يا سكندرية يا .. اهلا بيكم أعزائي من عروس البحر المتوسط .. النهاردة اول أكتوبر .. بنقول لكل الناس كل سنة وانتم طيبين .. ناس كتير متسجل عيد ميلاده النهاردة .. مش كده ولا ايه .. يا سكندرية يا .. ما فيش اجمل من انك تخطف يومين تطلع تشحن طاقاتك علشان تكمل المسيرة
يا سكندرية يا … مش بس الميه والجو الجميل .. انما كمان الابتكار والتكنولوجيا وريادة الاعمال .. يا سكندرية يا .. مكتبة الإسكندرية بتستضيف حدث مهم جدا للعام السابع على التوالي عن التكنولوجيا وريادة الاعمال .. اسمه تيكني سامت .. او قمة تكني .. يالا تعالوا ..
طبعا باتقدم بجزيل الشكر والامتنان للدكتور نبيل شلبي .. اللي بيجتهد دائما ورسم خريطة منظومة ريادة الاعمال في مصر .. والحمد لله .. المكنز بقى موجود على الخريطة .. شكرا دكتور نبيل شلبي .. ويبقى الأثر
عايز اقولكم على تجربة سيد … اول الأسبوع كان عندي ورشتين عمل مع مجموعة من رواد الاعمال وأصحاب المشروعات الناشئة .. كنا عايزيين نشوف ايه اللي رواد الاعمال محتاجينه في ظل المتغيرات اللي بيعيشوها الشباب .. حقيقة كانت مجموعة متميزة من الحضور .. بس اكتر واحد كل الحضور قاموا وصقفوله هوه سيد .. مين سيد؟ سيد ده يا شباب .. شاب مصر اصيل .. مجتهد .. مش من القاهرة .. من نبروه .. المنصورة .. شاطر في المدرسة في بس جاله مدرس عقده في الإنجليزي .. فا كانت النتيجة انه ما جبش مجموع يخليه يدخل ثانوي عام .. فا دخل ثانوي فني .. اتشطر .. واجتهد وابتدى يذاكر .. ونجح وجاله تقديم في هندسة .. في زي سيد كتير على فكرة .. المهم سيد عمل مشروع صغير .. وابتدى يحكي ازاي انه كان عايز يخدم الناس بالحاجة اللي بيعرفها او بيفهم فيها او فيها الشغل بتاعه .. دخل مشروع مع شريك له .. حط سيد فيه كل ما يملك .. والمشروع ما نجحش .. انما سيد نجح ..
سيد نجح لانه عرف انه النجاح مش بيجي غير بالجد والاجتهاد والمعافرة والمثابرة في الحاجات اللي بنحبها ..ز من الاخر يعني الشغف بتاعه .. سيد قرر انه ينجح .. شاف هوه بيحب ايه وبيفهم في ايه وشاف ايه اللي الناس في منطقته عايزاه .. ابتدى يدور على الاحتياجات الأساسية اللي الناس عايزاها .. مش بس الاحتياجات انما هوه بيفهم فيها ويعرف يقدمها .. سيد دلوقتي بقى عنده محل لصيانة الأجهزة الكهربية والموبايلات .. سيد كان بياخد الرسك … الرسك يحب الخفية .. وما ننساش ان الرسك على الله … قلش مش كده؟؟ سيد وعد اخوه انه حايفتحله مشروعه بس بشرط انه يخدم الناس … سيد يا شباب .. الناس كلها اللي موجودة وقفت احتراما وتقديرا لسيد … ان شاء الله حانزلكم الفيديو بتاعه قريب تشوفوه .. ماتنسوش .. ويبقى الأثر …
بعديها كان عندي ورشة عمل لي 18 مشروع جديد .. كلها قائمة على التكنولوجيا .. وكنا بنتكلم عن التفكير التصميمي .. او ال design thinking
تاني التفكير التصميمي؟ ايوه تاني وتالت ورابع … ده ايه ده؟ يالا نفتكر .. دي منهجية بتقوم في الأساس على الانسان … يعني ايه .. يعني ازاي أصحاب الأفكار ورواد الاعمال يبنوا مشروعاتهم بحيث يكون محورها هوه الانسان … من كل حاجه .. من اول تفهم من هوه الانسان … اللي عايزين بيؤثر او يتأثر بموضوع معين او مشكلة معينة .. الشخصية دي عايشة ازاي وبتتصرف ازاي وايه مشاكلها وهكذا .. وبعدين نشوف مشاكله ايه وبيتفاعل معاها ازاي … ونفهم كويس اوي عقليته وتفكيره .. بعد كده نشوف انسب الحلول المبنية على التكنولوجيا الملائمة وازاي نطوع التكنولوجيا ونبسطها علشان تخدم الشخصية اللي بندرسها .. حقيقة موضوع شيق جدا .. وده جزء مهم من تحديات التحول الرقمي .. اصل ناس كتير في عملية التحول الرقمي بتعمل برامج جميلة .. بس معقدة .. فين السلاسة والبساطة يا شباب!!!
حقيقة ورشة العمل دي كانت فيها أفكار جميلة ومشروعات جميلة وشباب الله اكبر عليه .. بس المهم الالتزام بأخلاقيات العمل واخلاقيات ريادة الاعمال .. عايزيين مرة نتكلم على اخلاقيات ريادة الاعمال .. بس الملفت للنظر كان عبد الرحمن .. طالب مصري في بيدرس في سنة أولى جامعة (لو انا فاكر صح) في المملكة العربية السعودية وكان بيحضر معانا علشان هوه الراجل التقني في المشروع اللي مشارك فيه .. الله الله الله عليكي يا مصر … ولد ممتاز علما وخلقا وشاطر فنيا .. ربنا يحميك .. مش بس عبدالرحمن .. انما كل الحضور زي هاني اللي كان في لندن وبيحضر معانا وكل المجموعة الحقيقة كله جاي عنده حلم وعنده شغف وعايز بجد يجتهد … عارفين .. كل الشباب الجميل ده حايكونوا في يوم من الأيام “محمد صلاح” .. كل واحد حايكون “مو صلاح” بس في حتته .. ما تنسوش ويبقى الاثر
برضه كان في احداث كتير تخص ريادة الاعمال والابتكار في الكام يوم اللي فاتو .. شوفنا برنامج رواد 2030 الخاص بريادة الاعمال اللي تبع وزارة التخطيط انه تم وتوقيع اتفاق تعاون في مجال التكنولوجيا السينما مع شركة جيميناي افريكا ..
كمان شوفنا وسمعنا برنامج كن سفيرا اللي اختتم اعماله .. برنامج طموح لسفراء التنمية المستدامة … ويمكن عملت معاهم ورشة عمل عن الابتكار والتكنولوجيا وازاي الشباب اقدروا يطلعوا أفكار تخدم حياة كريمة .. ويبقى الأثر
النهاردة التقيت بشباب زي الورد بعد الصلاة كنا بنتكلم عن التكنولوجيا … تخيلوا تخصصات متنوعة .. صيدلة .. هندسة .. تجارة .. لغات .. وغيرها .. كلهم شغف بالتكنولوجيا .. حاحكيلكوا التفاصيل في المرات الجاية … ويبقى الأثر
عارف اني طولت عليكم .. الموضوع اصله في غاية التشويق … مستنيكم في قمة تيكني .. اللي حايقدر يجي واللي مش حايقدر ممكن يشارك اون لاين … وان شاء الله اللقاء القادم موضوع جديد وخطوة جديدة لحياة كريمة
اقرأ أيضا للكاتب
نزار سامي يواصل كتابة «المكنز» لـ«الموقع» .. التكنولوجيا والمترو
نزار سامي يواصل كتابة «المكنز» لـ«الموقع» عن ريادة الوطن
نزار سامي لـالموقع المكنز التثقيف ولا الأمية
