أراء ومقالاتالموقع

نزار سامي يواصل كتابة مقالات “المكنز” … هتتصرفوا ازاى ؟

فاكرين الكفاءة والفاعلية اللي اتكلمنا عنها المرة اللي فاتت؟؟ اهلا بيكم الأول … ازيكم … عاملين ايه … ها فاكرين؟ المرة اللي فاتت لاقيت في تفاعل على الموضوع ده ووجهات نظر كلها تحترم وليها مبرراتها … المهم ايه بقى!!! لاقيت “مدحت” صديق عزيز عليا من أيام المدرسة كاتب تعليق ظريف ولاقيت استاذتي في العمل التطوعي دكتورة “أمل” برضة قايله إضافة جميلة وصديقي العزيز “ايمن” ليه وجهة نظر كمان ظريفة ..

المهم … قعدت افكر في مقالة الأسبوع تبقى ايه؟؟ وجاتلي فكرة كدة من واقع اللي باشوفه وباسمعه وكمان عدى عليا … الفكرة بتاعت المقال ده هي “حتتصرف ازاي” .. بمعنى .. كلنا عدت علينا مواقف مع مديرينا او مع زمايلنا او مع الفريق اللي معانا .. انا باشوف ان كل المواقف جميلة … بس كل حاجة ليها جمالها .. في منها مقالب ومشاكل .. ده غير الغيرة والنفسنة .. المهم … روحت سألت حد باحب اخد رأيه في مواقف كتيرة عن رأيه في الفكرة دي .. الحقيقة فتحلي كذا اتجاه .. وعلشان كده المقال بتاعت النهاردة عايزكم تقولولي حاتتصرفوا ازاي في المواقف دي !!!! يالا جاهزين؟؟

كنت دايما بسأل طلبة الماجستير اللي بادرسلهم مادة الإدارة المعاصرة … ياترى لو بقيت مدير … حاتعمل ايه مختلف مديرك مش بيعمله … حقيقي كنت بالاقي إجابات ظريفة جدا .. على سبيل المثال … حد قالي: أي حاجه حاعملها حاتبقى مختلفة .. باقوله ليه؟ قالي علشان البرنس مابيعملش حاجة خالص .. تخيلوا !!!! مابيعملش حاجة خالص !!! هوا يا سامح على رأي محمد صبحي … حد تاني قالي حاقعد مع التيم بتاعي .. حد قالي حاخد قرارات .. حد قالي مش حانسب الشغل لنفسي .. حقيقي بتبقى عاملة زي جلسة الفضفضة من اللي الناس شايفاه مع مديرنها .. طبعا بقى مش حاحكلكم عن المدير اللي بيقلق منك !! صباح الفل .. يالا نشوف مواقف وتقولولي حاتتصرفوا فيها ازاي .. احب اسمع رأيكم

الموقف الأول: لما يبقى المدير ده انت اللي عرفته المكان ده وتشاء الاقدار انه يبقى مدير فيه ويقولك تعالى نشتغل سوا … وبعد شوية تلاقيه يقلق منك ويقولك: لو فاكر ان اللي بتعمله ده حايخليك تيجي تقعد على الكرسي ده .. فا تنسى وانصحك تبتدي تدور على شغل تاني … يا ترى حاتتصرف او تتصرفي ازاي؟

الموقف التاني: لما تشتغل مع مدير وطبعا كلنا عارفين اجتماع المديرين بتاع يوم الحد .. ويطلع من الاجتماع ده مفرهض ويجي يجتمع بيكم ويقولكم الاتي: على فكرة .. انهاردة احنا اتكلمنا في اجتماع المديرين على حاجات مهمة وفي قرارات مهمة جدا حاتطلع .. نيجي نسأله: طب ايه هي القرارات دي .. يرد يقول: لائ مش حاقدر أقول .. اصلها سر!!! طب يا كابتن طالما سر بتفتح الموضوع ليه أصلا!!! تخيلوا بقى لو الموديل ده كده على طول .. تتصرفوا معاه ازاي!!

الموقف التالت: لما تشتغل مع مدير يحسسك انه المكان ده ايه غير هوه وشويه حاجات تانية حوليه .. والراجل يا ولداه حاسس بعقده النقص بس مش قادر يفسر .. لما حد يزنقه يقول: اللي مش عاجبه يتفضل يمشي .. هوه حد يطول يشتغل هنا (او ساعات بيقول: يشتغل معايا) .. الباب يفوت جمل .. حاتتصرفوا ازاي .. طب لو كان الراجل ده على قدر من العلم والمعرفة واسمه فعلا معروف في مجاله .. يا ترى تفرق؟؟

الموقف الرابع: تعمل ايه مع المدير اللي بيفرك من الناس اللي تحته .. يعني لو عرف ان حد عنده بياخد كورسات او بيعمل ماجستير .. تبقى وقعته مش معدية .. مش مهم .. المهم هوه رد الفعل !!! البوب بيروح يجيب اضعف حد ممكن تتصوره ويديله الشغل لمجرد انه عايز يثبت حاجه معينة .. طبعا مش حاقولكم لو عرف انه عندك امتحان او تسليم مشروع !!! ليله ما يعلم بيها الا ربنا !!! حاتتصرفوا ازاي؟

الموقف الخامس: لما تكون رايح شغل جديد وفي زميل ليك في نفس مستواك الإداري يقعد يطبل ويقول ايوه بقى ده احنا كده حاننطلق بسرعة الصاروخ .. وبعد شوية لما يبان فرق السرعات والفهم .. تلاقيه يبتدي يقوم الناس عليك بدون أي مبرر .. من الاخر كده بيصطاد في الميه العكرة بس ايه!! ايده نضيفة مية في المية .. بيخلي الناس التانية هي اللي تضرب فيك .. يا ترى تتصرفوا ازاي

في مواقف كتيييييييييييييرة جدا .. يالا شاركوني افكاركم واراءكم ..

في الاخر عايز أقول .. قوتك الحقيقية كا مدير هي قوة اضعف واحد معاك … بس كده! القاكم على خير

نزار سامي يكتب لـ«الموقع» مقالات المكنز .. الكفاءة ولا الفاعلية

مقالات ذات صلة

زر الذهاب إلى الأعلى