كتب- أحمد عادل
تحدث الفنان فاروق فلوكس عن خلافه مع الفنانة مها أحمد وأنه قال من قبل إنها تسببت في إصابته بجلطة، وهي ردت أنه ضايقها خلال تصوير أحد الأعمال.
وقال فاروق فلوكس خلال لقائه في برنامج “المنسي” عبر قناة “هي” من تقديم إنجي هشام: “أنا راجل اشتغلت مع كبار النجمات اشتغلت مع الفنانة نبيلة عبيد ونادية الجندي وهدى سلطان وسهير البابلي ويسرا ومديحة كامل وإلهام شاهين، اشتغلت مع كافة النجمات هل في واحدة منهم اشكت مني، عيب أنا مكنتش عارف إني بشتغل مع مارلين مونرو عشان يحصلي الجنان دا هل أنا مراهق لهذه الدرجة”.
وتابع فاروق فلوكس: “لما أروح أحاول أعاكسها وهي ترفضني يجيلي جلطة؟ إيه المنطق الغريب ده، والمشهد اللي كنا فيه وانسحبت عشانه هي في بلكونة وأنا تحت، ربنا يسامحها وأنا مسامحها”.
وحكى فاروق فلوكس ما حدث قائلا: “أنا جالي جلطة وعملت عملية قلب نتيجة أنها علقت على جملة أنا بقولها، أنا من طبعي وأنا بمثل في البروفات أطلع كلام جديد، والمفروض الكلام الجديد ده الملقن يكتبه، مكتبش وأنا مخي مش دفتر، جيت تاني يوم أنا مش واخد بالي ونسيت الجملة اللي أنا أضفتها وهي المفروض ترد عليها وقلت الحوار عادي، هي قالت ستوب وقالت فيه إفيه هنا وأنا سألت هل مكتوب”.
واختتم فاروق فلوكس كلامه: “هي زي بناتي الصغيرين لكن مش نجمة كبيرة، سابت التمثيل شوية واشتغلت مذيعة وسابت المذيعة، وأنا مقدر ظروفها وظروف ابنها ربنا يشفيه وأنا مسامحها”.
