يا اهلا ومرحب بيكم اعزائي الغاليين .. الحقيقة الأسبوع كان أسبوع حافل جدا الحمد لله مش بس على المستوى الشخصي انما على مستوى البلد الحمد لله بصورة عامة ومجال ريادة الاعمال والابتكار بصورة خاصة .. تقريبا نقدر نقول ان بين كل حدث والتاني كان في حدث لريادة الاعمال بصورة او بأخرى .. المهم دايما اللي عايزيين نتكلم فيه ونخليه في عقلنا دايما هوه ايه؟؟؟ ايوه!!!! ويبقى الأثر .. ما تنسوش ..
عايزيين دايما يكون عندنا العقلية الإيجابية والتفكير الإيجابي .. حتى لو الواحد اتعرض لمواقف مع اشخاص كانوا قريبين منه او بيحاولوا يتقربوا منه لمصلحة او غرض او أي كان .. حاولوا ما تتضايقوش كتير وماتزعلوش حتى لو كانوا عزاز عليكم … في الاخر لا يصح الا الصحيح .. حابقى احكيلكم على كام حاجة كده لو الوقت سمح …
عارفين .. من اكتر اللحظات المهمة عندي هي ساعة ما باختار اسم المقال .. العملية مش سهلة خالص .. بس ساعات بتيجي قدام الواحد حاجات او مقولات .. ساعتها بتلاقي اللمبة نورت .. النهاردة الصبح سمعت واحد اسمه مختار بيتكلم عن الوطن .. والحقيقة كان وجهة نظرة جيده جدا .. بصيت لاقيت اني بما اني باتكلم عن ريادة الاعمال .. وعلى حسب الحاجات اللي قالها مختار قعدت افكر فيها .. طب ماهو هوه ده ريادة الاعمال .. ومن هنا جه اسم المقال النهاردة .. ريادة الوطن .. يالا بينا
لو مسكنا يوم السبت اللي فاتت .. حقيقي كان في بتاع تلات لقاءات تخص ريادة الاعمال .. واحد منهم كان ملتقى في الحرم اليوناني في التحرير وكان شباب فيه شباب ما شاء الله عليهم كلهم حماس وطاقة إيجابية ورغبة حقيقية في التعلم .. الشباب كانوا قاعدين من الصبح والدنيا حر ونار بس طلب العلم والتعلم بقى مالوش كبير
بعدها كان في حديث عن كأس العالم لريادة الاعمال … تخيلوا!! بقى فيها كاس عالم .. بالمناسبة مصر ليها فريق فيها … بنتكلم عن اكتر من 35 دولة جايه بفرق من مختلف مراحل الشركات الناشئة .. والكل عايز يتنافس مش بس علشان الفلوس انما الأهم هو العمل .. التأثير .. التقدم .. بالتوفيق ان شاء الله لكل المتقدمين
تخيلوا بقى ايه كمان .. اتفاقية تعاون بين الوكالة المصرية للفضاء وبين نقابة المهندسين علشان اتاحة مجموعة من العلوم والمعارف الخاصة بعلوم الفضاء للشباب المهندسين .. ايوه ليه المهندسين بس؟ ابدا خالص .. دي مجرد بداية .. علوم الفضاء دي من الحاجات المهمة اللي لازم الشباب يبتدي يبص عليها .. فيها تكنولوجيا وتقدم تكنولوجي رهيب … سمعنا عن مسابقة ناسا لتطبيقات الفضاء؟ عارفيين المسابقة دي مصر عضو أساسي فيها من اول سنة ابتدت فيها .. شباب رائع بيشارك بأفكار وتطبيقات لنظم الفضاء … ايه الجمال ده .. اللي عايز يتفكر عن تقرير عن الاتفاقية دي .. ادخلوا على الرابط ده:
طب بمناسبة الفضاء والطيران … هل حضراتكم تعرفوا ان في شركة مصرية بتشتغل في مجال الالكترونيات .. فيها شباب رائع .. الشركة دي بتعمل بعض الأنظمة الملاحية الالكترونية اللي في الطيارة البوينج؟ ريادة الوطن يا ابطال
كل ده احنا لسه في يوم السبت .. فما بالكن بقى بباقي أيام الأسبوع … الاحد والاثنين والثلاثاء .. مجموعة لقاءات ومناسبات رائعة مع عنصر رئيسي مع عناصر دعم ريادة الاعمال … حاضنات الاعمال …
ايه حاضنات الاعمال دي .. يمكن كنا اتكلمنا عنها قبل كده انما خلينا بقول هيه عباره عن ايه … فكرتها بالظبط زي فكرة الحاضنة (مش الحضانة) اللي بتكون في المستشفى اللي بيتحط فيها المولود الجديد او لما يتولد علشان بيكون لسه مش مستعد اوي يدخل الدنيا لسبب او لاخر .. فا الحاضنة دي بيتم فيها رعاية المولود رعاية خاصة جدا لفترة زمنية وبعدين يخرج للدنيا … نفس الفكرة بالظبط .. حاضنات الاعمال .. مكان بيستضيف فيه أصحاب الأفكار او المشروعات الناشئة اللي لسه في اول اول اول الطريق خالص .. لسه بدري اوي عليهم .. بيدخلوا الحاضنة دي وبيتم رعايتهم رعاية خاصة .. الرعاية هنا بتكون في صورة العلم والتدريب والتوجيه وشويفة فلوس تساعد بجزء بسيط جدا انه يبتدي .. ريادة الوطن
حقيقة مصر فيها دلوقتي اكتر من 20 حاضنة اعمال .. بس المهم ايه؟ المردود والاثر … عايزيين نحس بأثر الشغل الجميل ده .. الشباب اللي في الحاضنات دي حقيقي رائع .. كلهم طاقة ونشاط وحاجه جميلة وتفرح .. الظريف ايه؟ انهم في امكان متفرقة .. يعني مهما كان مكانك حاتلاقي اللي يساعدك .. الكل عايز يساعد الكل عايز يخدم من القلب بجد .. ريادة الوطن
دايما بحب أقول ان اللي بيشتغل في منظومة ريادة الاعمال .. دي مش وظيفة .. ده أسلوب حياة .. طبعا في ناس اعرفهم شغالين في المجال .. ما شاء الله … سبوبة .. اتفرجوا على صورهم زمان قبل ما يدخلوا المجال وصورهم دلوقتي .. حاجة ايه … الدنيا ضربت من حتت كتير ..
نيجي بقى لمفاجأة تانية .. تقرير التنمية البشرية للأمم المتحدة عن مصر .. واهتمام سيادة الرئيس بحضور هذه الفعالية .. حاجة جميلة .. نقطة ارتكاز وبداية قوية لرواد الاعمال ممكن يطلعوا من التقرير ده فرص لا حصر لها … يالا يا شباب .. ريادة الوطن
حاجة كمان جميلة شاركت فيها .. واحب أوجه الشكر للدكتورة هالة السعيد وزيرة التخطيط والتنمية الاقتصادية والدكتورة شريفة شريف رئيس معهد الحوكمة والتنمية المستدامة والمعلم الفاضل والقدوة الدكتور حسين اباظة وكل فريق عمل مبادرة “كن سفيرا” .. كان عندي معاهم ومع مجموعة متميزة من ممثلي حياة كريمة ومؤسسة مصر الخير ومؤسسات تانية ورشة عمل بعنوان “الابتكار .. ريادة الاعمال .. التنافسية” .. وحقيقي الشباب قدروا ينفذوا تحدي انهم ازاي بمبلغ 100 جنيه يقدروا يعملوا منتج يستغلوا بيه الميزة النسبية لقرى حياة كريمة ويعملوا منه بيزنس ويوفروا فرص عمل .. كام في 11 فريق .. كل فريق 7 او 8 افراد .. بجد حاجة تفرح … ريادة الوطن
طولت عليكم انا عارف … مختار كان بيقول ايه بقى النهاردة .. بناء الوطن بيكون بالعمل .. التعلم .. الاسرة .. رد الشائعات والبعد عن المتسلقين .. بس بجد ريادة الوطن .. القاكم على خير ولكم التحية
