كتب – أحمد عبد العليم
أكدت الفنانة نجلاء بدر أنها ترفض مصطلح “السينما النظيفة” موضحة أن الفن ليس له تصنيف.
وقالت نجلاء بدر خلال لقائها في برنامج “سبوت لايت” من تقديم شيرين سليمان عبر قناة “صدى البلد”: معنديش خطوط حمراء لاختيار الأدوار وأنا أرفض مصطلح السينما النظيفة الفن ملوش تصنيف، سواء سينما أو دراما أو أغاني، أوحتى رسم، معنى كدا أن اللي بيرسم لوحة أو ينحت تمثال هل هنكسر التماثيل في إيطاليا أو التماثيل الفرعونية، الفن مجرد من التسميات، الطبخ فن طالما مش كل الناس بتعرف تعمله وفي روح وإبداع، المكياج فن.
وأوضحت نجلاء بدر أنها لا يوجد لديها محظورات في الأدوار التي تقدمها قائلة: لو في مشهد معملوش يبقى الشخصية مش بتاعتي هل أنا عندي محظورات مفكرتش فيها ولغاية دلوقتي لأ، باقول أنا عندي طاقة أعمل هذه الشخصية هعملها لقيت مش قادرة أعملها صح يبقى أبعد عنها، الشخصية هي اللي بتفرض نفسها مش أنا اللي أفرض نفسي دا الفن، الفن ليه أفق واسعة أكتر من اللي الناس بتشوفه، هو مش رسالة، رسالته أنه يسليك أو يحكيلك قصة ينكد عليك أو يفرجك على حاجة حلوة.
وتطرقت نجلاء بدر خلال حديثها عن أزمة فستانها الشهير الذي ظهرت في مهرجان الجونة وأثار جدلا كبيرا وقالت عنه: الفستان اللي تم عليه النقد كله أنا حتى هذه اللحظة راضية ومقتنعة بيه وملبستوش عشان ابقى تريند، ونزل في الأسواق وبيتباع في وسط البلد وبيطلب من برا وبقى على اسمي ومبسوطة بده، أنا مكنتش متخيلة أنه هيعمل الضجة دي، وقابلت ناس معجبين بيه، أنا طالما عملت حاجة أنا مقتنعه بيها خلاص، في فساتين ممكن أشوفها وأقول ملبسهاش، مش فكرة خطوط حمراء لكن مش طبيعتي مش شكلي الواحد بيختار الفستان اللي بيخليه أجمل.
يشار إلى أن نجلاء بدر عرض لها مؤخرا حكاية “روليت” من مسلسل “في كل أسبوع حكاية” ويعرض عبر قناة cbc.
