في فترة الولادة وما بعدها الأم بتكون مرهقة جسديًا ونفسيًا بشكل كبير، ومشغولة بمسؤوليات البيبي الجديد فمش بتكون قادرة إنها تاخد بالها من البيت وتهتم بترتيبه وتنضيفه في الفترة دي وممكن تقلق أكتر بسبب نضافة البيت لأن هيجيلها ضيوف كتير عشان يباركوا الولادة أو السبوع أو العقيقة. عشان كده هنكلمك عن أهم تجهيزات الولادة اللي بننصحك بيها قبل ما تولدي يعني تنظيف البيت في الشهر التاسع بسهولة وبالتفصيل عشان تكوني مرتاحة نفسيًا بعد ما ترجعي بالسلامة إنتي والمولود من المستشفى.
تجهيز المطبخ قبل الولادة
نضفي المطبخ كله الجدران والأرضيات وخزاين المطبخ من جوه ومن بره واغسلي الستاير والسجاد لو موجودين وعطريهم.
لو كنتي هتستخدمي أجهزة تعقيم الببرونات وتجهيز أكل المولود فخصصي لهم مكان مناسب.
حضري أساسيات الطبخات السهلة وخليها عند في الفريزر عشان الطبخ بعد الولادة ما ياخدش منك وقت وجهد.
تخلصي من أي حاجة زيادة عن استعمالك عشان حركتك في المطبخ تبقى أسهل.
نضفي البوتاجاز والتلاجة والفريزر والديب فريزر لو موجود عندك واتخلصي من الأكل القديم الموجود اللي ما تمش استخدامه من وقت طويل.
تجهيزات الولادة ..تجهيز غرفة البيبي قبل الولادة
رتبي أثاث الأوضة بشكل مناسب إنك تتحركي فيها من غير ما تخبطي في أي حاجة وإنتي شايلة البيبي بالليل.
اتأكدي إن في مكان كويس تقدري تغيري فيه الحفاضات وفي مخزون كويس منها هي والكريم والمناديل المبللة.
خدي بالك من وجود غطا مناسب للطقس.
لو كنتي في الشتا اتأكدي إن الدفايات شغالة.
حاولي تكون الإضاءة في الأوضة مناسبة لعين طفلك.
حاولي ما يبقاش في تحف كتيرة ولوحات في الأوضة وحافظي على بساطتها.
تنظيف وترتيب أوضة النوم في الشهر التاسع
أوضة النوم هتكون هي المكان الخاص بيكي إنتي وجوزك أكتر من قبل كده فما تكتريش فيها من التجهيزات الخاصة بطفلك علشان جوزك ما يفكرش إن خلاص كده حياتكم الخاصة هتنتهي بعد الولادة.
رتبي الدواليب كويس بحيث إنك تقدري توصلي بسرعة لهدومك الخارجية والداخلية المناسبة للرضاعة.
خلي مكان مخصص لمستلزماتك الصحية زي المراهم والأدوية اللي هتكرري استخدامها.
نضفي الستاير والسجاد وجهزي مفروشات السرير لبعد الولادة.
اطلبي من جوزك صيانة أي لمبات بايظة.
أوض الاستقبال:
من أهم تجهيزات الولادة هي تنظيف أوض الاستقبال تنضيف كويس عشان ما تضطريش إنك تنضفيها تاني عشان السبوع والعقيقة.
علقي لوحات على الجدران عشان يكون في لمسة جمالية.
التحف والحاجات اللي تخافي عليها من الكسر يفضل إنك تشيليها في مكان بعيد أثناء فترة تواجد الضيوف.
جهزي الحلويات أو الشيكولاتة اللي هتقدميها لضيوفك في أيام الولادة الأولى.
نصائح عامة لتنظيف المنزل قبل الولادة في الشهر التاسع
بعد ما تسجلي الحاجات اللي المفروض تخلصيها أشري على كل حاجة تخلص عشان تحسي بالإنجاز.
اطلبي المساعدة من العاملة المنزلية أو والدتك وقرايبك في بعض الواجبات أو شراء الضروريات.
اطلبي المشاركة من جوزك .
اتحركي بشكل مناسب لحملك علشان ما تجيش ولادة مبكرة لا قدر الله.
ابعدي عن المنظفات والمواد الكيماوية اللي فيها ضرر ليك وللجنين.
ما تخليش تنضيف البيت يستنزف وقتك لغاية آخر لحظة قبل الولادة، ارتاحي.
مع أطيب تمنياتنا لكِ بعودة سالمة ليكِ ولطفلك من المستشفى.
