إبراهيم أبوالعطا: أتمنى أموت وأنا بمثل.. ولو بُعثت ولاقيت كاست شغال فوق هقولهم شغلوني معاكم

كتبت أميرة السمان

تحدث الفنان إبراهيم أبو العطا، عن اتجاه الفنانين إلى موسم الرياض بالمملكة العربية السعودية، بجانب تعليقه على تصريحاته السابقة بشأن عدم اعتزاله الفن.

وقال أبو العطا: السعودية طول السنة بتنتج مسرحيات، بينور مسارحه ويطفي مسارح مصر، بيطفيها كإنتاج، ومفيش حد مهتم بالمسرح غير أستاذ أحمد الإبياري، والممثلين راحوا دلوقتي يشتغلوا في السعودية، وهما هما اللي بيعملوا المسرحيات كل شهر بالشلة بتاعتهم ويرجعوا.

وعن أمنتيه في عدم اعتزال الفن، فعلق إبراهيم أبو العطا: أنا بعشق الإبداع، أنا مش بمثل علشان فلوس، أنا لا أجيد إلا التمثيل، وأتمنى من الله أني معتزلش ومقعدش في البيت وأفضل شغال، وأموت وأنا بعمل رسالة سامية الناس تستفيد بيها، ولو بعثنا والكاست اللي فوق لسة شغالة هقولهم أنا لسة جاي طازة شغلوني معاكم، يعني لو فيه ممثلين وقاعدين فاضين فوق والدنيا كويسة أنا هشتغل معاهم إيه المشكلة؟ ربنا خلق الكون كله للإبداع.

وتابع: أنا مؤمن أن في حياة تانية على كواكب تانية غير مكتشفة، مش جايز أطلع في طبق طائر على كوكب تاني وأمثل في مكان تاني؟.

وأضاف: أنا دعيت قدام الكعبة أن محدش من ولادي يحب مهنة التمثيل، لأن أدهم ابني كان ناوي يدخل اللعبة دي وأنا اشفقت عليه من العذاب اللي أنا شُفته وطلبت من ربنا يبعدهم عن هذا المجال.

تحدث الفنان إبراهيم أبو العطا، عن تفاصيل تعاونه مع المخرج خالد يوسف، في مسلسل سره الباتع، بجانب حديثه عن سبب قلة أعماله الدرامية.

وقال التلفزيون شلالية ومافيا صعب تدخل وسطهم، وعلشان تدخل بيرمولك الفُتات، التلفزيون مافيا من ناحية الممثل والمخرج، المخرج زمان كان بيدور على اللي عايزه، ولكن دلوقتي بيعتمد على مكاتب الكاستينج، وبنلاقي الممثلين في كل المسلسلات، والمخرج مفيش عنده وقت، والمنتج عايز اللي بيوفر وأهم حاجة عنده النجم والنجمة اللي بيبع بيهم والباقي مش مهم، وبيبقى فردت شراب ونقلبها.

وتابع: أنا من الممثلين اللي مبيجريش ورا حد، أنا ممكن يكون معايا 100 جنيه وأعيش بيها على قدي، ولا أني أروح أبيع موهبتي وفني ولا أتذل لحد وأقوله شغلني علشان مفيش في بيتي فلوس، أنا أعمل دور صغير وأبصم بيه ويبقى علامة وأطلب فيه اللي أنا عايزه.

وعن تعاونه مع المخرج خالد يوسف، فعلق إبراهيم أبو العطا: خالد يوسف رجل يعشق السينما، وهو رجل مجتهد وبيجي قبل الممثلين والدنيا كلها في اللوكيشن، كلنا بنتعب وهو ربنا يدي له الصحة، وبيدور على أدق التفاصيل، وفي مشهد المجاميع المفروض كلنا حافيين وعقلي وزني أني أقف على البلغة لأن الأرض كلها حصى، نده عليا في الميكروفون وقالي أرمي البلغة اللي أنت واقف عليها ولا فاكرني مش شايفك؟.

وأضاف: في مشهد كنت بجري حافي في سره الباتع وزجاجة دخلت في رجلي، وأدائي معجبش الأستاذ خالد يوسف ولما عرف أن زجاجة دخلت في رجلي قام وشدها وطلب أقعد أرتاح، ولما تعبت كلمني بشخصه وقالي هتكمل معانا ولا أقولك البقاء لله، ولما روحت اللوكيشن حضني وطبطب عليا وقالي لو تعبان ارتاح، هو في حد كده؟ ده مخرج يخليك تتفانى ولو تعبان تروح له، وكل ممثل أشتغل مع خالد يوسف أصبح نجم، جاء ذلك في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”.