ابتدينا من الجمعة اللي فاتت اننا نستكشف مع بعض اركان المكنز.. وبالفعل ابتديناها بركن مهم اوي هوه ركن الفريق وفرقنا بين معنى “فريق” و “مجموعة” وقولنا ان في شوية ديناميكيات بتحكم اداء الفريق .. النهاردة حانتكلم على مراحل تكوين الفريق وعايزكم تشاركوني التعليق على كل مرحلة وكمان تشاركوني تجاربكم وخبراتكم … ماتنسوش ان المكنز موجود عند كل واحد فينا .. يالا بينا
علشان الفريق يوصل للغرض بتاعه ويحقق الهدف اللي هوه عايزه فا ده محتاج شغل كتير وكمان بياخد وقت بس اهم حاجه ان كل واحد يكون عارف قدراته وامكانياته الحقيقية مش بس امكانياته اللي هوه متخيل انه عارفها .. كل واحد جواه حاجات وطاقات كتيرة وكبيرة بس مش بتطلع
حاجة كمان نتفق عليها … اللى بيحققه الفريق او اللى بيوصله بيكون معتمد على الفريق نفسه في انهي مرحلة من مراحل تطوره
خللي بالكم .. فريق العمل ممكن انه يكون مؤقت او دائم .. طب ازاي دي؟
فريق مؤقت ببساطة كده أعضاء الفريق اتجمعوا (ممكن من حتت مختلفة) واتشكلوا واتكونوا علشان يحققوا هدف معين وبعد تحقيق الهدف ده كل واحد بيرجع للمكان الأصلي اللي كان فيه … يا ترى هل في حاجة في ذهنكم شبه كده عدت عليكم في حياتكم؟ ما تشاركونا بمثال …
طب والفريق الدائم ده اللي هوه ازاي؟ ده اللي بيتجمع ويتشكل ويفضل مع بعض لفترات طويلة … زي مثلا الناس اللي بتشتغل مع بعض في إدارة او في قسم معين بيفضلوا مع بعض مدة مش صغيرة … يا ترى ممكن تدوني امثلة تانية من حياتكم؟
المهم … سواء كان الفريق مؤقت او دائم فا مراحل تكوين الفريق بتكون كالتالي .. المرحلة الأولى: مرحلة التشكيل او التكوين … المرحلة الثانية: مرحلة الاقحام او الصراع … المرحلة الثالثة: مرحلة الاتساق … المرحلة الرابعة: مرحلة الأداء … المرحلة الأخيرة: مرحلة الختام
تعالوا نتكلم على كل مرحلة ببساطة … عايزكم واحنا بنتكلم عن كل مرحلة انكم تفتكروا ده بتجارب حقيقية حصلت معاكم وعايزكم تطلعوا بقى مميزات وعيوب كل مرحلة ونشارك بعضنا بيها ..
المرحلة الأولى: مرحلة التشكيل او التكوين … المرحلة دي مرحلة التعارف بين افراد الفريق و كلو بيحاول يوصل الى تفاهم مشترك ومعرفة كل واحد مش بس معرفه سطحية بناخد خطوة زيادة .. يا ترى ايه المميزات وايه العيوب بتاعت المرحلة دي!
المرحلة الثانية: مرحلة الاقحام او الصراع … في المرحلة دي بتظهر الخلافات والصراعات بين اعضاء الفريق واحيانا ممكن نعتبرها ان دي هي مرحلة التنطيط على بعض .. يعني كل واحد عايز يظهر وعايز يوري انه هوه اللي بيفهم وكده .. في ساعات الموضوع بيزيد عن حده والناس ممكن تشد مع بعض لدرجة ان الفريق يبوظ .. يا ترى هل عدت عليكم المرحلة دي في حياتكم؟ ها؟ هل في أي مميزات او عيوب للمرحلة دي؟ يالا شاركونا …
المرحلة الثالثة: مرحلة الاتساق … بتيجي المرحلة دي بعد مرحلة الصراع وان أعضاء الفريق قدر يعدي المرحلة الصعبة اللي فاتت وساعتها بتكون وجهات النظر بينهم اتقربت والناس بقى عندها اتفاق على الهدف .. وهنا تبتدي العلاقة بين أعضاء الفريق تاخد شكل فريد وجميل .. في المرحلة دي بتبتدى تتطور العلاقات الوثيقة بين أعضاء الفريق .. مش بس كده، ده كمان بيتحد الفريق وبيجتمع على الهدف بعينه وكمان بيحصل التناغم بين الفريق وتبتدي تحس ان الناس ابتدى قلبها يبقى على بعض وعلى المكان اللي بيجمعهم وعلى تحقيق الهدف او الحلم بتاعهم اللي هما متجمعيين علشانه … واضح جدا ان المرحلة دي نقدر نطلع منها مميزات، بس هل فيها عيوب؟ نفكر شويه كدا!!
المرحلة الرابعة: مرحلة الأداء … دي بقى مرحلة المزيكا … هي دي مرحلة الاداء والعمل الحقيقي للفريق علشان يوصل لهدفه … بيظهر هنا التضافر والتكامل بين كل الطاقات … يظهر هنا روح العمل الجماعى .. ها تفتكروا ايه ممكن يكون بيميز المرحلة دي وايه اللي ممكن يظهر كا عيب للمرحلة دي؟
المرحلة الأخيرة: مرحلة الختام … بعد مرحلة الأداء وتحقيق الأهداف والفريق يجيب الجول بتيجي المرحلة دي .. المرحلة بيتم تقديم الشكر والثناء على الاداء و توجيه التحية والتقدير لكل فرد من الافراد مهما كان دوره صغير لانهم كلهم شركاء النجاح ويا سلام لو كان في أي نوع من أنواع المكافأة كا حافز للناس اللي اشتغلت وتعتبت علشان توصل للهدف .. المرحلة دي مهمة علشان لازم فيها نطلع الدروس المستفادة .. يعني من الاخر كده، اللي اتعمل كويس ايه اللي خلاه يتعمل كويس .. واللي اتعمل مش قد كده ايه السبب فيه وازاي نتلافى الوقعة دي في المرات الجاية .. ها؟ شايفيين أي مميزات او أي عيوب من المرحلة دي؟
لو جمعنا الأفكار دي كلها وحبينا نطبقها على اصحابنا او مشروعاتنا اوحتى في البيت او العمارة او او او .. اكيد حانشوف الدنيا بشكل مختلف … لازم نفهم قبل ما نتصرف … وللحديث بقية ان شاء الله في الجمعة القادمة
