الموقعفن وثقافة

نزار سامي يكتب لـ”الموقع” مقالات “المكنز” .. الفرق والنزاعات

اهلا بيكم … المرة اللي فاتت دردشنا شوية في تحفيز فريق العمل … فاكرين؟ وشوفنا مع بعض أهمية التحفيز وانه ده علم وليه نظريات واتكلمنا على هرم الاحتياجات بتاع الخواجه ابراهام ماسلو .. تمام؟ وكمان حطينا مع بعض سؤال مهم لازم نفكر فيه … حد فاكر؟ ازاي حانعمل التحفيز في ظل العالم الجديد … عالم ما بعد كورونا .. العالم الرقمي .. حد لقى او عنده أي أفكار في الموضوع ده؟

النهاردة حانتكلم مع بعض على موضوع في ناس من كتر ما هي عايشاه بقت مش شايفاه ولا حساه ومع ذلك بيستهلك ويستنزف مجهودهم وطاقتهم …

النهاردة حانتكلم عن النزاعات اللي بتحصل في أعضاء الفريق وازاي نتعامل معاها .. ويا ترى برضه هل التعامل معها حايختلف في ضوء موضوع التحول الرقمي ولا لاء؟؟

تعالوا كده نتكلم عن شوية معلومات عامة .. هوه اسمه النزاع ولا صراع؟ الحدوته بتبتدي مع ظهور اختلافات بين الناس او بين أعضاء الفريق .. بنبتدي بشوية اختلافات والموضوع يكبر ويكبر .. عامل زي كورة التلج ومرة واحدة نلاقي الموضوع ضرب في وشنا .. النزاع او الصراع اللي بين الناس ما هو الا الخلاف اللى بينشأ بين الافراد نتيجة لوجود اختلاف على الأهداف، او المصالح، أو حتى منظومة القيم اللي كل شخص بيعيش بيها

بس عايزيين نسأل .. يا ترى هل وجود الاختلاف حاجه كويسة ولا وحشة فى الفريق؟ ما تقولولنا رأيكم وشاركونا خبراتكم ومواقفكم اللي ممكن تكونوا شوفتوها

خللوا بالكم … الصراع هو جزء لا يتجزأ من الحياة العملية علشان الأهداف بتختلف من شخص لشخص وغالبا الأهداف دي بتكون غير متوافقة.

طب يا تري أنواع النزاعات؟ فى كذا نوع من أنواع النزاع (او الصراع) زي مثلا .. الصراع بين الأشخاص .. والصراع داخل المجموعات و فرق العمل .. عندنا كمان الصراع جوه المؤسسات و الجهات.

لو بصينا على اسباب و مصادر الصراع .. حانلاقي انه بتتنوع اسباب و مصادر الصراع بحيث تتضمن: الاهداف المختلفة والتوقيتات الزمنية .. بمعنى وجود اهداف مختلفة بتوقيتات زمنية مختلفة بين الافراد في الفرق والمجموعات على سبيل المثال، الناس بتوع الإنتاج عادة بيصوا على الكفاءة وخفض التكاليف وبيشتغلوا على البعد الزمنى القصير نسبيا. في المقابل، الناس بتوع التسويق والمبيعات بيركزوا على الاستجابة للعملاء.

تداخل المهام .. ده شكل تاني من اشكال النزاع .. لما حد يدي اثنين أو أكثر من الافراد او المديرين السلطة لنفس الأنشطة أو المهام،

شكل تالت .. الاعتماد المتبادل للمهام .. وده بيحصل علشان في اعتمادية في كتير من مهام الشغل على افراد او تخصصات ففي احيانا كتيره بيحصل ان بعض الافراد بيتدخل في شغل الافراد التانية

مظهر رابع .. طرق التقييمات أو أنظمة المكافأة .. ساعات بتكون الطريقة التي بيتم تقييم الفرق والمجموعات هي مصدر آخر للصراع. على سبيل المثال، بيتم تقييم الناس بتوع الإنتاج ومكافأتهم على اساس امكانياتهم في المحافظة والشغل في حدود الميزانية أو تخفيض التكاليف مع الحفاظ على الجودة، علشان كده احيانا كتيره بيترددوا في اتخاذ خطوات اللى من شأنها انها تزود التكاليف. في المقابل، بيتم تقييم الناس بتوع التسويق على اساس قدرتهم انهم يزودوا المبيعات والوصول الى رضا العملاء، علشان كده ساعات بيشوفوا ان الأجر الإضافي هو ثمن قليل مقارنة بالمجهود اللى بيعملوه علشان يستجيبوا للعملاء.

شكل خامس هوه ندرة الموارد .. بمعنى انه ازاي نستفيد الاستفادة المثلى من الموارد المتاحة وبصورة اكتر كفاءة وفعالية بالرغم من ندرتها

تمام … بعد ما حطينا ايدنا على مظاهر النزاعات او الصراعات .. عايزين نشوف ازاي نفكر في استراتيجيات لإدارة الصراع ..

خللي بالكم .. حل النزاعات يعني أن الصراع يتم حله عن طريق التسوية أو عن طريق التعاون بين الطرفين في الصراع .. بتتطلب استراتيجيات حل النزاع أن الأطراف المشتركة في الصراع انها تكون على استعداد للتعاون مع بعض علشان نوصل لحل وسط يرضى جميع الأطراف .. الحل الوسط ممكن لما كل طرف يشعر انه على استعداد للدخول في تبادل الأخذ والعطاء .. حاجه كمان .. التعاون هو وسيلة للتعامل مع الصراع اللي تحاول الأطراف تلبية أهدافها من غير تقديم أي تنازلات.

برضه ما ننساش انه بالإضافة إلى الحل الوسط والتعاون، فيه ثلاث طرق تانية ممكن استخدامها في التعامل مع الصراعات ..
1) القبول: بمعنى قبول احد الاطراف بالوضع القائم و الموافقة على مطالب الطرف الاخر. و الاسلوب ده ممكن انه يسبب مشاكل اكتر فى المستقبل علشان حيسبب عدم تعاون بين الاطراف المختلفة.

2) التجنب: بتحاول تتجنب الصراع بين الطرفين و تدور على حل للخلاف بين الاطراف و دي طريقه غير فعالة ..

3) المنافسة: بتحصل المنافسة لما بتحاول الأطراف المتصارعة انها تعظم المكاسب الخاصة بيهم. ودي كمان طريقة غير فعالة.

عايزيين نتفق مع بعض انه مهم اوي يحصل زيادة الوعي بمصادر الصراع .. طب ليه؟ علشان في بعض الأحيان بينشأ الصراع بسبب مشاكل الاتصالات وسوء الفهم بين الأفراد، زى الاختلافات في الثقافات وغيرها. فا عن طريق زيادة وعي الناس ده حيساعد على حل الصراع .. زيادة الوعي بالتنوع والمهارات .. الصراعات الشخصية ممكن تنشأ بسبب التنوع. علشان كده زيادة الوعي والمهارات والتنوع ممكن إنه يساعد على حل النزاعات

يا ترى بقى لما بنتكلم على العالم الرقمي … الدنيا حاتبقى ماشيه ازاي في الحتة دي؟ فكروا ونتقابل على خير ان شاء الله الجمعة الجاية .. سلام!

نرشح لك 

نزار سامي يكتب لـ الموقع بعنوان المكنز .. التحفيز

مقالات ذات صلة

زر الذهاب إلى الأعلى