كتبت أميرة السمان
شارك الفنان محمد أنور نجم مسرح مصر جمهوره ومتابعيه عبر صفحته الرسمية على موقع التواصل الإجتماعي “فيس بوك” تحدث من خلاله عن والدته.
وقال محمد أنور خلال منشوره: “أمي مش متعلمة خالص لا بتعرف تقرأ ولا تكتب ، و بعدين أول ما راحت المسجد كان نفسها تتعلم تقرأ القرآن لأنه كان صعب عليها تحفظ القرآن سماعي ، فكانت بتزعل اوي انها مش عارفة تقراه ، عشان كده كانت تشغل السورة في الكاسيت كذا مرة عشان تقدر تحفظها”.
وتابع “أنور” “ده شجعها انها تتعلم لحد ما خدت محو أمية وحفظت القرآن كله بالتجويد، وهي دلوقتي اللي بتدرس في المسجد و بتحفظ للناس القرآن ، عملت كل ده لوحدها من غير مساعدة من أي حد فينا؛ فأنا فخور بيها جدًا”.
وأضاف “إحنا في البيت بصراحة مكناش مهتمين اوي باللي هي بتعمله او مكناش واثقين انها هتوصل لكل ده ، لحد ما لقيناها بتفاجئنا كل شوية تعالوا أنا بتكرم ، تعالوا انا هاخد شهادة ، أنا فخور باللي هي وصلتله”.
