كتب- أحمد عبد العليم
تحدث الفنان محمد عبد الرحمن عن منتقدي الأفلام السينمائية الذين ينشرون فيديوهات عبر مواقع التواصل الاجتماعي، ووجه لهم رسالة.
قال محمد عبد الرحمن خلال لقائه في برنامج “الراديو بيضحك” من تقديم الإعلامية فاطمة مصطفى عبر إذاعة “الراديو 9090”: أنا مع الفيديوهات دي طول ما اللي بيقدمها يكون درس النقد، لكن في ناس قاعدة في البيت عايزة تعمل مشاهدات علشان تاخد فلوس.
وأكمل موجها رسالته للأشخاص الذين ينشرون فيديوهات وينتقدون فيها الأفلام: أنت فاهم أن كلامك بدون وعي علشان حضرتك ممكن تكون في اليوم دا نازل مش مبسوط، فتطلع تتكلم وتقول شفت الفيلم ومفهمتوش وتأثر على الناس، أنت بتقول أي كلام، أنا مش ضده لكن متهاجمش حاجات ناس تعبت فيها، المهم يكون فاهم، أحنا 3 أو 4 واقفين قدام الكاميرا لكن وراها 150 واحد وكلامك دا ممكن يأثر.
وتابع: أنا قدمت في معهد فنون مسرحية مرتين وسقطت، بس دخلت مركز الإبداع الفني مع الأستاذ خالد جلال في منحة من الدولة وفي مكان تابع للدولة دار الأوبرا المصرية وأخذت ورش وبقى عندي خبرة، ممكن تكلمني وتنقدني وتقولي اختيارك مكنش حلو.
يذكر أن محمد عبد الرحمن يعرض له فيلم “الدعوة عامة” في دور العرض السينمائية.
وتدور أحداث فيلم الدعوة عامة، في إطار كوميدي، حول شاب، وهي الشخصية التي يجسدها الفنان محمد عبد الرحمن، يتشاجر مع والدته، وهي الفنانة سوسن بدر، فتنقلب حياته رأسًا على عقب بسببها.
