كل سنة وانتم طيبين .. مين سقعان ومين بردان يرفع ايده .. طب مين سننانه بتكتك او او او او او .. ده صوت التكتكة حضراتك .. حد يعرف؟ ايوه زي فيلم إسماعيل ياسين .. طب مين متدفي ومتكلفت وايديه سقعانه او رجله .. كله الا الرجل وفردة الشراب اللي دايما بتختفى ..
كل سنة ومصر بخير وسعادة وفرح .. النهاردة اول جمعة في ٢٠٢٢ .. والنهاردة يوم 7 يناير .. عيد الميلاد المجيد .. يا رب يكتر افراحنا وتكون سنة خير وبداية حصاد تعب السنين .. بس المهم اننا نكون على قلب رجل واحد .. كل سنة واهل مصر بسعادة .. اهل مصر يعني اقباط مصر .. للي مش عارف كلمة أقباط يعني سكان مصر .. فا طلما كلنا ساكنين في مصر فا كلنا اقباط مصر
قلب واحد .. يمكن في مننا اللي شاف سيادة الرئيس بيتكلم عن الجمهورية الجديدة .. جمهورية الحلم والعلم والامل .. الجمهورية القادرة مش الغاشمة .. الجمهورية المسالمة مش المستسلمة اللي حانبنيها مع بعض .. الكلام ده قاله سيادته اثناء زيارته للكاتدرائية في العاصمة الإدارية علشان يشارك مصر الاحتفال بعيد الميلاد .. ده مش حايتحقق غير لما كلنا نكون على قلب رجل واحد .. قلب واحد .. رؤية واحدة
قبل واحد .. مع بداية ٢٠٢٢ عايزين نفتكر مع بعض رؤية واحدة .. رؤية مصر ٢٠٣٠ اللي بتقول .. انه بحلول سنة ٢٠٣٠ مصر يكون عندها اقتصاد تنافسي عالمي متنوع قايم على الابتكار والمعرفة علشان جودة حياة المصريين .. حقيقي انا شايف ان دي رؤية عبقرية وبالفعل ماشيين ناحيتها .. ابتكار .. معرفة .. علم يعني مش بالفهلوة .. العلم القائم على الدليل .. علشان في الاخر يكون عندنا حياة كريمة .. طبعا في ناس مش فاهمة يعني ايه رؤية أصلا .. ولو فاهمين فا مش عارفين يعملوا ايه او بيحاولوا يعملوا زي ما الناس بتعمل من حوليهم .. فا ساعات بتكون تمام وساعات تقلب انه يالا ناخد لقطه .. عادي عادي .. المهم السلوك الجمعي للناس يمشينا في الاتجاه الصحيح
قلب واحد .. مع بداية نسمات ٢٠٢٢ طل علينا الأستاذ الدكتور نبيل شلبي .. ده الراجل ابن المنصورة اللي دايما عنده دايما فكر ريادي واللي عمل خريطة ريادة الاعمال بتاعت مصر واللي فيها توضيح للجهات اللي بتدعم ريادة الاعمال في مصر .. خريطة جميلة ناس كتير بتستعملها ومش عارفة مين اللي وراها .. دكتور نبيل اطلق منصة بتجمع اللي بيشتغلوا وبيدعموا ريادة الاعمال في مصر بحيث نبقى شايفيين مين فين وعنده ايه .. احنا عندنا موضوع كده انه دايما بنقول منعرفش .. دكتور نبيل ابتدى الحدوته من كذا سنة .. والنهاردة بقى النقطة المرجعية لمنظومة ريادة الاعمال في مصر .. والحمدلله المكنز موجود على الخريطة .. فا شكرا دكتور نبيل وشكرا ليكم لان انتم اللي خليتوا المكنز كده موجود .. الف شكر
قلب واحد .. عايز اقولكم ان المقال اللي فات لما سألت نعمل الوبينار مع نزار يوم ٢٢ من كل شهر ولا نخلينا يوم ٢١ زي ما حنا .. كانت اغلب التعليقات يوم ٢٢ .. فا كده حايكون الوبينار مع نزار يوم ٢٢ من كل شهر سنة ٢٢ .. بس الاساعة بقى حانخليها الساعة ٢٠ مش ٢٢ علشان نلحق نقعد مع بعض .. وأول لقاء السنة دي ان شاء الله حايكون دكتور نبيل شلبي .. يالا سجلوا اول الإعلان ينزل
قلب واحد .. الحمد لله مع بداية ٢٠٢٢ الواحد قابل ناس ليهم ابتسامه حلوة .. ناس بجد بتخلي الواحد يشوف الدنيا بشكل تاني .. حقيقي يا جماعة “يوو ميد ماي ييير” حته انجليزي بالعربي انما ايه .. شغل فنادق .. الا يعني شغل فنادق .. ولا المصيبة الكبيرة .. حاجة اوستيك .. يا ترى انتم ايه؟ هل فعلا قابلتم ناس في خلال الأسبوع ده حسيتوا انهم “ميد يوور ييير”؟ لو اه يبقى تمام حاتشوفوا منهم تاني . ولو لاء لسه يبقى ان شاء الله حاتشوفوا الأسبوع ده ما تقلقوش
قلب واحد .. ان شاء الله بكرة السبت حاتبتدي فعاليات منتدى شباب العالم .. السنة دي مش زي أي سنة .. ده بعد الكورونا .. حقيقي اجندة المنتدى مليانه أنشطة كتيرة لريادة الاعمال .. من اول بقى ورش عمل لمعرض لجلسات عامة لحد توقيع واطلاق اتفاقيات .. بجد حاجة جميلة و تفرح وطبعا بيكون في بث مباشر علشان اللي مقدرش يروح يبقى بيتابع الاحداث
قلب واحد .. جمع بين جيهان وخالد في نوبيع .. مكان جديد وغريب اوي لكنز جديد من الكنوز المصرية .. دار جان .. جيهان وخالد اتقابلوا وحبوا بعض وقرروا انهم يبتدوا مشروعهم في نوبيع .. اسمه دار جان .. دوروا عليهم على الفيس بوك وشوفوا بيعملوا ايه .. مصر مليانة كنوز
قلب واحد .. ويبقى الأثر .. جت وزارة التضامن وعملت احتفال برواد العمل التنموي اللي فقدناهم السنة اللي فاتت بس اثر شغلهم لسه ممتد وليهم بصمات في العمل التنموي والإنساني .. فعلا ويبقى الأثر
قلب واحد .. رسالة لكل مبتكر وكل رائد اعمال .. دايما خليكم على قلب واحد في مشروعاتكم الجميلة علشان تنجح .. وماتنسوش الجمهورية الجديدة .. جمهورية الحلم والعمل والامل .. كل سنة وانتم طيبين متدفيين مش سقعانين ولا ون السقعة جميلة بتطلعنا من منطقة الكومفورت زوون الى منطقة النشاط والعمل والاجتهاد .. كل سنة ومصر طيبة .. ويبقى الأثر وقلب واحد
