كتب- أحمد عبد العليم
كشفت الفنانة سهير رمزي أنها رغم انشغالها في تصوير مسلسلها الجديد لكنها طلبت أن تأخذ يوم ليلة النصف من شعبان إجازة حتى تتفرغ للعبادة.
حكت سهير رمزي عن طقوسها في هذا اليوم قائلة: طلبت منهم يسيبوني مشتغلش لأنه يوم في السنة الواحد بيحتاج يقعد مع نفسه يقرأ قرآن ويصلي كتير ويدعي ربنا، تقعدي مع نفسك ومع ربنا وكمان جاي في أيام عيد ميلادي فأنا سعيدة.
وتطرقت في حديثها لتكشف كيف احتفلت هذا العام بعيد ميلادها وحكت: عيد ميلادي كنت بحبه لما كانت والدتي عايشة لكن بعد رحيلها بقى يوم تقيل عليا لكن ربنا بيعوضني بحاجات حلوة كتير مثلا جوزي بيعملي حاجات وأصحابي وأهلي حتى في الاستديو مكنتش قايله لحد أنه عيد ميلادي واحتفلوا بيا، حب الناس بالنسبة ليا طقوس حلوة.
وأضافت: بزعل أن في سنة راحت مني مش بكون فرحانة وبسأل نفسي يا ترى السنة اللي جايه تبقى إيه وإحساس بينك وبين ربنا يا ترى السنة اللي راحت دي عملت فيها حاجات حلوة ولا لأ والوحش لو زعلت حد أحاسب نفسي وأصالح لأن يمكن السنة اللي جايه مكنش موجودة، وبحمد ربنا أني السنة دي محاولتش اكلم حد واعتذر له لأني مش مزعله حد، في سنة من السنين كلمت أحد أصدقائي واعتذرت.
يذكر أن سهير رمزي تنافس في رمضان 2023 بمسلسل “أم البنات”.
