كتب- أحمد إسماعيل علي:
علق المستشار الأسبق لوزير الري والموارد المائية المصري، الدكتور ضياء الدين القوصي، على تصريحات مدير سد النهضة التي أكد فيها أن مصر والسودان ستتعرضا لضرر من التخزين الثالث لسد النهضة العام 2022.
وقال “القوصي”، في تصريحات خاصة لموقع “الموقع”، إن تصريحات مدير سد النهضة تقول إن هناك أضرار ستقع على مصر والسودان لكنها ليست شديدة.
وأوضح قائلا: “إثيوبيا قصت الشريط بتاع السد في أبريل 2011 واحنا عدينا أبريل 2022، وهم ساعة ما قصوا الشريط قالولهم يا اخونا كل واحد يدفع 10% من مرتبه واحنا بعد تلات سنين هنبتدي نملى السد.. التلات سنين عدوا والخمس سنين عدوا والسبع سنين عدوا والـ 12 سنة عدوا والـ 15 سنة هيعدوا والسد مبيكملش”.
وتابع بشأن تصريح مدير سد النهضة، قائلا: “عايزه يقول للشعب الإثيوبي إيه يعني؟ يقول له إن احنا خلصنا السد وملينا الخزان.. ما لازم يقول كده.. وإن احنا معندناش مشاكل والسد زي الفل واحنا خلصنا 80%”.
وواصل قائلا: ” إثيوبيا منذ 11 سنة ومخلصتش البناء، ومش هتخلص إلا سنة 2024، والتخزين المفروض يطلع في تلات سنين مش هتنتهي منه غير سنة 2025 .. وبعدين قالوا خمس سنين و7 سنين.. طب ما انت بقالك تلات سنين بتخزن مخزنتش خمسة مليار وهو السد فيه 75 مليار، يعني لمؤاخذة كلام عيال.. واحنا مناخدش الكلام على علاته”.
واعتبر المستشار الأسبق لوزير المياه، أن تصريحات مدير سد النهضة الأخيرة، رسالة موجهة للداخل الإثيوبي، “بيقول للناس اطمئنوا واحنا معندناش مشكلة.. والمصريين على عينا وراسنا.. والكلام اللي بيتقال.. إنما الكلام الفني هو مش هيخزن.. والسنة دي إذا قالك هنخزن 10 مليار كذاب وإذا قالك هنخزن 15 مليار كذاب، لأنه لم ينته من صب الخرسانات بتاعت الممر الأوسط.. والممر الأوسط لو مخلصش يبقى مفيش تخزين.. وهي كلمة ورد غطاها كلاما واحدا السنة دي “2022” لو عمل البدع مش هيخزن 3 مليار، ومع الخمسة اللي موجودين يبقة تمانية.. يعني 8 من 75 يبقى هيخلص تخزين إمتى؟ علينا وعليك بخير سنة 2035″.
وشدد الدكتور ضياء القوصي، رغم ذلك، على ضرورة عمل اتفاقية قانونية ملزمة لجميع الأطراف تشمل التخزين والتشغيل وآلية لفض المنازعات، قائلا إن هذا ما تريده مصر وتصر عليه وستفعله.
