بيبي برينور!!! انت متأكد؟؟؟ ايوا … عاملين ايه؟ ايه الاخبار وايه أخر الإنجازات؟ أولا تعالوا نقول مبروك بمناسبة الكوپ٢٧ … وده يطلع ايه؟ المؤتمر العالمي للمناخ للأمم المتحدة اللي كان حاصل في إنجلترا في جلاسجو في اسكتلندا اسمه كوپ٢٦ … اكبر تجمع عالمي رفيع المستوى بيناقش قضايا وملفات في منتهى الأهمية بتخص المناخ وتوابعه .. وطبعا توابعه دي بتأثر على كل الصناعات والاقتصاد والسياسات وانتم طالعين … المهم .. المؤتمر بتاع السنة الجاية ان شاء الله حايكون في شرم الشيخ في نوفمبر .. ده حايكون الكوپ٢٧ … يالا مبروك مبروك …
طب معلومة على الماشي .. بمناسبة الدورة الحالية كوپ٢٦ عارفين ان مصر ممثلة في الأستاذ الدكتور عمرو سليمان أستاذ الطب النفسي وعلوم الاعصاب المعرفية كان مشارك في تحضير التقرير العالمي اللي على أساسه اتبنت عليه القمة الحالية .. بالمناسبة التقرير ده تم نشره السنة اللي فاتت في ديسمبر ٢٠٢٠ لمجابهة خطورة التغير المناخي على صحة البشرية و كان بعنوان
2020 Report of the Lancet Countdown on Health and Climate Change
من الاخر كده .. مصر جامدة جدا يا شباب .. محدش يستهان بمصر .. اوعوا …
طب ايه بقى قصة بيبي برينور .. لو حضراتكم متابعين المكنز .والايف اللي كان شغال يوم الأربعاء ١٠ نوفمبر .. كنا في أسوان .. كنت باحكم نهائي مسابقة أم حبيبة لريادة الاعمال .. طبعا كنا من أسبوعين كده اتكلمنا عن حبيبة وسمبل … فاكرين؟ المرة دي كان في ٢٨ فريق بيتنافسوا على جوائز مجموعها مليون و٣٠٠ الف جنيه .. ايوا .. اكتر من مليون … علشان بس لما حد يقولكم ان مافيش فلوس .. تردوا عليه بي ايه؟؟ ايوا بصوت خالد صالح وتقولوله : عند …….. يا ادهم .. كملوا انتو بقى
اقل فريق اخد ٣٠ الف جنيه واكتر فريق اخد ٢٠٠ الف جنيه … عارفين كام فريق كسب؟ ١٨ فريق .. حقيقي الفرق بينهم كان قليل .. بس المتميزيين بجد كانوا باينين اوي .. بجد اسوان دي كلها كنوز .. الموضوع مش موضوع فلوس .. الموضوع الحدوتة اللي ورا كل مشروع .. حاجة ولا في الخيال .. من شوية شباب جايين عايزيين يعملوا مشروع يعبوا سكر في أكياس ولكن في اقل من ٣ أسابيع عملوا موبايل آب يربط التاجر بالمصنع .. الله الله يا شباب .. طبعا مش حاقولكم على مخبوزات حلم الفردوس .. ام وبناتها في توشكا .. فاتحيين مخبز .. ومش مكفيين الاحتياجات .. الجودة روعة والشطارة بتنط من عيونهم وعقولهم .. قلة الإمكانيات مامنعتهمش انهم يحلموا .. وده ظهر فى اول سؤال سألته للناس في البريزنتيشن .. مين عنده حلم .. حاجة بجد تغسل الواحد من جوه .. الشطارة واللطافة والنشاط والحيوية والجمال .. يا خبر على المشاريع .. يالا بالهمه يا شباب … ناس كتير اخدت فلوس بس ضيعتها .. ورونا الشطارة بقى
هااااااا … ايه بقى بيبي برينور دي؟ قبل التحكيم عملت بريزنتيشن لمدة ١٥ دقيقة عن ريادة الاعمال .. المهم .. حطيت صورة فريد شوقى في فيلم عنتر وعبلة .. وافتكرت كلمة المهندس محمد الصاوي لما كتب مقالة “عنتر برينور يزور أوباما” وانا كنت استأذنته ٢٠١٣ اني استعمل الاسم ده “عنتر برينور” .. المهم وانا باشرح الصورة قولتلهم عنتر برينور بيحب عبلة برينور وعايزين يجيبوا بيبي برينور .. ظريف كده؟
المهم .. من الفايزين مشروع اسمه “مليكة” .. بيعمل شنط وأدوات حريمي بجد بجودة ممتازة مبهره .. مليكة دي طلعت مين؟ بنت صاحبة المشروع .. عندها سنتين .. بس ما شاء الله عليها .. طلعت وسلمت على السفير الكندي وماخافتش من المنصة .. أصلا المنظر مبهر … مبروك يا مليكة .. بيبي برينور
عايزين كل اب وام ينموا الحته دي في ولادهم … من اول انهم يسمعوا أفكارهم ومحدش يقلل منها او يستخف بيها .. انا فاكر مصطفى ابن اختى وهوه صغير كان بيعقد يقول أفكار تكنولوجية جامدة جدا .. طبعا عارفين ان جزء كبير من التقدم التكنولوجي راجع من الخيال العلمي .. مصطفى دخل ستارت اب بوووت كامب ٢٠١٤ وهوه في سنه تانيه اعدادي وحقيقي فريقه كسب فكرة عن منظومة النقل التشاركي الذكي لطلبة جامعة النيل .. يااااااااه من زمان اوي .. مصطفى في زيه كتير .. في كل بيت حرفيا .. ارجوكوا بلاش تطبقوا على نفس الأولاد .. وارجوكوا بلاش تقولوا عنهم “عيال” … اصل العيال كبرت … بس الأثر حايفضل !!!!
بالمناسبة في ستارت اب اسمها “ستارز” هنا في القاهرة .. زورتهم لما رجعت من اسوان .. فعلا بيشتغلوا على الجزئية دي عند الأولاد من سن ٦ سنين الى ١٨ سنة .. استثمروا في عقول الأولاد … ودايما ماتنسوش .. ويبقى الاثر
طبعا احب اشكر فريق التحكيم .. من اليمين للشمال .. احمد رزق .. هانزادة أبو يوسف .. اسلام محمد .. رنا عزالدين .. ومحدثكم نزار سامي
طبعا مهما شكرت مش حاقدر اوفي لفريق العمل المتميز حقه .. شمس .. محمد أشرف .. كريمة .. فاطمة .. يازيد .. على .. وناس كتير كتير كان ليهم اكبر الأثر في إنجاح المسابقة ..
وطبعا لو نقول ريادة الاعمال في اسوان يبقى لازم كلنا نصقف لرانيا قيشاوي .. اللي ضربت في الصخر من اربع سنين .. بس رانيا ما كنتش موجودة .. رانيا مشيت .. بس الفيديو اللي الناس سجلوه ليها حقيقي مؤثر جدا .. علشان كده دايما نفتكر كلمة .. ويبقى الأثر
عايز أتكلم كتير وكتير .. بس اكيد وراكم حاجات كتير .. يالا اسيبكم على خير .. ماتنسوش بيبي برينور علشان يبقى الأثر .. تحياتي !!
