بعد انتشار دفع الدية لقاتل نيرة أشرف.. أبو القمصان:«مفيش حاجة في القانون كدا ودا نصب لسرقة فلوس الناس»
كتب- أحمد عبد العليم
علقت المحامية نهاد أبو القمصان، الناشطة الحقوقية، على حديث البعض عبر مواقع التواصل الاجتماعي عن دفع الدية لوالد نيرة أشرف التي لقيت مصرعها على يد زميلها أمام جامعة المنصورة.
وكتبت نهاد أبو القمصان على موقع التواصل الاجتماعي فيس بوك: مفيش في القانون حاجة اسمها دية يدفعها القاتل لأهل القتيل، دا نصب لسرقة فلوس الناس، السؤال دلوقتى ؟ مين النصاب اللى بيروج إن بعد الحكم بالإعدام أو حتى قبل الحكم أهل الضحية ممكن يتنازلو وياخدوا دية؟، وفين الشرطة والنيابة من النصب العلني وتهديد دولة القانون؟، والخوض فى سير الناس؟.. من امتى المحاكمات اتحولت للسيرك وكل شوية نلاقي عروض سرك على الفيس بوك واليوتيوب؟.. اللى بيلم فلوس ويدعي إنها دية لأهل نيرة، دا سمسار ونصاب وبيعمل قرشين لنفسه على جثة القاتل محمد ليه؟.
وأضافت أبو القمصان: قانونا، الجنايات مفيهاش تصالح ممكن فى القتل الخطأ لأنها جنح مش جنايات، وقتل خطأ مش عمد، الجنايات مستحيل لسببين، إنها 1- حق عام: دا بتاع المجتمع وحق الناس كلها في الأمان وحق الدولة في ضبط الامن 2- حق خاص: دا بتاع الضحية واهلها ومن حقهم يطلبو التعويض المدنى وياخدوا اكثر من المبلغ اللى بيقولو عليه ديه كتعويض بحكم محكمة.. بلاش تصدقوا النصابين مصر دولة قانون مفهاش حاجة اسمها دية ودي جرائم نصب ونشر أخبار وإشاعات كاذبة من شأنها تكدير السلم العام.. أرجو النائب العام يتدخل.
