كتبت أميرة السمان
قالت الفنانة بسمة بوسيل، إن طلاقها من تامر حسني كان يعتبر مرحلة لإعادة التأهيل والمراجعة، إذ إنهما وصلا لمرحلة مليئة من المشكلات موضحة «لم نكن قادرين على التحدث والتفاهم مع بعضنا البعض، وهذا الأمر كان مؤثرا علينا للغاية».
وأضافت «بوسيل»: «لما كنت بقعد مع نفسي وأراجع شريط حياتي كنت أقول ليه يحصل فيا كده! وهو أنا عملت إيه يارب عشان يحصل فيا كل ده؟ وكنت ببقى متضايقة جدا».
وتابعت، أن الطلاق وقع بعد وفاة أبيها، ولم تكن متوقعة أبدا مسألة الطلاق إذ إنه كان «خضة» بالنسبة لها، كما خضعت والدتها لعدة عمليات، وأصبحت مسئولة بشكل تام عن 3 أطفال، مضيفة: «بدأت أشعر إنني بحاجة إلى التقرب من الله، ورحت عمرة 3 مرات في سنة».
وأشارت، إلى أنها بمجرد أن استقرت حالتها النفسية وبدأت تجمع الأحداث وتكمل الصورة، شعرت وكأن المشكلة تكمن بها، فهي تتعلق بشدة بالآخرين، والتعلق لا يجوز إلا برب العالمين.
وواصلت: «بعد أما هديت من الأزمات التي مررت بها، أصبحت أنظر لكل الأمور ببساطة سواء الموت أو الطلاق، وأصبحت متصالحة أكثر مع نفسي ومسامحة كل الناس ومبسوطة جدا في حياتي، ولما بدأت أرضى بما هو مكتوب لي بدأت أتحسن في شغلي وكأن ربنا بيكرمني عشان أنا رضيت»، جاء ذلك خلال حوارها لبرنامج «ع المسرح» تقديم الإعلامية منى عبدالوهاب عبر فضائية «الحياة».
وكان الفنان تامر حسني قال عبر حسابه الشخصي على موقع التدوينات القصيرة إكس تويتر سابقا، اولاً انا فرحان اوي بمتابعتكم للكلام اللي بقولهلكم من قلبي في اي بوست ايجابي بحب اوصله ليكم و في نفس الوقت بشوف ردود من ناس كتير تعبانه و مُحبطه من ظروفهم و من حال الدنيا …شوفوا بقى .. على قد مشواري و معاناتي اللي شوفتها في حياتي من وانا طفل فقير ضعيف شاف كل ظروف و مواقف الاحباط لحد ما كبرت و بدأت احقق احلامي و اواجه نفس الحروب و لكن من نوع اخر و اشرس شوفت حاجات كتير ببقى نفسي اقولهالكم او بمعنى اصح عرفت اسرار كتير في التعامل مع الحياه و الازمات نفسي اوصلهالكم كلها .. واثق انكم محتاجين حد يحكيلكم ده من قلبه و ينفعكم بيه بشوف ده دايماً في ردودكم عليا انا مش مدرس ولا دكتور ولا اي شيء غير اني بني آدم صاحب رحله فيها صعود و هبوط مكاسب و خساير و حروب و صعاب و احزان و دموع وتحديات و فشل و نجاحات و جوائز عالميه و ايرادات استثنائيه .. يعني كل اللي نفسكوا فيه بالصلاه عالنبي … انا طالب منكم تسألوني كأخ ليكم عن اي حاجه تعباكم و هحاول بقدر الامكان اقرا اللي هقدر عليه و ارد و هحاول اقسم المواضيع اللي هتسألوا فيها و ارد عليها كلها بشكل عام و اكيد لو حد سأل و لقاني مجيتش ناحية سؤاله اكيد هيعذرني و هيقدر اني حاولت ارد على الكل بس ممكن اكون مقدرتش اشوف الكل ماشاء الله عددكم عايز بلد كامله تتابع بس والله والله هحاول ارد و لو لآخر الشهر يلا يا جماعة مستعد اسمعكم.
