اهلا بيكم … المرة اللي فاتت اتكلمنا على مفهوم التحول الرقمي … فاكرين؟ والمرة اللي قبلها اتكلمنا عن المفتاح السحري لأي نجاح اللي هوه الفريق … النهاردة حانشوف مع بعض ياترى الفريق بتاعنا علشان يفضل يدي ويدي بنشاط محتاج حاجة تحفزه … طب ولو دخل عنصر التحول الرقمي في الموضوع واتكلمنا شوية عن أهمية رفع كفاءة العامل البشري … يا ترى في حاجات ممكن تتغير؟ تعالوا نشوف ايه مظاهر التحفيز اللي ممكن الفريق يكون بيبص عليها وفي الاخر حاسيب لحضراتكم الاختيار في حتت التحول الرقمي!!
معلومة في السريع يمكن تهمك .. الحافز هو الدافع اللى يخللي الفرد يتحرك للأمام و هو بمثابة قوة الدفع النفسية للفرد علشان ينجز مهامه .. احيانا بيكون الحافز هو السبب في تفسير ان ليه الناس بتتصرف بطريقة معينة تجاه اشغالهم وواجباتهم .. خللى بالك انه عدم وجود الحافز المناسب حيأثر على اداء الافراد .. مرة تانية .. ما تنساش .. الحافز هو الوسيلة اللي حتخللى افراد الفريق تواجه اي مصاعب اثناء تأدية عملها .. ماتنساش .. ان الحافز المناسب هو اللى بيقابل او بيسد الاحتياجات الاساسية للفرد .. ويا ترى .. هل الحافز في الشغل هو مسؤولية مين؟؟
طب سؤال .. ازاي احفز الناس اللي معايا؟ تفتكروا ازاي؟؟
علشان تحفز الناس اللي معاك سواء كانوا اعضاء الفريق او غيره فإن مصادر التحفيز يا اما تكون مصادر داخلية أو خارجية .. ده اللي هوه ازاي يعني؟؟
فى نظريات كتيرة طلعت علشان تحفيز العاملين .. ما تنساش قوة الحافز في مدى تأثيره مش بس قيمته .. يعنى لازم تشوف ايه الاحتياجات الضرورية اللي الحافز حيحققها
نظريات التحفيز .. نظريات الاحتياجات .. خللي بالكم ان (الحاجة) هي اي شرط أو ضرورة للبقاء .. في كذا نظرية طلعت بتتكلم عن الاحتياجات .. وفقا لنظريات الحاجات، هي دوافع الناس للحصول على نتائج في العمل التي من شأنها تلبية احتياجاتهم .. لازم تحدد ايه اللى بيحتاجه الشخص علشان نضمن انه يقوم بشغله وينمي عنده احساسه بالرضاء
نظرية .. هرم ماسلو للاحتياجات .. عالم النفس أبراهام ماسلو اقترح أن جميع الناس بتحاول انها تغطي خمس مستويات (أنواع) أساسية من الاحتياجات .. المستويات دي مرصوصة فوق بعض ونتكون (هرم) .. الهرم ليه قاعدة كبيرة وقمة صغيرة .. لو ابتدينا من القاعدة حانلاقي ان مستويات الاحتياجات دي هي: الاحتياجات الفسيولوجية .. الاحتياج السلامة والأمان .. الاحتياج للانتماء .. الاحتياج للتقدير والاحترام .. واحتياج تحقيق الذات ودي قمة الهرم
طب يا ترى هل المستويات دي مع وجود فكرة التحول الرقمي حاتفضل زي ما هيه؟ ولا محتاجين نلاقي تعريفات جديدة لمفهوم كل مستوى؟ مثلا على سبيل المثال .. الاحتياجات الفسيولوجية … بنقول ان كلمة (فسيولوجي) دي معناها علم وظائف الأعضاء .. يعني أي حاجة حسية في البني آدم .. الاحتياج للأكل والشرب والنوم والسكن وغيره … طب لودخلنا عليها مفهوم الرقمنة او التحول الرقمي هل في حاجة حاتتضاف ليهم؟ في تصوري الشخصي .. أكيد طبعا .. عملية التحول الرقمي جزء أساسي منها هو الربط والتوصيل بشبكات نقل البيانات وكمان الانترنت .. يبقى حتته الاتصالات دي جزء مهم واساسي حايتحول الى ركيزة أساسية علشان نقدر نبني هرم الاحتياجات الرقمي .. ولا ايه رأيكم؟
طب المستوى التاني اللي بيتكلم عن السلامة والأمان .. ازاي نقدر نحققه في ظل العالم الرقمي الجديد؟ يعني مثلا ناس عندها عدم امان انها ممكن تخسر شغلها!! فاكرين اتكلمنا في الجزء ده المرة اللي فاتت .. وبنقول ان التحول الرقمي بيدي ميزة كبيرة جدا في اظهار القيمة الحقيقية للإنسان .. وان أي حاجة او عمل نمطي تقليدي مافيهوش إعمال فكر فا حايتأثر جدا وسهل اوي استبدال الشخص بالالة .. طب والحل؟ رفع الكفاءة وإعادة تأهيل العامل البشري .. في برامج كتيرة موجودة في مصر بتعمل ده … اللي يسأل مايتوهش!
طب الانتماء والتقدير وتحقيق الذات؟؟ يا ترى ايه؟؟ عايزكم تفكروا في كل مستوى من المستويات دي ازاي نحققها ونطبقها عندنا في شغلنا .. في بيتنا .. مع اصحبنا .. او في مجتمعنا وازاي ندخل فيها عنصر الرقمنة ..
