كتبت أميرة السمان
شارك النجم تامر حسني جمهوره ومتابعيه عبر صفحته الرسمية على موقع التواصل الإجتماعي “فيس بوك: منشور جديد مساء اليوم الجمعة.
وقال “حسني” خلال منشوره: “بتصادفنى بوستات كتير من شباب زى الورد اللى بيفكر ينتحر واللى زِهق من حياته واللى شايف الناس مفيهاش الخير وعايز يسيب الدنيا عشانهم على أساس يبقى أرتاح منهم مثلاً ! … ده حل ياراجل ياطيب ؟ ؟؟؟ تموت بذنب كبير زى ده عشان شوية صعوبات “بتعدي وحاتعدي” وحايجى لك الخير كُله والرزق كُله والسعادة كُلها ماحدش فينا”.
وتابع تامر حسني “حايغير الكون ولا حايختار الناس اللى تبقى فى دنيته شكلها ايه وأخلاقها عامله إزاى ؟ كُلنا بنتعايش وبنجرى ورا أحلامنا وطموحاتنا وأكل عيشنا ودى (أمتع رحلة بيعملها الإنسان) فى الحياة والمحاولات اللى بين الفشل والنجاح واليوم المُر واليوم الحلو والعُمر اللى بيفلترلك الناس اللى تستاهل تكمل معاك فى حياتك و ربنا سبحانه خلق الإنسان فى كبد مفيش حد فينا مش ناقصه حاجه مهمه فى حياته مهماً كان هو مين اللى عنده صحة ممكن يكون ناقصه مال واللى عنده مال ممكن يكون ناقصه راحة بال أو عيال والأمثلة كتير بس المهم نرضىّ ونقول الحمد لله على كم النعم اللى إحنا مش حاسين بيها وندعى ربنا يديمها ويحفظها مِن الزوال و بعيداً عن الأفكار الدينية الجميلة اللى تنورلك قلبك وكلكم عارفينها كويس ”
وأضاف “بس ساعات بنِستسلم وننسىّ والله أياً كان الحال رحمة ربنا كبيرة .. وما ضاقت الإ وفُرحت مِن وسع بشكل يدِهشك بس خلى عندك .. إيمان بالله وحُسن ظن انه حايحققلك كُل الخير اللى بتتمناه .. مهما أتاخر عليك شوية لحكمة ربانية لا أنا ولا أنت نعرفها .. وخليك إيجابى ومُتفائل الطاقة السلبية وأفكار الإستسلام واليئس بتخليك مسجون فى نفس الدايرة ف إستهدى بالله .. وصلي ع النبى كده ونفض الطاقة السلبية اللى على أكتافك وملخبطه أفكارك وإحسن الظن ب اللى خلقك وقابل خير وكرم زى ما بتتمنى وربنا يكرمنا جميعاً بالستر وراحة البال وكله واحد ف ضيق وكرب ربنا يفرجها عليه .. وماتنسونيش فى الدعاء معاكم فى الأيام المُفترجه دى “.
وأختتم تامر حسني قائلا: “طولت عليكم بس كان من باب الأمانة انى أتكلم ف الظاهرة اللى بشوفها بقالى شهر ع التوالى ع السوشيال ميديا ومن ناس أعمارهم لا تتعدى الـ 30 سنة”.
