تقرير- دعاء رسلان
في محبة الدكتور هاني الناظر، رئيس المجلس القومي للبحوث الأسبق، الذي وافته المنية صباح اليوم الخميس، انهالت الحكايات التي يرويها كل من جمعته الصدفة بالحديث أو اللقاء معه أو الحصول على استشارة ومساعدة طبية منه.
في واحدة من الحكايات الإنسانية التي كان الدكتور هاني الناظر بطلها، تروي إحدى رواد “فيس بوك”، وتدعى آية عبد الرحمن، حكايتها عن تعرضها لحساسية كادت أن تؤثر على حملها في ابنتها.
وتابعت آية: “حابة أقول كلمتين في حقّ الراجل ده، للأمانة دكتور هاني الناظر 2018 وأنا حامل في تيا كان عندي حساسية فظيعة شخصها بحرق درجة رابعة، وشافني بعيط جامد ورايحاله منهارة قالي بتعيطي ليه الموضوع ده حصل لبنتي، وأنا متأكدة إنه محصلش لحد خالص لأنه مش حزام نـاري ولا حساسية حمل ده حمل فقاعي وجالي من أدوية بتعملي حساسية لدرجة جلدي كان بيتشال من مكانه ولابسة هدوم ومش طايقاها، المهم الراجل كان ودود وخدوم جدا جدا وقالي انتي زي بنتي متعيطيش”.
واستكملت: “عمري ما أنسى بجد كل نصيحة ودعوة دعاها لي، وآخر مرة شوفته قبل الولادة بشهرين، لما يأس من حالتي قالي في علاج ليكي بس أنا مش مسئول إن البيبي ينزل سليم قعدت أعيط جامد جدا وقلت له لا هستحمل أنا همـوت وأشوف بنتي حتى لو منمتش الشهرين الفاضلين دول، قالي كلمة مش هنساها ربنا يباركلك على قد صبرك وتحملك، وهي تشيلك لما تكبري وتعرف انتي اتعذبتي فيها أد إيه عرفت وقتها إن الموضوع مكنش هين زي ما قالي بنتي كانت كده في حملها”.
واستطردت: “من الواجب عليا أخلي كل اللي عندي يدعوله بالرحمة، الراجل ده عالج ناس كتير كانوا بيجولوا من بلاد كتيرة.. الخبر بجد صـادم بالنسبالي ربنا يرحمه ويصبر أهله يا رب ويجعله في الفردوس الأعلى”.
