راحة البال ولت.. كيف يدبر المواطن قوت يومه بـ3 آلاف جنيه في الشهر؟.. «ملف الموقع»
أم شهد: الأسعار في السوق وجعت قلبي جوزي منين يعيش صاحب معاش 3200 جنيه .. زوجي 67 سنة وعنده القلب وبشتغل عشان نكفي البيت
لبنى: حصة المراجعة 150 جنيه والأكل والشرب ولع.. وجوزي بيشتغل ليل نهار عشان يكفي البيت وبنستلف
شهيرة: كيلو اللبن بـ 30 جنيه و3 آلاف جنيه مش هتكفي وجبة فطار طول الشهر
نقيب الفلاحين: لدينا اكتفاء ذاتي من الخضروات و الفواكه.. والتصدير وفاصل العروات سبب غلاء الأسعار
تقرير – منار إبراهيم:
تزايدت الهموم على أكتاف المواطن المصري، اختفت الضحكة والنكتة، وأصبح توفير لقمة العيش الشغل الشاغل لكل رب أسرة الذي نسى طعم الراحة وبات يعمل في أكثر من عمل ليدبر قوت يومه، وذلك نتيجة للأزمة الاقتصادية التي ألقت بظلالها على مناحي حياة المصريين وأثرت على دخول الأفراد بشكل كبير، وارتفاع الأسعار بصورة تفوق قدرة المواطن.. فكيف يعيش المواطن الذي يحصل على أقل من الحد الأدنى من الأجور 3 ألاف جنيه؟، هذا ما يرصده «الموقع» خلال السطور القليلة القادمة …
وفي جولة بأحد الأسواق لرصد أسعار الخضروات بمنطقة عين شمس، تراوح سعر كيلو الطماطم بين 6.5 إلى 8 جنيهات، والبطاطس من 10 إلى 15 جنيها، الكوسة 18 جنيهًا والبصل الجديد 20 جنيهًا والقديم 35 جنيها وبلغ سعر الفاصوليا والبسلة 25 جنيه والفلفل الرومي والحار 16، والقلقاس 24 جنيها، والليمون 20 جنيهًا.
وفي هذا الصدد، قالت أم شهد، سيدة في الستين من عمرها، إن غلاء الأسعار ضرب جميع السلع في الأسواق، مضيفة: “عازمة ولادي وأحفادي على الغداء و طلبوا محشي الأسعار في السوق وجعت قلبي الحاجة اللي كانت برخص التراب بقت نار، سعر كيلو البذنجان 15 جنيهًا، والكوسة 18، والفلفل بـ 16، و 3 حزم خضرة محشي بـ 10 جنيه وميكفوش، وكيلو الأرز بـ 35 والطماطم بـ8، يعني سعر حلة المحشي بأسعار السوق انهارده تعدي الـ 150 جنيه، ولسه هعمل جمبها فراخ أو لحمة”.
وتابعت: “عشان أجمع ولادي على الغداء كل إسبوع عايزه على حوالي 700 أو 800 جنيه، غير المصاريف اليومية و عندي بنت في الجامعة، ومصاريف العلاج والمستشفيات، نكفي على مصاريف المعيشة منين و احنا بندبر لقمة كل يوم بالعافية، منين والمعاش كله 3200 جنيه، الواحد لو تعب بيستحمل الوجع و ميرضاش يروح للدكتور عشان يوفر لقمة لعياله، حرام الراجل عنده القلب و عمره 67 سنة و بعد ما كان موظف شغال عامل في محل عشان المعاش مبيكملش أسبوع في الشهر”.
ومن جانبها، أضافت لبنى محمد، سيدة في الأربعين من عمرها، “عندي 3 عيال في المدارس، واحنا في أيام امتحانات ومراجعات، وسعر حصة المراجعة النهائية للواحد منهم 150 جنيه، ده غير الأكل والشرب اللي أسعارهم ولعت، زوجي بيشتغل موظف الصبح و سائق على أوبر بليل، والدخل مش مكفي و على أخر الشهر بنستلف”.
وأكملت: ” أطالب الحكومة بالنظر للمواطن اللي مبقاش عارف يأكل عياله لقمة كويسة، أبوهم شغال صبح و ليل عشان يلبي طلباتهم و كل يوم الأسعار في ارتفاع نلاحق منين، العيشة بقت صعبة وفوق قدرة أي مواطن حتى اللي دخله 10 آلاف جنيه يشتكي أومال الغلبان اللي بياخد 3 آلاف جنيه يعمل ايه”.
و بملامح يملأها الحزن، تابعت: ” الواحد نسي راحة البال، تربية العيال صعبة إزاى عايزين نربي أجيال كويسة و الواحد ينحت الصخر عشان يعلمهم و يأكلهم، تربية الأولاد عايزه أب في البيت، إزاي هنربي تربية كويسة والأب بيجري وراء الأكل العيش ليل نهار ومعندوش وقت للعيال”.
نرشح لك: العالم يتجه إلى التخلي عن الدولار الأمريكي في التجارة العالمية.. القاهرة وبكين توجهان ضربة قاصمة للعملة الأمريكية
وفي سياق متصل، قالت شهيرة محمود، سيدة في الأربعين من عمرها، إن سعر كرتونة البيض بلغ 138 جنيها، و كيلو اللبن بـ 30 جنيهًا يعني في الشهر 900 جنيه، وربع الجبنة بـ 45 جنيها، يعني متوسط إفطار الأسرة المصرية 100 جنيه في اليوم أي 3 آلاف جنيه في الشهر، يعني مطلوب من كل أسرة الأب و الأم يشتغلوا أكثر من شغلانة عشان يكفوا مصاريف الشهر، مين هيربي العيال و ينظف البيت ويؤسس أسرة.
وفي هذا الصدد، قال حسين أبو صدام، نقيب عام الفلاحين، إن مصر لديها اكتفاء ذاتي من كافة الخضروات والفواكه وتصدر الفائض، وصدرنا الموسم الماضي قرابة 7 مليون طن نتيجة التوسع في الزراعات وزيادة الإنتاج.
وأشار إلى أن الدولة تزرع مساحات كبيره من البطاطس تصل لـ 600 ألف فدان، و تنتج نحو 7.5 مليون طن كل عام نصدر منها ما يقارب الـ900 ألف طن، ومع بداية جني العروة الجديدة من البطاطس فإن أسعارها انخفضت ويبيع المزارع حاليا كيلو البطاطس في الحقل ب 7 جنيهات وتصل للمواطن في الأسواق بسعر يتراوح بين 12 إلى 15 جنيهًا.
وأوضح أنه يتم زراعة نحو 400 ألف فدان من الطماطم طوال العام، تنتج نحو 6.5 مليون طن من الطماطم، ويباع حاليا كيلو الطماطم في الحقل بنحو 5 جنيهات ليصل للمستهلك بنحو 10 جنيهات، ويتم زراعة نحو 200 ألف فدان من البصل لتنتج نحو 3 مليون طن ويباع البصل المقور حاليا في الحقل ب 7 جنيهات ليصل للمستهلك بنحو 15 جنيه.
وفي النهاية، لفت نقيب الفلاحين إلى أن المساحة الزراعية في مصر تصل لـ 10 مليون فدان، فيما تصل المساحة المحصولية 17 مليون فدان، موضحًا أن ارتفاع أسعار بعض الخضروات والفواكه يرجع إلى عدة أسباب أهمها: فاصل العروات، التغيرات المناخية السلبية في بعض الأحيان والتي تؤدي لقلة الإنتاجية، زيادة الصادرات الزراعية، كثرة الحلقات الوسيطة في بيع المحصول من المزارعين حتي المستهلكين، ارتفاع أسعار المستلزمات الزراعية، ارتفاع أسعار المنتجات الغذائية ومستلزمات الزراعة نتيجة الأحداث السياسية والإقتصادية العالمية.
