يا اهلا بأعز الناس .. اهلا بيكم أصدقائي الأعزاء .. الجو النهاردة جميل .. شتوي .. مصر .. سقعة .. وووااااووو .. مين بيحب السقعة .. جو انتعاش بجد .. كله يجري ياخد طاقة حلوه للنشاط والحيوية والعمل ..
النهاردة اخر شهر في السنة .. اخر أسبوع في الشهر .. اخر يوم في الأسبوع نهاية عام ٢٠٢١ .. يا رب يكون عام جميل عليكم يا رب .. النهاردة المقالة رقم 33 في مقالات المكنز .. باشكركم لدعمكم ليا وتشجيعكم ..
انا شايف ناس كتير على الفيس بوك حاطة حصاد العام وايه الإنجازات اللي حققوها .. حاجة جميلة جدا ما شاء الله .. ربنا يبارك للجميع .. بس ماشوفتش حد حط أي حاجة عن الإخفاقات .. برافو .. عايزيين دايما معانا العقلية الإيجابية .. حتى لو في إخفاقات فهي مش بتدوم .. ده ربنا قال ان مع العسر يسر .. سبحانك يا رب فعلا .. ده يمكن من اهم الحاجات اللي طلعت بيها .. اول ما تشوفوا حاجة شكلها كده مش كويس .. خليكوا متأكدين ان ده في معاه حاجة كويسه .. كل اللي محتاجينه انكم بس تهدوا شويه وتفكروا ولو ثواني .. وحاتلاقوا الحاجة الحلوة .. العقلية الإيجابية أساس كل حاجة
الحواشة .. ايه يا ترى الكلمة دي؟ حد عارف؟ عارفيت تقروها أصلا؟؟ الحواشة فيها شده على الواو .. ايه الحكاية .. بنتي نور كانت بتقولي عايزة ٢٠ جنيه .. فا بقولها ليه .. بتقولي علشان احوشهم .. بقولها طب وال ٢٠ جنيه اللي قبل كده فين .. قالتلي معايا اصلي معنديش حواشة .. ربنا يحميكي يا رب .. الحواشة هي الحصالة يعني .. افتكرت الكلمة دى وانا بادي محاضرة اون لاين مع وزارة الشباب والرياضة عن الشمول المالي .. طيب ايه فكرة الشمول المالي .. خلينا نقول ان اول ما تسمعوا كلمة شمول .. فا في تلات حاجات لازم تكون موجودة .. ايه هي الحاجات دي؟ اول حاجة لازم يكون في توعية وتثقيف بالحاجة اللي معمول ليها شمول .. يعني لو بنتكلم عن شمول مالي يبقى يكون في توعية وتثقيف مالي .. يعني من الاخر كده محو الامية المالية وان الواحد يكون عارف المصطلحات الأساسية بتاعت الموضوع وفاهم خطوط عريضه فيه والتثقيف ده مطلوب لمين؟ حقيقي لكل حد .. الفرد .. الشركة .. المؤسسات وكله.. ده أولا .. الحاجة التانية انه يكون في خدمات او تطبيقات او منتجات تبع الموضوع ومتاح للكل .. اهم حاجة متاح للكل يعني مش لناس وناس .. طيب مين اللي حايعمل ده؟؟ اللي حايعمله هما الناس اللي حاتقدم الخدمات او المنتجات او ممكن طبعا رواد الاعمال .. الحاجة التالته والأخيرة هي ان لو المستخدمين واللي بيعملوا الخدمة او المنتج شبطوا في بعض يا ترى يا هل ترى من اللي حايفك الاشتباك ده .. علشان كده بيجي الركن التالت اللي هوه حماية المستهلك … تمام كده؟ فا لو حد سأل يعني ايه شموا مالي او شمول رقمي او أي حاجة فيها كلمة شمول يبقى عارفين الإجابة
الحواشة .. كل سنة وانتم طيبين .. الحواشة طلعت المكنز على فكرة .. هووووووس … ايوه ماهو المكنز هو المكان اللي بيشيلوا فيه الكنوز .. والحواشه هي اللي بنحوش فيها الفلوس .. مفهومة طبعا
يا ترى حواشة ٢٠٢١ كانت مليانة ايه؟ ناس داخلة وناس خارجة … أنشطة يمين وشمال .. فرح وسعادة .. حزن والم .. ضحك من القلب .. مرارة على اللي فات؟ يا ترى حوشتوا ايه؟؟
انا لاقيت حواشة كانت عندي قديمة اوي .. امبارح كان عيد ميلاد استاذي أستاذ الرياضيات بتاعي وانا في سنه رابعة ابتدائي .. الدكتور عبدالمرضي أيوب .. لاقيت ايه بقى؟ لاقيت اوتوجراف كان والدي الله يرحمه جابهولي وكنت في نهاية كل سنة اروح للمدرسين بتوعي يكتبولي كلمة .. شوفتوا بقى كنت محوش ايه؟ لاقيته كاتب الصورة اللي في البوست .. صورتها وورتهاله .. فعلا ويبقى الأثر!! ربنا يبارك فيك استاذي القدير
يا ريت كل واحد يجيب حواشه .. ويحط فيها الحاجات اللي بيحبها .. على فكرة برضه لما طلعنا الكامب مع اس اس ايه .. كان في ظرف حكيتلكم عليه في الناس كاتبة لبعض رسايل .. الله الله .. ويبقى الأثر
حواشة ٢٠٢١ فيها كتييير اوي .. في مجال ريادة الاعمال احداث كتييييير .. وبينارات وايفنتات ومسابقات ومحاضرات في الجامعة والقاءات في البرامج المختلفة وروح حلوه جميلة .. واكتر حاجة كانت بتشد الانتباه هوه موضوع الانفستمنت .. يعني الاستثمار.. وظهور برامج بتعمل الاستثمار وانواعه .. بجد محتاجين من ده كتير … طبعا فاكريين سويفل .. ما شاء الله ربنا يبارك .. وفي مجال التكنولوجيا .. ابتدينا السنة بالابليكيشن بتاع الكلوب هاوس والناس كانت مهوسه بيه .. وقرب اخر السنة ظهر الخواجة مارك بالميتافرس .. وده هوس من نوع تاني
حواشة ٢٠٢١ فيها ناس الواحد اتشرف بمعرفتهم وكانوا سند ليه بكلمة او اقتراح او رأي .. حواشة ٢٠٢١ فيها ناس الواحد اتشرف انهي مشيوا .. مش عايز أقول غاروا .. من حياته .. ربنا يسهل لعبيده ويدي كل واحد على قد نيته .. عارفين .. سبحان الله لو فكرتم .. حاتلاقوا ان ديسمبر ٢٠٢٠ كان بحال .. وديسمبر ٢٠١٩ بحال تاني خالص .. وبالتالي ديسمبر ٢٠٢١ حال مختلف تماما .. ربنا يسهل و ديسمبر ٢٠٢٢ يكون اجمل واجمل … عيشو اللحظة يا حضرات
حواشة ٢٠٢١ فيها حياة كريمة .. رؤية مصر 2030.. فيها بداية حصاد 7 سنين من الجهد والعمل والإخلاص للبلد .. الجمهورية الجديدة .. بناء الانسان المصري .. وعلى رأي الدكتور عمرو سليمان .. احنا مش قوليليين .. مصر جميلة وتستحق كل خير .. يالا شدوا حيلكم بس .. طريق مش سهل بس مش صعب .. افتكروا العقلية الإيجابية
حواشة ٢٠٢١ لو قعدت أتكلم عنها مش حانخلص .. عملنا مع بعض وبينارات كتير .. باشكركم كلكم على اهتمامكم .. عملنا زيارات لمدن كتير ولسه في اكتر .. دردشنا في حاجات كتير .. حقيقي عايز أتكلم كتير .. اصل اللي بيمسك الحديدة ما بيسبهاش .. سيب الحديدة يا كابتن مش كده
حواشة ٢٠٢١ .. حواشة الخير .. كل سنة وانتم طيبين وفي احسن حال وكلكم في نشاط وفرح .. ربنا يفرح قلبكم .. ماتنسوش تقولوا شكرا ..
شكرا ليكم جميعا على كل حاجة مهما كانت صغيرة او قليلة .. شكرا لكل ضيوفي في الوبينارات .. شكرا لكل واحد قال كلمة حلوة .. شكرا لكل واحد دعاني لمحاضرة او مسابقة .. شكرا لكل واحد أتكلم من القلب .. شكرا اكيد ليها اثر خطير .. خلاص كده يا ٢٠٢١؟؟ ان شاء الله اللي جاي احسن يا رب .. ويبقى الأثر ..
اه صحيح .. لسه لسه ماسك الحديدة … هههه .. قبل مانسى .. عايز اخد رأيكم .. وبينار مع نزار في ٢٠٢١ .. عايزنه يكون يوم ٢٢ من كل شهر سنة ٢٢؟ ولا حابين ايه؟؟
كل سنة وانتم طيبين .. اشوفكم على خير في لقاء جديد وعام جديد مليان بكل خير .. وماتنسوش ايه؟؟ ايوه بالظبط كده .. ويبقى الأثر .. باي ٢٠٢١ واهلا ٢٠٢٢
اقرأ ايضا للكاتب
