ويبقى الأثر … ويبقى الأثر … كلمة كبيرة!!! ازيكم الأول .. عاملين ايه .. النهاردة في احداث كتيرة بتحصل من حولينا .. بس خلونا كعادة فكرة المكنز اننا بنفكر بطريقة إيجابية .. ايوة يعني نص الكباية المليان .. وان المكنز هوه بيت الكنز .. الكنز اللي موجود في كل نقطة في حياتنا .. وكل شبر في مصر .. يالا بينا
ويبقى الأثر … النهاردة بنقول كل سنة مصر طيبة وبخير علشان حاجات كتير اوي .. أولا .. بداية العام الهجري الجديد بعد يومين ان شاء الله .. ثانيا .. بداية صوم العذراء .. ثالثا .. عيد افتتاح قناة السويس الجديدة .. طبعا كان ليها دور رئيسي في موضوع الناقلة “ايفرجيفن” بس للأسف محدش قال كان الدور ايه .. ببساطة نص الحركة كان شغال .. من الشمال للجنوب بسببها .. ومن الجنوب للشمال كان واقف .. حد فاهم حاجة؟ رابعا .. عيد ميلاد أصدقاء كتير مش بس النهاردة انما شهر أغسطس كله .. تحس ان مصر كلها اتولدت في أغسطس .. طبعا برج الأسد وهما فعلا اسود
ويبقى الأثر … نقول مبروك لأبطال مصر في اولمبياد طوكيو .. والنهادرة فوز جديد وميدالية جديدة لأول مرة في التاريخ ميدالية مصرية عربية افريقية في الكاراتيه .. البطلة جيانا فاروق .. مبروك يا بنت النيل
ويبقى الأثر … نقول مبروك .. دلوقتي بتتم إجراءات نقل مراكب الشمس من منطقة الاهرامات الى المتحف المصري الكبير
ويبقى الأثر … رحيل ميسي عن برشلونه … صحيح … احبب ما شئت فإنك مفارقه
كالعادة .. بسأل أصدقائي .. يا ترى المكنز يفتح انهي باب النهاردة .. وخصوصا باب الابتكار وريادة الاعمال .. لاقيت في شبه اجماع على موضوع انا شخصيا حصلي يوم الأربعاء .. اول امبارح .. فا من هنا لهنا .. قولت يبقى شكلها كده ده موضوع الأسبوع … نشوف الحكاية .. كنت أصلا في تدريب لحاضنات الاعمال .. يالا بينا
بنوتة دفعة 2018 وبتشتغل من وهي في الجامعة في احد الجهات الداعمة لريادة الاعمال … وبتقول انها زهقت من الشغل … وان مديرها عمل فيها فصل مايصحش .. جابها من طنطا للقاهرة في الجو ده وسابها منتظرة 5 ساعات علشان يعمل معاها اجتماع وفي الاخر قالها معلش عندي معاد دكتور مش حاقدر اقعد معاكي وسابها ومشي .. المهم … بقولها انتي نفسك تعملي ايه او تشتغلي في ايه .. قالتلي عايزة ابقى “كوتش” .. وطبعا بان على وشي علامات الاندهاش !!! وكلمتها … ماشي … بس حاتعملي كوتشنج لمين؟ ايه خبرتك؟ تعرفي ايه في الدنيا .. المهم … قولتلها شويه حاجات وربنا يوفقها ..
طبعا بنشوف امثله كتيرة في الشغل محدش بيرضى يعلم حد واللي بيحب يوقف المعلومة عنده .. طيب ما انت يا كابتن اتعلمت ازاي .. واللي يقول اصل انا متعلمتش بسهولة ولازم يتعبوا زيي .. وطبعا الجملة الإنجليزية الشهيرة “جوجل إت”
المهم .. في التدريب .. واحده من المتدربين كانت بتحكي على فئة من “منتور” اول ما بتكلمهم انهم يوجهوا رواد الاعمال .. راحوا سألين .. حاتدفعوا كام .. والسؤال هنا ومستني ردكم … هوه التوجيه وانك تعمل عمل خير او تساعد حد بتستنى مكافأة او فلوس من حد؟ ولا انت تكافء نفسك بنفسك؟ هل بتستنى مقابل؟ ولا بتكتفي بحب الناس ليك وان العمل ده نابع من جواك؟ لما الانسان يكون من جواه شخص صادق وحقيقي ومش مزيف بيكون قادر على الإصلاح سواء بقى في محيط اسرته او عمله او مجتمعه
ويبقى الأثر … واحنا على خطوات من الاحتفال ياليوم العالمي للشباب .. والشباب يعني مصر … بس كنت باتكلم مع كذا حد من أصدقائي اللي بعتز برأيهم … ولاقينا حاجة غريبة اوي .. الجيل “زد” وما بعده … عنده حاجة غريبة اوي … موضوع النظام .. الاحترام .. الانتماء .. المثابرة والجلد … من الحاجات اللي فيها علامة استفهام .. طب الشباب نسبة منهم عايزة تبقى مديريين .. وعندهم وعندهم وعندهم … تمام زي الفل بس فيا احترام الكبير .. ماهو انت حاتاخد الخبرة من فين ومن مين؟ وعندي امثلة كتيرة انا واصدقائي شايفينها .. هوه في ايه؟ وحقيقي ده منعكس على رواد الاعمال بشكل كبير .. الشباب بقوا بيزهقوا بسرعة .. عايزيين الحاجات السريعة من غير أي تعمق .. وحتى لما يتكلموا .. تلاقيهم بيقولوا كلام كبير وغالبا مش فاهمين نصه!! لسه عملت انا كده في محاضرتي في الماجستير من كام يوم… واحد من الشباب دول قعد يقول كلام كبير ولما سألته عن تفاصيل للأسف معرفش!!! الرحمه!!!
ويبقى الأثر .. طولت عليكم معلش … اصل أفكار كتير ومواقف كتير … أخيرا .. موقف من اربع سنين .. واحد شاب حضر ليا دورة تدريبية واخد “قلم” عادي جدا علشان يكتب بيه .. الظريف لما حد طلبه منه .. قاله خللي بالك لازم ترجعه .. قاله ليه … قاله علشان ده اخدته في المكان الفلاني لما كنت باخد دورة عن الابتكار وريادة الاعمال مع نزار سامي .. ومازلت محتفظ بيه .. علشان اتعلمت .. فا اوعى تضيعه!!
ويبقى الأثر.. على رأي واحد اسمه ستيفن كوفي … قال:
Live .. Learn .. Love .. Leave a Legacy
عيش .. تعلم .. حب .. اترك اثر
ويبقى الأثر … اشوفكم بخير الأسبوع الجاي ان شاء الله
