كتبت أميرة السمان
علقت لقاء الخميسي على أزمتها مع الفنانة انتصار قائلة: “علاقتي بانتصار كانت كويسة جدًا، بس هي بتتكلم كتير، وطول الوقت بتفتي، وقلت للناس محدش يبعتلي حاجة عن انتصار عشان هي بتقول كده طول عمرها، بتقول اصلا مكانتش لقاء الخميسي بطلة راجل وست ستات، حضرتك انا اول واحدة اتبعتلي يا مدام، وهي طول الوقت عايزة تقول انا موجودة، فا بتقول حاجات، بس أنا بعدي”.
وقالت الخميسي: “انا عايشة على دور فين العيب، لو عملت دور بين 30 او 40 دور زي راجل وست ستات، يمكن عايزة تطلع تريند وانتصار نكاشة ولما بشوفها بنسلم على بعض عادي، ومش هعاتبها، لان لو عاتبتها يبقى كلامها صح، وده مش حقيقي، بس انا منجرحتش ومش فارق لي، وكلنا في مسلسل راجل وست ستات ابطال”.
وعبرت الفنانة لقاء الخميسي عن حبها للنجاح وتمنيها لعمل أفلام غنائية قائلة: “عندي شهوة للايس كريم وشرا اللبس والنجاح من حقي لاني تعبت وابتديت من الصفر وحلم حياتي اعمل حاجة غنائية زيها زي افلام برا، ولو اتعرض عليا في السعودية عمل هوافق بس شرط حاجة جامدة، وده في اي حتة في العالم من شرط السعودية، ياريت في مصر”.
وقالت: “بخاف من الحسد، ومبركزش في حاجات وحشة، عمري ما اتمنيت اني اعمل دور حد، كل مرة اشوف أدوار زمايلي أقول عاملين الدور حلو، لاني لو مشفتش اللي عندي هيروح مني”.
وأضافت لقاء قائلة: “كان عندي غضب بس بعد الرياضة الدنيا هديت شوية، معظم غضبي مع ابني الكبير، عمري ما اتنرفزت في الشغل، مبحسش بنفسي، وبحدف حاجات على اللي قدامي ولما مسكني من دراعي مرة عيطت 3 ايام، وبعدها اوسا زوجي خلاه يجي يعتذر، وهو حبيبي جدًا، وزوجي عمره ما اتعصب وهينقطني بهدوءه، ووجهة نظره بيقول ان لو زعقنا نقنع الناس ازاى، يبقى نتكلم بالهدوء”، جاء ذلك خلال استضافتها ببرنامج “أسرار” مع الإعلامية أميرة بدر المذاع على قناة النهار.
