كتبت أميرة السمان
تحدث الناقد الفني إلهامي سمير، عن بداية الفنانة هند رستم وكيف تأثرت شخصيتها بسبب قسوة والدها، إلى جانب المقالب التي كانت تفعلها في زميلاتها.
قال “سمير”: «هند رستم حبت الفن من وهي صغيرة وكان بالنسبة ليها وسيلة هروب لأنها اتولدت لأب ضابط من أصول تركية وكان حازما وشديدا ، وأمها كانت ست مصرية أصيلة، وعلشان كده خدت الجمال التركي مع الجمال المصري».
وتابع: «بعد فترة حصل مشاكل بين والدها ووالدتها وانفصلوا وعشان كده بقت عايشة مشتتة بين القاهرة مع الأب وبين اسكندرية شوية مع الأم، وبقت حاسة إنها ضيفة فترة هنا وفترة هنا وعشان كده بقت في الفترة دي إنسانة مشاغبة زي ما كانت بتوصف نفسها».
وكشف إلهامي المقالب التي كانت تفعلها هند رستم في زميلاتها، قائلا: «كانت بتعمل مقالب في صحابها في المدرسة وعشان كده كانت بتطرد من المدارس وبينقلوها كل شوية لمدرسة جديدة، وكانت بتعمل مشاكل عشان تلفت الانتباه ليها».
واستكمل: «والدتها في الفترة دي بدأت تحس إن المرحلة دي ممكن تاخد هند لسكة تانية، وبقت توديها تتفرج على السينما ولما تروح كانت تقف قدام المرايا تقلد الفنانات وبدأت تقول أنا ليه مبقاش زي دول»، جاء ذلك خلال لقائه مع الإعلامية نهاد سمير، ببرنامج «صباح البلد» على قناة صدى البلد.
