية ومنافسة .. وترسخت فى أذهان ووجدان التجارة العالمية

إيفأكد الرئيس عبد الفتاح السيسي، أن قناة السويس قادرة وباقية ومنافسة، ووجه السيسى الشكر إلى العاملين فى قناة السويس على الجهد الذى بذلوه من أجل تعويم السفينة الجانحة.

جاء ذلك في حديث الرئيس السيسى ، اليوم خلال زيارته لهيئة قناة السويس وتفقد مركز التدريب البحرى والمحاكاة التابع لهيئة قناة السويس بمحافظة الإسماعيلية وذلك بحضور رئيس الوزراء ورئيس هيئة قناة السويس وقيادات الهيئة .

وأضاف الرئيس السيسي: “بشكركم على الجهد اللى اتعمل وعلى الدور الكبير أوي اللى عملتوه.. وكل الشكر لكم.. كان منظر محترم يدل على خبرات وقدرات كبيرة.. والأداء كان أكثر من مشرف”.

وأشار السيسى، إلى أنه كان يتابع السفينة الجانحة فى قناة السويس بشكل كامل، مضيفاً : “كنت متابع الموضوع مع الفريق أسامة ربيع في توقيتات تستغربوها جداً.. كان فيه تواصل الساعة 4 الصبح.. وكنت مطمئن أن كل الأمور هتعدى بفضل الله على خير”.

وأضاف الرئيس: “الأزمة أكدت على حاجة مكنتش أتمنى أنها تحصل.. لكن الأقدار بتعمل أفعالها.. وشاورت وأكدت ونبهت على الدور الكبير والأهمية الكبيرة لواقع بقاله 160 سنة ” وترسخت فى وجدان صناعة التجارة العالمية ” .

وتابع السيسى : ” فى ظل الكلام اللى بيتردد كتير عن بدائل للقناة .. قناة السويس مرفق عالمى للتجارة الدولية و ترسخت فى أذهان وأفكار ووجدان التجارة العالمية.. وفيه 13 % من حجم التجارة ينقل من عندكم.. رب ضارة نافعة.. قناة السويس قادرة وباقية ومنافسة جداً جداً .. ومصر تقوم بجهد فى أمور أخرى جبارة جداً منها ربط البحر المتوسط بالبحر الأحمر … وهيتم افتتاح ذلك قريباً إن شاء الله “.

 

أوضح السيسى إنه ينتهز الفرصة فى الحديث عن ملحوظة مهمة حول أزمة السفينة الجانحة في قناة السويس، قائلا: “بتلفت نظرى دائما وتطمنى أوي .. رد فعل الناس فى مصر.. وكل الأشقاء والأصدقاء كانوا داعمين للجهد وعرضوا المساندة والمساعدة بإخلاص ومحبة وهذا أمر مقدر لهم سواء للأشقاء فى المنطقة العربية والخليج والأصدقاء فى كل دول العالم”.

 

وأشار الرئيس السيسى إلى أن الشعب المصرى تابع بصمت أزمة السفينة الجانحة فى قناة السويس، قائلا: “كانت حاجة خاصة بيهم كلهم وكانت كأنها ابنهم.. وفى كل أزمة الشعب المصري كانوا بيساندوا بالصمت والدعاء ويتمنى الأمان لقناة السويس والكل يتابع بدون كلام”.

 

وأضاف الرئيس : “بمجرد انتهاء الأزمة بفضل الله سبحانه وتعالى.. كان رد فعل على مواقع التواصل الاجتماعى ووسائل الإعلام وفرحتهم الشديدة كان لافت أوى.. كانوا بسطاء ومحبين لبلدهم وحريصين عليها أن تكون في خير وسلام وعلشان كده ربنا سبحانه وتعالى يقف معانا.. ورغم الظروف القاسية خلال الفترة الماضية الا أن الشعب المصرى دائما واقف جنب بلده وجنب قيادتهم.. وبيستحملوا ويصبروا ولما تنتهى الأزمة بخير يعبروا عن فرحتهم ويسجلوا ده وهذا أمر لفت نظرى من بدرى أوى “.

وأشاد السيسي، بحب وحرص المصريين على بلادهم، مؤكداً: “هما دول المصريين اللى حابين بلدهم وحريصين عليها.. مصر من دول كتير المفروض كان مصيرها مختلف، لكن بوعي وحرص وحب كل المصريين كانت النتيجة بفضل الله إن عبرنا أزمة كبيرة قوى.. أزمة مصر خلال الـ 8 سنين اللى فاتوا”.

 

وأضاف الرئيس: “مهم قوى إن الدروس والعبر اللى الموجودة وتتحول إذا كان فيه مستلزمات ومعدات محتاجين تبقا موجودة عندنا بشكل مستمر، احنا لما كان بيتعرض خلال الـ 3 و4 سنين اللى فاتوا الكراكات والقاطرات الكبيرة إنهم يدبروها، كنا بنقول إن ده حاجة في صالح العمل، يتم تدبيرها بغض النظر عن الظروف أو التكلفة”.

وتابع السيسي: الكراكة مهاب مميش واللى قبل منها دى كراكات عملاقة جاية علشان تساهم في تعزيز قدرة الهيئة ومطالب العمل اللى موجودة “، مضيفا: ” بقول لرئيس الهيئة والعاملين بها كل المطالب اللى احنا محتاجينها علشان يبقا عندنا عناصر في ظل التطور اللى حصل في حركة السفن العملاقة، لو محتاجة معدات تانية مع الدكتور مصطفى مدبولى رئيس الوزراء على طول فوراً نتعاقد ونجيب ومفيش أى مشكلة إن شاء الله”.