الشمس.. هي عنوان الصبح.. وأول طلّته.. بداية جديدة لليوم.. وأمل بيبدأ مع أول شعاع.. والشموس في حياتنا ممكن تكون.. شمس الأمل.. شمس السعي.. شمس الكرامة..
أنا صباح بطلة حلقة النهارده من سفير التضامن
أنا ست صعيدية من محافظة قنا مركز الترامسة.. عندي ٣٠ سنة.. باخد الدعم النقدي تكافل من وزارة التضامن الاجتماعي
فلوس “تكافل” بصرف منها على بيتي وولادي.. وبسببها قدرت أربيهم بصحة كويسة ومحرمهمش من المدرسة لإن الدعم مشروط بالصحة والتعليم.
مع الدعم فكرت أكبر رزقي وقرشي يزيد.. عايزة أنتج وأعمل حاجه مفيدة وأعيش ولادي حياة كريمة ومحرمهمش من حاجة
فكرت أعمل حاجة بالفلوس اللي بتجيلي من تكافل
بس يا ترى إيه هي وهعملها إزاي ..
أنا خبازة شاطرة وكل الناس بتشهد للعيش بتاعي..
بدأت أشتري بالفلوس اللي بتجيلي من “تكافل” دقيق وأخبز بيه عيش شمسي
وكان فتحة خير عليا وعلى عيالي..
يوم بعد يوم الطلبات بتزيد ومشروعي بيكبر والمعاش كبر وبقيت أقدر أسدد منه مصاريف مدرسة بنتي ..
اما بقى بنتي آية.. فالحمد لله شاطرة أوي في المدرسة ودايما بتطلع الأولى وبتجيب أعلى الدرجات.. ونفسها تطلع دكتورة.. ومساعدنا في ده ان البرنامج نفسه بيشترط التعليم..
آيه كمان بتساعدني في مشروعي.. ومش بس هي.. ده كل اللي في البيت .. عشان حسوا إن ده مشروعهم هما وباب رزق واتفتح لهم.. والحمدلله واللي بسببه أحوالنا كلها اتحسنت وحياتنا بقت أحسن..
