كتبت أميرة السمان
قال المنتج السينمائي أحمد الزواوي:”عملت عمل للراقصة فيفي عبده علشان عليها فلوس ومش عايزة تدفعها وفيلم لعب العوالم متصورش بسببها”.
وأضاف الزواوي: “عملت عمل أقعد فيفي عبده، بيبقى في ايدينا حاجات بنستعملها لما يكون مش عارفين ناخد حقنا بالقانون وهي ليها علاقة بالفلك ومش أي حد يقدر يعملها”.
وتابع:”ما قمت به مع فيفي عبده مجرد قرصة ودن، كان ليا مبلغ عند فيفي عبده مقدم فيلم قيمته 60 ألف جنيه في 2017 وانا بعد المحاولات معاها بقولها عايز الفلوس بقيمتها دلوقتي يعني لو المبلغ كان بيساوي 6 اَلاف دولار دلوقتي قيمته 10 اَلاف دولار وبس هو ده اللي أنا عايزه ومطلبتش زيادة عن حقي”.
وأكمل: “فيفي عبده رافضة تدفعلي المبلغ، إحنا حضرنا للفيلم وجبنا أبطال العمل اللي اخترتهم وحجزنا لوكيشن وفجأة لقيناها مش بترد علينا، وأشرف زكي قال لي أعمل شكوى في النقابة واشتكتها في المحكمة والقضية خدت حفظ بسبب عدم الوصول لها وكلمت بنتها عزة مجاهد وفي النهاية قالت مش دافعة”.
وأكد:”أنا معايا حارس من عندنا ربنا بيذلل ليا الصعوبات واستعملت الموضوع في أشياء تخصني ولكن مش في ضرر أو أذى الناس، وبيسهلولي الصعاب بأمر الله، وده له علاقة بالفلك مش بالسحر”.
من جانبه قال الدكتور عبد المنعم فؤاد المشرف علي الأزهر الشريف:”السحر والشعوذة حذر منها المصطفى صل الله عليه وسلم في قوله من أتى كاهنا فصدقه بما يقول فقد كفر بما أنزل على محمد ﷺ”.
وتابع:”اذا كان الشيطان بهذه القوة فلماذا لم يتقدم لوزير المالية ويساهم في حال الأزمة الاقتصادية، ولماذا لم يلبس لبس رياضي ويدخل الملاعب وينصر فريقا ويهزم الاَخر ويكون هنا لا داعي للمدربين”.
ولفت:”للأسف السحر والأعمال ثقافة انهزامية لا يجب أن تقدم لشبابنا، لأن الله سبحانه وتعالى في كتابه الكريم حثنا علي الجد والإجتهاد، وعلمنا في القراَن الكريم “وقُلِ اعْمَلُوا فَسَيَرى اللَّهُ عَمَلَكم ورَسُولُهُ والمُؤْمِنُونَ ”، جاء ذلك خلال مداخلة هاتفية ببرنامج “حضرة المواطن” الذي يقدمه الإعلامي سيد علي بقناة “الحدث اليوم”.
