كتب- أحمد عبد العليم
كشف المطرب والملحن عمرو مصطفى تفاصيل الخلاف بينه وبين المنتج محسن جابر، مطالبا بعقد حوار وطني ومناقشات في مجلس الشعب حول حقوق المبدعين من مؤلفي وملحني الأغاني.
وقال عمرو مصطفى خلال لقائه مع الإعلامية أسما إبراهيم ببرنامج “حبر سري” المذاع عبر قناة القاهرة والناس: “عايز أسأل أستاذ محسن جابر سؤال، حضرتك تعاملت مع عمالقة مثل بليغ حمدي وأم كلثوم وأغاني عبد الحليم وفايزة أحمد، وموجود لحد اليوم، إحنا النهاردة بنسمع مين؟ ومين المسؤول؟ طالما هو كبير المنتجين يبقى هو المسؤول عن الصناعة”.
وأضاف: “مش هو أخذ تنازلات من المبدعين؟ المبدع لو أنتج أغنية وكسب ملايين هينتج 50 أو 60 أغنية، وفجأة كل المبدعين هيبطلوا يدوا المنتجين، يبقى لازم نوعي كل المبدعين بإنهم لا يتنازلوا عن حقوقهم”.
ورفض عمرو مصطفى السماح لمطربي المهرجانات باستخدام ألحانه قائلا: “ثاني حاجة عايز أقول لأستاذ محسن جابر عليها، إنت قلت مع الإعلامي خيري رمضان إن عندك 30 ألف مصنف أغنية ومش واخد بالك، وحسن شاكوش أخذ ألحاني لعمرو دياب والعالم الله وعملوها مهرجانات، لو الأغنية بتدخل دولار في اليوم، يعني حضرتك بتدخل 30 ألف دولار كل يوم الصبح، يعني 900 ألف دولار في الشهر، يعني 12 مليون دولار في السنة، رغم إن في أغاني بتدخل 20 ألف دولار في الأسبوع، فين حقوق المبدعين؟ هو أخذ كله”.
وتابع: “أنا لم أتنازل عن حقوقي في الديجيتال والمفروض يعيد التعاقد، وفي حاجة في القانون بتقول لو الفنان تنازل عن الأغنية بتنازل بات لا رجعة فيه، وظهرت تقنية جديدة تسمح له إنه يكسب فلوس من حقه يبطل التنازل ويعيد التعاقد مرة أخرى، وكل المؤلفين والملحنين لازم يقروا قانونهم”.
أوضح عمرو مصطفى أنه يعتزم تغيير طريقة تعامله في أعماله الموسيقية قائلا: “أنا عايز أرسي مبدأ، مفيش تنازل في تصريح، وأي أغنية أقوم بإعطاء ورقة بها ستكون تصريح بسنة أو سنتين أو ثلاث سنوات أو خمس سنوات، لكن 49 سنة ده إجحاف، ولازم حوار وطني وهذا الكلام يتم مناقشته في مجلس الشعب”.
