كتبت أميرة السمان
علق أمير مرتضى، المشرف السابق على الكرة بنادي الزمالك، على تصريحات ميدو الأخيرة بأنه سيكون أصغر رئيس للزمالك، قائلًا: “ميدو يبقى أصغر رئيس لنادي الزمالك لو انا مقررتش اكون أصغر رئيس للنادي، لأني أصغر منه وهسبقه، مش حبًا في السلطة اني عايز ابقى رئيس للزمالك، لكني عايز أعمل اسطورة، عايز لما امشي الناس تقول ده كويس وعمل حاجة، وانا حالياً مش عايز، وعندي القدرة لكن معنديش الرغبة وهرشح نفسي في يوم من الأيام بشرط لو ميدو نزل الانتخابات”.
وقال مرتضى: “عشان مبقاش بقول اي كلام بهزار، بس تجربتي في العمل العام، مش مبسوط منها ولا من الأجواء ولا العلاقات، مش عايز ابقى كومبارس، يا ابقى موجود يا اتفرج على الزمالك من البيت، وميدو مش عضو في نادي الزمالك حاليًا اصلا، بس ممكن يعملها أي وقت، ولو نزل انا اللى هكسب لأنه عشوائي ومتهور وأعرف أوقعه، لكن هو من الناس اللي اشتغل معاه، واشتغل أي حاجة معاه، اما بيني وبين حازم إمام فا مفيش مقارنة بيننا، لانه حاجة كبيرة ليا وبحبه جدًا وكان قدوتي زمان، لكن عايز دايرة حواليه ويشتغل على نفسه، ولو رئيس فا لازم معاه نائب قوي”.
وكشف أمير مرتضى، المشرف السابق على الكرة بنادي الزمالك، ما فعله المستشار تركي آل شيخ بالرياضة في مصر، قائلًا: “تركي آل شيخ ساعدنا واتعاملت معاه وهو ذكي جدًا وانا بحترم ده والفكرة مش في الفلوس وراجل بيحب مصر جدًا، وكان بيحكي ذكرياته مع الأهلي، وعمل طفرة في السعودية ونقل الطفرة من الرياضة للترفيه، ورجل مناسب في مكان مناسب، وده مشروع دولة وهو بيمثله”.
وقال أمير مرتضى، خلال استضافته ببرنامج “أسرار” مع الإعلامية أميرة بدر المذاع على قناة النهار: “احنا في مصر خسرنا المستشار تركي آل شيخ، وهو مسئول بيحب مصر زي السعودية، وعند افكار وامكانيات مادية كان لازم نستفيد منه، وهما عندهم نظام نفسي يبقى عندنا نظام زيه، ومن الناس اللي احب اتعامل معاهم، وبيحب بيراميدز، وقدر ينجحه، لو عندي فرصة اشتغل في حاجة معاه هعمل كده،مش زي ما بيحصل دلوقتي في اتحاد الكرة، ساعدنا حبا في مرتضى منصور، وهو مش محتاج يعمل كده، هو نفس شخصية مرتضى منصور لكن بتحديث جديد”.
برنامج “أسرار” تقدمه الإعلامية أميرة بدر على شاشة النهار يومياً خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
